ਰੈਲੀ ’ਚ ਗਰੀਬ ਵਰਗਾਂ ਦੀਆਂ ਮੰਗਾਂ ਉਭਾਰੀਆਂ

ਪੱਤਰ ਪ੍ਰੇਰਕ
ਤਰਨ ਤਾਰਨ, 28 ਅਗਸਤ
ਭਾਰਤੀ ਮਾਰਕਸਵਾਦੀ ਇਨਕਲਾਬੀ ਪਾਰਟੀ (ਆਰਐੱਮਪੀਆਈ) ਵੱਲੋਂ ਅੱਜ ਇਲਾਕੇ ਦੇ ਪਿੰਡ ਚੂਸਲੇਵੜ੍ਹ ਵਿੱਚ ਗਰੀਬ ਵਰਗਾਂ ਦੀਆਂ ਮੰਗਾਂ ਨੂੰ ਲੈ ਕੇ ਰੈਲੀ ਕੀਤੀ ਅਤੇ ਸਰਕਾਰ ਵੱਲੋਂ ਲੋਕਾਂ ਦੇ ਮਸਲਿਆਂ ਵੱਲ ਧਿਆਨ ਨਾ ਦੇਣ ਖਿਲਾਫ਼ ਤਿੱਖੇ ਰੋਹ ਦਾ ਪ੍ਰਗਟਾਵਾ ਕੀਤਾ| ਪਾਰਟੀ ਆਗੂ ਨਾਜਰ ਮਸੀਹ ਦੀ ਅਗਵਾਈ ਹੇਠ ਰੈਲੀ ’ਚ ਕਾਮਰੇਡ ਹਰਭਜਨ ਚੂਸਲੇਵੜ ਤੇ ਧਰਮ ਸਿੰਘ ਪੱਟੀ ਨੇ ਸਰਕਾਰ ਦੀ ਕਥਿਤ ਨਿਕੰਮੀ ਕਾਰਗੁਜ਼ਾਰੀ ਕਰਕੇ ਦਿਨ-ਦਿਹਾੜੇ ਲੁੱਟਾਂ ਖੋਹਾਂ ਕੀਤੇ ਜਾਣ ਅਤੇ ਨਸ਼ਿਆਂ ਨਾਲ ਨੌਜਵਾਨਾਂ ਦੀਆਂ ਮੌਤਾਂ ’ਤੇ ਚਿੰਤਾ ਜ਼ਾਹਿਰ ਕੀਤੀ। ਉਨ੍ਹਾਂ ਦੋਸ਼ ਲਾਇਆ ਕਿ ਖੱਬੀਆਂ ਧਿਰਾਂ ਵਲੋਂ ਸੰਘਰਸ਼ ਕਰਕੇ ਗ਼ਰੀਬਾਂ ਲੋਕਾਂ ਲਈ ਮੁਫਤ ਅਨਾਜ ਅਤੇ ਮਨਰੇਗਾ ਸਕੀਮ ਤਹਿਤ ਮਿਲਦੀਆਂ ਸਹੂਲਤਾਂ ਵਿੱਚ ਹਾਕਮ ਧਿਰ ਵਲੋਂ ਸ਼ਰੇਆਮ ਧਾਂਦਲੀਆਂ ਕੀਤੀਆਂ ਜਾ ਰਹੀਆਂ ਹਨ। ਰੈਲੀ ਦੌਰਾਨ ਚੁਸਲੇਵੜ੍ਹ ਵਾਸੀਆਂ ਨੇ ਕਿਹਾ ਕਿ ਉਨ੍ਹਾਂ ਦੇ ਪਿੰਡ ਦੀ ਜ਼ਮੀਨ ਵਿੱਚ ਸੋਮਾ ਕੰਪਨੀ ਵਲੋਂ ਬਣਾਏ ਗੁਦਾਮਾਂ ਵਿੱਚੋਂ ਨਿਕਲਦੀ ਸੁਸਰੀ ਨੇ ਪਿੰਡ ਸਣੇ ਨੇੜੇ ਦੇ ਹੋਰ ਪਿੰਡਾਂ ਦੇ ਲੋਕਾਂ ਦਾ ਜਿਊਣਾ ਹਰਾਮ ਕਰਕੇ ਰੱਖ ਦਿੱਤਾ ਹੈ। ਆਗੂਆਂ ਨੇ ਕਿਸਾਨਾਂ-ਮਜ਼ਦੂਰਾਂ ਦੇ ਕਰਜ਼ੇ ਮੁਆਫ਼ ਕਰਨ, ਲੋੜਵੰਦ ਪਰਿਵਾਰਾਂ ਨੂੰ ਪਲਾਟ ਦੇਣ, ਰਾਸ਼ਨ ਕਾਰਡਾਂ ਤੇ ਪੂਰਾ ਰਾਸ਼ਣ ਦੇਣ, ਮਨਰੇਗਾ ਸਕੀਮ ਅਧੀਨ ਲੋਕਾਂ ਨੂੰ ਕੰਮ ਦੇਣ ਦੀ ਵੀ ਮੰਗ ਕੀਤੀ|