ਨਸ਼ਾ ਤਸਕਰ ਐੱਸਯੂਵੀ ’ਚ 1.60 ਕੁਇੰਟਲ ਪੋਸਤ ਛੱਡ ਕੇ ਫ਼ਰਾਰ

ਪੱਤਰ ਪ੍ਰੇਰਕ
ਲੰਬੀ, 20 ਜਨਵਰੀ
ਤੱਪਾਖੇੜਾ ਨੇੜੇ ਮਹਿੰਦਰਾ 500 ਐੱਸਯੂਵੀ ਗੱਡੀ ਦਾ ਟਾਇਰ ਪੰਕਚਰ ਹੋਣ ਦੀ ਬੇਵੱਸੀ ਵਿੱਚ ਤਸਕਰ ਗੱਡੀ ਅਤੇ ਉਸ ਵਿੱਚ ਲੱਦਿਆ 1.60 ਕੁਇੰਟਲ ਚੂਰਾ ਪੋਸਤ ਛੱਡ ਕੇ ਫ਼ਰਾਰ ਹੋ ਗਏ। ਲੰਬੀ ਪੁਲੀਸ ਨੇ ਗੱਡੀ ਅਤੇ ਪੋਸਤ ਦੀ ਉਕਤ ਖੇਪ ਨੂੰ ਬਰਾਮਦ ਕੀਤਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਰਾਤ ਸਮੇਂ ਤੱਪਾਖੇੜਾ ਨੇੜੇ ਮਹਿੰਦਰਾ ਗੱਡੀ ਦਾ ਪਿਛਲਾ ਬੰਪਰ ਆਦਿ ਕਿਸੇ ਗੱਡੀ ਨਾਲ ਖਹਿਣ ਕਾਰਨ ਨੁਕਸਾਨਿਆ ਗਿਆ ਸੀ ਜਿਸਦਾ ਟਾਇਰ ਪੰਕਚਰ ਹੋ ਗਿਆ। ਥਾਣਾ ਮੁਖੀ ਰਵਿੰਦਰ ਕੁਮਾਰ ਨੇ ਦੱਸਿਆ ਕਿ ਤਸਕਰਾਂ ਨੇ ਕਰੀਬ ਡੇਢ ਦੋ ਕਿਲੋਮੀਟਰ ਤੱਕ ਪੰਕਚਰ ਹਾਲਤ ’ਚ ਗੱਡੀ ਨੂੰ ਖੂਬ ਦੌੜਾਇਆ, ਪਰ ਆਖ਼ਰ ਪੁਲੀਸ ਟੀਮ ਪਿੱਛੇ ਲੱਗਣ ਕਰਕੇ ਬੇਵੱਸੀ ਵਿੱਚ ਗੱਡੀ ਖੜ੍ਹੀ ਕਰ ਕੇ ਦੌੜ ਗਏ। ਉਨ੍ਹਾਂ ਕਿਹਾ ਕਿ ਅਛਪਛਾਤੇ ਵਿਅਕਤੀਆਂ ਖਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ।