ਡੋਰ ਕਾਰਨ ਸੈਂਕੜੇ ਪੰਛੀ ਜ਼ਖ਼ਮੀ

ਪੱਤਰ ਪੇ੍ਰਕ
ਨਵੀਂ ਦਿੱਲੀ, 18 ਅਗਸਤ

ਦਿੱਲੀ ਵਿਖੇ ਬੀਤੇ ਦਿਨੀਂ ਪਤੰਗਬਾਜ਼ੀ ਦੇ ਚੱਲੇ ਦੌਰ ਦੌਰਾਨ ਕੌਮੀ ਰਾਜਧਾਨੀ ਦਿੱਲੀ ਦੇ ਪੰਛੀ ਖ਼ਾਸ ਕਰ ਕੇ ਕਬਤੂਰ ਗੁੱਡੀਆਂ ਦੀ ਡੋਰ ਕਾਰਨ ਜ਼ਖ਼ਮੀ ਹੋਏ ਹਨ। ਅਜਿਹੇ ਪੰਛੀਆਂ ਦਾ ਇਲਾਜ ਕਰਨ ਵਾਲੇ ਡਾਕਟਰਾਂ ਮੁਤਾਬਕ ਹਰ ਸੀਜ਼ਨ ਦੌਰਾਨ ਹੀ 15 ਅਗਸਤ ਦੇ ਆਸ-ਪਾਸ ਕਰੀਬ ਦੋ ਹਜ਼ਾਰ ਪੰਛੀ ਡੋਰਾਂ ਵਿੱਚ ਫਸ ਕੇ ਗੰਭੀਰ ਜ਼ਖ਼ਮੀ ਹੋ ਜਾਂਦੇ ਹਨ। ਚਾਂਦਨੀ ਚੌਕ ਵਿਖੇ ਪੰਛੀਆਂ ਦੇ ਪੁਰਾਣੇ ਹਸਪਤਾਲ ਵਿੱਚ 1500 ਤੋਂ ਵੱਧ ਅਜਿਹੇ ਪੰਛੀਆਂ ਦਾ ਇਲਾਜ ਕੀਤਾ ਗਿਆ ਜੋ ਆਜ਼ਾਦੀ ਦਿਹਾੜੇ ਨੇੜੇ ਡੋਰ ਵਿੱਚ ਫਸ ਕੇ ਜ਼ਖ਼ਮੀ ਹੋਏ ਹਨ।

ਪੁਰਾਣੀ ਦਿੱਲੀ ਅੰਦਰ ਆਜ਼ਾਦੀ ਦਿਵਸ ਦੇ ਨੇੜੇ ਜੰਮ ਕੇ ਪਤੰਗਬਾਜ਼ੀ ਮੁਕਾਬਲੇ ਹੁੰਦੇ ਹਨ ਤੇ ਰਵਾਇਤੀ ਪਤੰਗਬਾਜ਼ ਹਿੱਸਾ ਲੈਂਦੇ ਹਨ। ਚਾਂਦਨੀ ਚੌਕ ਦੇ ਉਕਤ ਹਸਪਤਾਲ ਦੇ ਮੈਨੇਜਰ ਸੁਨੀਲ ਜੈਨ ਮੁਤਾਬਕ 1 ਅਗਸਤ ਤੋਂ 17 ਅਗਸਤ ਦੌਰਾਨ 1500 ਦੇ ਕਰੀਬ ਪੰਛੀ ਡੋਰ ਕਾਰਨ ਜ਼ਖ਼ਮੀ ਹੋਣ ਕਰਕੇ ਉੱਥੇ ਲਿਆਂਦੇ ਗਏ ਹਨ ਹਾਲਾਂ ਕਿ ਬੀਤੇ ਸਾਲ ਕਰੀਬ 700 ਜ਼ਖ਼ਮੀ ਪੰਛੀ ਇੱਥੇ ਪੁੱਜੇ ਸਨ। 500 ਤੋਂ ਵੱਧ ਪੰਛੀ ਡੋਰ ਕਾਰਨ ਜ਼ਖ਼ਮੀ ਹੋਣ ਕਰ ਕੇ ਸੰਜੇ ਗਾਂਧੀ ਪਸ਼ੂ ਸਾਂਭ ਕੇਂਦਰ ਵਿਖੇ ਵੀ ਭੇਜੇ ਗਏ। ਇਨ੍ਹਾਂ ਜ਼ਖ਼ਮੀਆਂ ਵਿੱਚੋਂ ਕਈ ਮਰ ਗਏ ਤੇ ਕਈ ਜੀਣ ਲਈ ਸ਼ੰਘਰਸ ਕਰ ਰਹੇ ਹਨ।

ਉਧਰ ਦਿੱਲੀ ਪੁਲੀਸ ਵੱਲੋਂ ਪੁਰਾਣੀ ਦਿੱਲੀ ਦੇ ਬਾਜ਼ਾਰ ਵਿੱਚ ਛਾਪੇ ਮਾਰ ਕੇ 15-20 ਦੁਕਾਨਾਂ ਦੀ ਜਾਂਚ ਕੀਤੀ ਗਈ ਸੀ ਤੇ ਕਰੀਬ ਅੱਧੀ ਦਰਜਨ ਲੋਕਾਂ ਖ਼ਿਲਾਫ਼ ਮਾਮਲੇ ਦਰਜ ਕੀਤੇ ਹਨ। ਫਿਰ ਵੀ ਦਿੱਲੀ ਵਿੱਚ ਡੋਰ ਦੀ ਵਿਕਰੀ ਚੋਰੀ ਛੁਪੇ ਜਾਰੀ ਰਹੀ।