ਕਲਾ ਨਾਟ ਮੰਚ ਵੱਲੋਂ ਨਾਟਕ ‘ਜੂਠ’ ਦਾ ਮੰਚਨ

ਪੱਤਰ ਪ੍ਰੇਰਕ
ਅੰਮ੍ਰਿਤਸਰ, 20 ਅਕਤੂਬਰ
ਪੰਜਾਬ ਨਾਟਸ਼ਾਲਾ ਵਿੱਚ ਕਲਾ ਨਾਟ ਮੰਚ ਵੱਲੋਂ ਬਲਰਾਮ ਦੇ ਲਿਖੇ ਅਤੇ ਮਾਸਟਰ ਕੁਲਜੀਤ ਵੱਲੋਂ ਨਿਰਦੇਸ਼ਤ ਨਾਟਕ ‘ਜੂਠ’ ਦਾ ਮੰਚਨ ਹੋਇਆ। ਇਹ ਨਾਟਕ ਓਮਪ੍ਰਕਾਸ਼ ਵਾਲਮੀਕੀ ਦੇ ਜੀਵਨ ’ਤੇ ਅਧਾਰਿਤ ਅਤੇ ਉਸ ਤੋਂ ਪ੍ਰੇਰਿਤ ਹੈ। ਇਸ ਦੀ ਕਹਾਣੀ ਪੱਖਪਾਤੀ ਵਿਤਕਰੇ ਅਤੇ ਅਦੁੱਤੀ ਮਨੁੱਖੀ ਭਾਵਨਾ ਦੇ ਵਿਸ਼ਿਆਂ ਦੀ ਪੜਚੋਲ ਕਰਦੀ ਹੈ। ਭਾਰਤ ਦੇ ਅਛੂਤ ਸਦੀਆਂ ਤੋਂ ਜੂਠ ਨੂੰ ਸਵੀਕਾਰ ਕਰਨ ਅਤੇ ਖਾਣ ਲਈ ਮਜਬੂਰ ਹਨ। ਲੇਖਕ ਨੇ ਆਪਣੇ ਔਖੇ ਬਚਪਨ ਤੋਂ ਲੈ ਕੇ ਉਸ ਬਿਮਾਰੀ ਤੱਕ ਦੇ ਜੀਵਨ ਦਾ ਵਰਣਨ ਕੀਤਾ ਹੈ, ਜਿਸ ਕਾਰਨ ਉਸ ਦੀ ਮੌਤ ਹੋਈ। ਰੋਜ਼ਾਨਾ ਜੀਵਨ ਦੇ ਵਿਸਤ੍ਰਿਤ ਵਰਨਣ ਰਾਹੀਂ ਜੂਠ ਭਾਰਤੀ ਸਮਾਜ ਦੀ ਤਸਵੀਰ ਪੇਸ਼ ਕਰਦੀ ਹੈ ਕਿ ਕਿਵੇਂ ਭਾਰਤੀ ਸੰਵਿਧਾਨ ’ਚ ਵਰਜਿਤ ਹੋਣ ਦੇ ਬਾਵਜੂਦ ਜਾਤ ਪ੍ਰਣਾਲੀ ਦੇ ਆਧਾਰ ’ਤੇ ਵਿਤਕਰਾ ਕਾਇਮ ਰਿਹਾ ਅਤੇ ਆਧੁਨਿਕ ਭਾਰਤੀ ਸਮਾਜ ਦੇ ਇੱਕ ਵੱਡੇ ਹਿੱਸੇ ’ਤੇ ਇਸਦਾ ਆਰਥਿਕ ਅਤੇ ਨੈਤਿਕ ਪ੍ਰਭਾਵ ਸੀ। ਜੂਠ ਨੇ ਜਾਤ ਪ੍ਰਣਾਲੀ ਤੋਂ ਬਚਣ ਲਈ ਪ੍ਰਭਾਵਿਤ ਆਬਾਦੀ ਦੇ ਯਤਨਾਂ ਅਤੇ ਪਰਿਵਾਰਕ ਖੇਤਰ ਅੰਦਰ ਇਸ ਨਾਲ ਪੈਦਾ ਹੋਣ ਵਾਲੇ ਤਣਾਅ ਦਾ ਵੀ ਵਰਨਣ ਕੀਤਾ ਹੈ। ਨਾਟਕ ਵਿੱਚ ਡਾ. ਜਸਮੀਤ ਆਜ਼ਾਦ ਨੇ ਸ਼ਾਨਦਾਰ ਭੂਮਿਕਾ ਨਿਭਾਈ। ਅਖੀਰ ਵਿੱਚ ਨਾਟਸ਼ਾਲਾ ਸੰਸਥਾ ਵੱਲੋਂ ਸ਼੍ਰੋਮਣੀ ਨਾਟਕਕਾਰ ਜਤਿੰਦਰ ਬਰਾੜ ਨੇ ਨਾਟਕ ਕਰਨ ਵਾਲੇ ਕਲਾਕਾਰਾਂ ਨੂੰ ਸਰਟੀਫਿਕੇਟ ਦੇ ਕੇ ਸਨਮਾਨਿਤ ਕੀਤਾ।