ਡਾ. ਅੰਸ਼ੂ ਸ਼ਰਮਾ ਨੂੰ ਸਰਬੋਤਮ ਪੌਲੀਟੈਕਨਿਕ ਅਧਿਆਪਕ ਪੁਰਸਕਾਰ

ਖਰੜ:

ਜੀਪੀਸੀ ਖੂਨੀਮਾਜਰਾ ਵਿੱਚ ਇਲੈਕਟ੍ਰੀਕਲ ਇੰਜਨੀਅਰਿੰਗ ਦੇ ਮੁਖੀ ਡਾ. ਅੰਸ਼ੂ ਸ਼ਰਮਾ ਨੂੰ ਇੰਡੀਅਨ ਸੁਸਾਇਟੀ ਫਾਰ ਟੈਕਨੀਕਲ ਐਜੂਕੇਸਨ (ਆਈਐੱਸਟੀਈ) ਵੱਲੋਂ ਪੰਜਾਬ ਰਾਜ 2023 ਲਈ ਸਰਬੋਤਮ ਪੌਲੀਟੈਕਨਿਕ ਅਧਿਆਪਕ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ ਹੈ। ਇਸ ਸਬੰਧੀ ਸਮਾਰੋਹ 53ਵੀਂ ਸਾਲਾਨਾ ਕੌਮੀ ਫੈਕਲਟੀ ਕਨਵੈਨਸ਼ਨ ਦੌਰਾਨ ਹੋਇਆ, ਜਿੱਥੇ ਡਾ. ਸ਼ਰਮਾ ਨੂੰ ਤਕਨੀਕੀ ਸਿੱਖਿਆ ਵਿੱਚ ਉਨ੍ਹਾਂ ਦੇ ਯੋਗਦਾਨ ਲਈ ਮਾਨਤਾ ਦਿੱਤੀ ਗਈ। ਪਹਿਲਾਂ, ਉਨ੍ਹਾਂ ਨੂੰ ਬੰਦਰ ਭਜਾਉਣ ਵਾਲੇ ਯੰਤਰ ਲਈ ਇੱਕ ਪੇਟੈਂਟ ਮਿਲਿਆ ਸੀ। ਡਾ. ਸ਼ਰਮਾ ਨੇ ਧੰਨਵਾਦ ਕਰਦਿਆਂ ਇਸ ਪੁਰਸਕਾਰ ਦਾ ਸਿਹਰਾ ਜੀਪੀਸੀ ਖੂਨੀਮਾਜਰਾ ਦੇ ਆਪਣੇ ਵਿਭਾਗ ਸਿਰ ਬੰਨ੍ਹਿਆ। ਉਨ੍ਹਾਂ ਸੰਸਥਾ ਵਿੱਚ ਸਕਾਰਾਤਮਕ ਮਾਹੌਲ ਪੈਦਾ ਕਰਨ ਅਤੇ ਲਗਾਤਾਰ ਨਵੀਨਤਾ ਨੂੰ ਉਤਸ਼ਾਹਿਤ ਕਰਨ ਲਈ ਪ੍ਰਿੰਸੀਪਲ ਰਾਜੀਵ ਪੁਰੀ ਦਾ ਧੰਨਵਾਦ ਕੀਤਾ। -ਪੱਤਰ ਪ੍ਰੇਰਕ