ਧਰਮਿੰਦਰ ਵੱਲੋਂ ਸ਼ਾਹਰੁਖ ਨੂੰ ‘ਜਵਾਨ’ ਦੀ ਸਫ਼ਲਤਾ ਲਈ ਸ਼ੁਭ ਕਾਮਨਾਵਾਂ

ਮੁੰਬਈ: ਬੌਲੀਵੁੱਡ ਅਦਾਕਾਰ ਧਰਮਿੰਦਰ ਨੇ ਸ਼ਾਹਰੁਖ ਖਾਨ ਨਾਲ ਇੱਕ ਪੁਰਾਣੀ ਤਸਵੀਰ ਸਾਂਝੀ ਕੀਤੀ ਤੇ ਉਨ੍ਹਾਂ ਨੂੰ ਆਉਣ ਵਾਲੀ ਫ਼ਿਲਮ ‘ਜਵਾਨ’ ਦੀ ਸਫ਼ਲਤਾ ਲਈ ਸ਼ੁਭ ਕਾਮਨਾਵਾਂ ਦਿੱਤੀਆਂ ਹਨ। ਇਹ ਫਿਲਮ ਭਲਕੇ 7 ਸਤੰਬਰ ਨੂੰ ਸਿਨੇਮਾ ਘਰਾਂ ’ਚ ਰਿਲੀਜ਼ ਹੋਵੇਗੀ। ਧਰਮਿੰਦਰ ਨੇ ਇੰਸਟਾਗ੍ਰਾਮ ’ਤੇ ਤਸਵੀਰ ਸਾਂਝੀ ਕਰਦਿਆਂ ਕਿਹਾ, ‘‘ਸ਼ਾਹਰੁਖ ਬੇਟੇ ‘ਜਵਾਨ’ ਲਈ ਸ਼ੁਭਕਾਮਨਾਵਾਂ।’’ ਇਸ ਪੋਸਟ ’ਤੇ ਅਦਾਕਾਰ ਸਨੀ ਦਿਓਲ ਨੇ ਦਿਲ ਵਾਲੇ ਓਮੋਜੀ ਨਾਲ ਸਾਂਝੇ ਕੀਤੇ ਹਨ। ਜ਼ਿਕਰਯੋਗ ਹੈ ਕਿ ‘ਪਠਾਨ’ ਤੋਂ ਬਾਅਦ ‘ਜਵਾਨ’ ਦੇਖਣ ਲਈ ਸ਼ਾਹਰੁਖ ਦੇ ਪ੍ਰਸ਼ੰਸਕਾਂ ’ਚ ਕਾਫ਼ੀ ਉਤਸ਼ਾਹ ਹੈ ਤੇ ਉਹ ਇਸ ਫਿਲਮ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ। ਹਾਲ ਹੀ ’ਚ ਪ੍ਰਸ਼ੰਸਕਾਂ ਨੇ ਐਸਆਰਕੇ ਦੇ ਮੁੰਬਈ ਸਥਿਤ ਬੰਗਲੇ ‘ਮੰਨਤ’ ਅੱਗੇ ਉਨ੍ਹਾਂ ਦੇ ਗੀਤਾਂ ’ਤੇ ਨੱਚ ਕੇ ਅਦਾਕਾਰ ਲਈ ਪਿਆਰ ਜ਼ਾਹਿਰ ਕੀਤਾ ਸੀ। ਫਿਲਮ ਦੇ ਟਰੇਲਰ ’ਚ ਸ਼ਾਹਰੁਖ ਖਾਨ ਨੂੰ ਇਕ ਰੇਲਗੱਡੀ ਹਾਈਜੈਕ ਕਰਦੇ ਦੇਖਿਆ ਜਾ ਸਕਦਾ ਹੈ। ਟਰੇਲਰ ’ਚ ਅਦਾਕਾਰਾ ਦੀਪਿਕਾ ਪਾਦੂਕੋਨ, ਸਾਨਿਆ ਮਲਹੋਤਰਾ, ਸੁਨੀਲ ਗਰੋਵਰ ਤੇ ਰਿਧੀ ਡੋਗਰਾ ਵੀ ਐਕਸ਼ਨ ਕਰਦੀ ਦਿਖਾਈ ਦੇ ਰਹੀ ਹੈ। -ਏਐਨਆਈ