ਛੁੱਟੀ ਆਏ ਨਾਇਬ ਸੂਬੇਦਾਰ ਦੀ ਨਹਿਰ ਵਿੱਚ ਡੁੱਬਣ ਕਾਰਨ ਮੌਤ

ਪੱਤਰ ਪ੍ਰੇਰਕ
ਟੋਹਾਣਾ, 2 ਜੂਨ
ਇਥੋਂ ਦੇ ਪਿੰਡ ਹੰਸੇਵਾਲਾ ਦਾ ਫੌਜੀ ਨਾਇਬ ਸੂਬੇਦਾਰ ਮਨਜੀਤ ਸਿੰਘ ਦੀ ਪਿੰਡ ਕੋਲੋਂ ਲੰਘਦੀ ਨਹਿਰ ਵਿੱਚ ਡੁੱਬਣ ਕਾਰਨ ਮੌਤ ਹੋ ਗਈ। ਮਨਜੀਤ ਸਿੰਘ ਖੇਡ ਕੋਟੇ ’ਚ ਭਰਤੀ ਹੋਇਆ ਸੀ ਅਤੇ ਭਾਰਤੀ ਫੌਜ ਦੀ 338 ਮੀਡੀਅਮ ਬਟਾਲੀਅਨ ਆਰਟੀ ਜੰਮੂ ਵਿੱਚ ਤਾਇਨਾਤ ਸੀ। ਵੀਰਵਾਰ ਨੂੰ ਮਨਜੀਤ ਸਿੰਘ ਛੁੱਟੀ ਲੈ ਕੇ ਘਰ ਪੁੱਜਾ ਤਾਂ ਦੁਪਹਿਰ ਵੇਲੇ ਦੋਸਤਾਂ ਨਾਲ ਨਹਿਰ ਕੋਲ ਚਲਾ ਗਿਆ। ਇਸ ਦੌਰਾਨ ਪੈਰ ਤਿਲਕਣ ਕਾਰਨ ਉਸ ਦਾ ਇੱਕ ਦੋਸਤ ਨਹਿਰ ਵਿੱਚ ਜਾ ਡਿੱਗਾ। ਦੋਸਤ ਨੂੰ ਬਚਾਉਣ ਲਈ ਮਨਜੀਤ ਨੇ ਵੀ ਨਹਿਰ ਵਿੱਚ ਛਾਲ ਮਾਰ ਦਿੱਤੀ। ਕੁੱਝ ਸਮਾਂ ਮਗਰੋਂ ਉਹ ਪਾਣੀ ਦੇ ਤੇਜ਼ ਵਹਾਅ ਵਿੱਚ ਵਹਿ ਗਿਆ। ਪੁਲੀਸ ਨੇ ਅੱਜ ਕਾਜਲਹੇੜੀ ਹੈੜ ਤੋਂ ਲਾਸ਼ ਬਰਾਮਦ ਕਰ ਕੇ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਭੇਜ ਦਿੱਤੀ ਹੈ।