ਟੁੱਟੀਆਂ ਸੜਕਾਂ ਕਾਰਨ ਰੇਲ ਲਾਈਨਾਂ ਤੋਂ ਲੰਘ ਕੇ ਸਕੂਲ ਜਾ ਰਹੇ ਨੇ ਬੱਚੇ
ਜਗਮੋਹਨ ਸਿੰਘ
ਘਨੌਲੀ, 3 ਸਤੰਬਰ
ਗੁਰੂ ਗੋਬਿੰਦ ਸਿੰਘ ਸੁਪਰ ਥਰਮਲ ਪਲਾਂਟ ਦੀਆਂ ਝੀਲਾਂ ਤੋਂ ਸੁਆਹ ਲੈਣ ਲਈ ਆਉਂਦੇ ਟਿੱਪਰਾਂ ਦਾ ਬਦਲਵਾਂ ਰਸਤਾ ਇਲਾਕੇ ਦੇ ਲੋਕਾਂ ਤੇ ਸਕੂਲ ਪੜ੍ਹਦੇ ਮਾਸੂਮ ਬੱਚਿਆਂ ਲਈ ਮੁਸੀਬਤ ਬਣ ਗਿਆ ਹੈ। ਜਾਣਕਾਰੀ ਅਨੁਸਾਰ ਪਿਛਲੇ ਦੋ ਸਾਲਾਂ ਤੋਂ ਪਿੰਡ ਦਬੁਰਜੀ ਨੇੜੇ ਧਰਨਾ ਲਗਾ ਕੇ ਬੈਠੇ ਧਰਨਾਕਾਰੀ ਕੌਮੀ ਮਾਰਗ ਲਈ ਸੁਆਹ ਢੋਣ ਵਾਲੇ ਟਿੱਪਰਾਂ ਨੂੰ ਪਿੰਡ ਦਬੁਰਜੀ ਤੋਂ ਨਹੀਂ ਲੰਘਣ ਦੇ ਰਹੇ। ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਇਨ੍ਹਾਂ ਟਿੱਪਰਾਂ ਦਾ ਮਾਰਗ ਬਦਲ ਦਿੱਤਾ ਹੈ। ਰਾਤ ਸਮੇਂ ਖਾਲੀ ਟਿੱਪਰ ਘਨੌਲੀ ਵੱਲ ਤੋਂ ਭਾਖੜਾ ਨਹਿਰ ਦੀ ਪਟੜੀ ਰਾਹੀਂ ਆਉਂਦੇ ਹਨ ਤੇ ਸੁਆਹ ਨਾਲ ਭਰੇ ਟਿੱਪਰ ਰਾਵਲਮਾਜਰਾ ਪਿੰਡ ਵਾਲੇ ਪਾਸਿਉਂ ਨਹਿਰ ਦੀ ਪਟੜੀ ਰਾਹੀਂ ਲੰਘਦੇ ਹਨ। ਖਾਲੀ ਟਿੱਪਰਾਂ ਦਾ ਥਰਮਲ ਅੰਦਰ ਜਾਣ ਦਾ ਸਮਾਂ ਸ਼ਾਮ 6 ਵਜੇ ਤੋਂ ਬਾਅਦ ਹੈ, ਪਰ ਚਾਲਕ ਤਿੰਨ ਵਜੇ ਹੀ ਨਹਿਰ ਦੀ ਪਟੜੀ ਤੋਂ ਘਨੌਲੀ ਬੱਸ ਸਟੈਂਡ ਤੱਕ ਕਤਾਰ ਲਗਾ ਲੈਂਦੇ ਹਨ। ਇਸ ਕਾਰਨ ਬੱਸ ਸਟੈਂਡ ’ਤੇ ਔਰਤਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਟਿੱਪਰਾਂ ਕਾਰਨ ਨੁਕਸਾਨੀ ਸੜਕ ਕਰ ਕੇ ਥਰਮਲ ਪਲਾਂਟ ਨੇੜੇ ਬਣੀਆਂ ਝੁੱਗੀਆਂ ਵਿੱਚ ਰਹਿਣ ਵਾਲੇ ਮਾਸੂਮ ਵਿਦਿਆਰਥੀਆਂ ਨੂੰ ਰੇਲਵੇ ਲਾਈਨ ਰਾਹੀਂ ਸਕੂਲਾਂ ਵਿੱਚ ਜਾਣਾ ਪੈ ਰਿਹਾ ਹੈ।
ਸਮੱਸਿਆ ਡੀਸੀ ਦੇ ਧਿਆਨ ਵਿੱਚ ਲਿਆਂਦੀ: ਮੁੱਖ ਇੰਜਨੀਅਰ
ਥਰਮਲ ਪਲਾਂਟ ਦੇ ਮੁੱਖ ਇੰਜਨੀਅਰ ਹਰੀਸ਼ ਕੁਮਾਰ ਸ਼ਰਮਾ ਨੇ ਕਿਹਾ ਕਿ ਸਮੱਸਿਆ ਸਬੰਧੀ ਲਿਖਤੀ ਤੌਰ ’ਤੇ ਡੀਸੀ ਨੂੰ ਜਾਣੂ ਕਰਵਾਇਆ ਜਾ ਚੁੱਕਾ ਹੈ।
ਬੱਚਿਆਂ ਦੀ ਮੁਸ਼ਕਲ ਦਾ ਹੱਲ ਕਰਾਂਗੇ: ਡੀਈਓ
ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਸੰਜੀਵ ਕੁਮਾਰ ਗੌਤਮ ਨੇ ਕਿਹਾ ਕਿ ਰੇਲਵੇ ਲਾਈਨ ਰਾਹੀਂ ਬੱਚਿਆਂ ਦਾ ਲੰਘਣਾ ਖ਼ਤਰਨਾਕ ਹੈ, ਇਸ ਸਮੱਸਿਆ ਦਾ ਜਲਦੀ ਹੀ ਹੱਲ ਕੀਤਾ ਜਾਵੇਗਾ।