ਮੌਸਮ ਦੇ ਬਦਲਦੇ ਰੰਗ ਕਾਰਨ ਕੰਬਾਈਨਾਂ ਦੀ ਮੰਗ ਵਧੀ

ਪੱਤਰ ਪ੍ਰੇਰਕ
ਜਲੰਧਰ, 13 ਅਪਰੈਲ
ਇੱਥੇ ਅੱਜ ਮੌਸਮ ਦੇ ਬਦਲਦੇ ਰੰਗ ਕਾਰਨ ਜਿਥੇ ਕੰਬਾਈਨਾਂ ਵਾਲਿਆਂ ਦੀ ਮੰਗ ਵਧ ਗਈ ਹੈ, ਉਥੇ ਕਿਸਾਨ ਕਾਫੀ ਪ੍ਰੇਸ਼ਾਨ ਨਜ਼ਰ ਆ ਰਹੇ ਹਨ। ਅੱਜ ਸਵੇਰ ਤੋਂ ਹੀ ਚੱਲ ਰਹੀ ਤੇਜ਼ ਹਵਾ ਅਤੇ ਸ਼ਾਮ ਨੂੰ ਹੋਈ ਕਿਣ ਮਿਣ ਕਾਰਨ ਕਣਕ ਨੂੰ ਨੁਕਸਾਨ ਹੋਣ ਦਾ ਖਦਸ਼ਾ ਬਣਿਆ ਹੋਇਆ ਹੈ। ਕਿਸਾਨ ਸਵੇਰ ਤੋਂ ਕੰਬਾਈਨਾਂ ਵਾਲਿਆਂ ਦੇ ਚੱਕਰ ਲੱਗਾ ਰਹੇ ਹਨ। ਜਗਨਪੁਰ ਦੇ ਕਿਸਾਨ ਚਰਨਜੀਤ ਨੇ ਦੱਸਿਆ ਕਿ ਪਿੱਛੇ ਤਾਂ ਮੌਸਮ ਠੀਕ ਸੀ ਪਰ ਅੱਜ ਅਚਾਨਕ ਹੋਈ ਬੱਦਲਵਾਈ ਕਾਰਨ ਉਨ੍ਹਾਂ ਦੀਆਂ ਪ੍ਰੇਸ਼ਾਨੀਆਂ ਵਧ ਗਈਆਂ ਹਨ। ਇਸੇ ਤਰ੍ਹਾਂ ਨਕੋਦਰ ਦੇ ਨੇੜੇ ਰਹੀਮਪੁਰ ਦੇ ਕਿਸਾਨ ਨੇ ਦੱਸਿਆ ਕਿ ਸ਼ਾਮ ਨੂੰ ਪਏ ਮਾਮੂਲੀ ਮੀਂਹ ਨੇ ੳਸ ਦੀ ਚਿੰਤਾ ਵਧਾ ਦਿੱਤੀ ਹੈ। ਉਧਰ, ਕੰਬਾਇਨ ਮਾਲਕਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਕਈ ਕਿਸਾਨਾਂ ਨੇ 2 ਮਹੀਨੇ ਪਹਿਲਾਂ ਹੀ ਬੁੱਕ ਕੀਤਾ ਹੋਇਆ ਹੈ। ਬੱਦਲਵਾਈ ਕਾਰਨ ਅੱਜ ਤਾਪਮਾਨ ਵਿੱਚ ਵੀ ਕਾਫੀ ਗਿਰਾਵਟ ਆਈ ਹੈ।