‘ਡ੍ਰੀਮ ਗਰਲ 2’ ਦਾ ਪਹਿਲਾ ਗੀਤ ‘ਦਿਲ ਕਾ ਟੈਲੀਫੋਨ 2.0’ ਰਿਲੀਜ਼

ਮੁੰਬਈ: ਕਾਮੇਡੀ ਫਿਲਮ ‘ਡ੍ਰੀਮ ਗਰਲ-2’ ਦੇ ਨਿਰਮਾਤਾਵਾਂ ਨੇ ਅੱਜ ਫਿਲਮ ਦਾ ਪਹਿਲਾ ਗੀਤ ‘ਦਿਲ ਕਾ ਟੈਲੀਫੋਨ 2.0’ ਰਿਲੀਜ਼ ਕੀਤਾ ਹੈ। ਜ਼ੀ ਮਿਊਜ਼ਿਕ ਕੰਪਨੀ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ’ਤੇ ਇਹ ਗੀਤ ਸਾਂਝਾ ਕਰਦਿਆਂ ਕਿਹਾ, ‘ਆਜ ਬਜੇਗਾ ਸਬ ਕੇ ਦਿਲ ਦਾ ਟੈਲੀਫੋਨ। ਪੇਸ਼ ਹੈ ਗੀਤ ‘ਦਿਲ ਕਾ ਟੈਲੀਫੋਨ’, ‘ਡ੍ਰੀਮ ਗਰਲ-2’ 25 ਅਗਸਤ ਨੂੰ ਸਿਨੇਮਾਘਰਾਂ ਵਿੱਚ।’ ਮੀਤ ਬ੍ਰਦਰਜ਼, ਜੋਨਿਤਾ ਗਾਂਧੀ ਤੇ ਜੂਬਿਨ ਨੌਟਿਆਲ ਵੱਲੋਂ ਗਾਏ ਗਏ ਇਸ ਗੀਤ ਦੇ ਅਲਫਾਜ਼ ਕੁਮਾਰ ਵੱਲੋਂ ਲਿਖੇ ਗਏ ਹਨ। ਫਿਲਮ ਦੇ ਨਿਰਮਾਤਾਵਾਂ ਵੱਲੋਂ ਸਾਂਝੇ ਕੀਤੇ ਗਏ ਇਸ ਗੀਤ ਨੂੰ ਪ੍ਰਸ਼ੰਸਕਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ। ਅਦਾਕਾਰ ਆਯੂਸ਼ਮਾਨ ਖੁਰਾਨਾ ਤੇ ਅਦਾਕਾਰਾ ਅਨੰਨਿਆ ਪਾਂਡੇ ਇਸ ਗੀਤ ’ਤੇ ਨੱਚਦੇ ਦਿਖਾਈ ਦੇ ਰਹੇ ਹਨ। ਰਾਜ ਸਿੰਧੀਆ ਵੱਲੋਂ ਨਿਰਦੇਸ਼ਿਤ ਇਸ ਫ਼ਿਲਮ ਦਾ ਨਿਰਮਾਣ ਏਕਤਾ ਆਰ ਕਪੂਰ ਵੱਲੋਂ ਕੀਤਾ ਗਿਆ ਹੈ ਤੇ ਇਹ ਫਿਲਮ 25 ਅਗਸਤ ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਕੀਤੀ ਜਾਵੇਗੀ। -ਏਐੱਨਆਈ