ਨਸ਼ਾ ਤਸਕਰ 3 ਕਿਲੋ ਚਰਸ ਸਣੇ ਕਾਬੂ

ਪੱਤਰ ਪ੍ਰੇਰਕ
ਪਠਾਨਕੋਟ, 11 ਨਵੰਬਰ
ਇੱਥੋਂ ਨੇੜਲੀ ਸਬ-ਡਿਵੀਜ਼ਨ ਇੰਦੌਰਾ ਦੀ ਪੁਲੀਸ ਨੇ ਤਿੰਨ ਅੰਤਰਰਾਜੀ ਨਸ਼ਾ ਤਸਕਰਾਂ ਨੂੰ 3 ਕਿਲੋ 20 ਗਰਾਮ ਚਰਸ ਸਮੇਤ ਕਾਬੂ ਕੀਤਾ ਹੈ। ਪੁਲੀਸ ਨੇ ਇਨ੍ਹਾਂ ਮੁਲਜ਼ਮਾਂ ਨੂੰ ਪਠਾਨਕੋਟ-ਜਲੰਧਰ ਨੈਸ਼ਨਲ ਹਾਈਵੇਅ ’ਤੇ ਸਥਿਤ ਡਮਟਾਲ ’ਚ ਸਾਈਬਰ ਕੈਫੇ ਨੇੜਿਉਂ ਨਸ਼ਾ ਤਸਕਰੀ ਦੇ ਦੋਸ਼ਾਂ ਹੇਠ ਕਾਬੂ ਕੀਤਾ ਹੈ। ਐੱਸਪੀ ਨੂਰਪੁਰ ਅਸ਼ੋਕ ਰਤਨ ਨੇ ਦੱਸਿਆ ਕਿ ਮੁਲਜ਼ਮਾਂ ਦੀ ਪਛਾਣ ਕਰਨਪ੍ਰੀਤ ਸਿੰਘ ਵਾਸੀ ਪਿੰਡ ਚੰਗੀ, ਜ਼ਿਲ੍ਹਾ ਕਠੂਆ (ਜੰਮੂ), ਵਿਸ਼ਾਲ ਕੁਮਾਰ ਵਾਸੀ ਸਮਲਾਣਾ, ਜ਼ਿਲ੍ਹਾ ਕਾਂਗੜਾ ਅਤੇ ਸਾਹਿਲ ਕੁਮਾਰ ਵਾਸੀ ਪਿੰਡ ਚੱਕ ਦੇਸਾ, ਜ਼ਿਲ੍ਹਾ ਕਠੂਆ (ਜੰਮੂ) ਵਜੋਂ ਹੋਈ।