ਡੇਂਗੂ ਕਾਰਨ ਆਸ਼ਾ ਫੈਸਿਲੀਟੇਟਰ ਦੀ ਮੌਤ

ਪੱਤਰ ਪ੍ਰੇਰਕ
ਬਨੂੜ, 11 ਨਵੰਬਰ
ਬਨੂੜ ਖੇਤਰ ਦੇ ਪਿੰਡ ਢੇਲਪੁਰ ਵਿੱਚ ਸਿਹਤ ਵਿਭਾਗ ਅਧੀਨ ਕੰਮ ਕਰਦੀ 48 ਸਾਲਾ ਆਸ਼ਾ ਫੈਸਿਲੀਟੇਟਰ ਦੀ ਡੇਂਗੂ ਕਾਰਨ ਮੌਤ ਹੋ ਗਈ ਹੈ। ਮ੍ਰਿਤਕਾ ਦੋ ਬੱਚਿਆਂ ਦੀ ਮਾਂ ਸੀ। ਜਾਣਕਾਰੀ ਅਨੁਸਾਰ ਆਸ਼ਾ ਫੈਸਿਲੀਟੇਟਰ ਕਿਰਨਦੀਪ ਕੌਰ ਨੂੰ 6 ਨਵੰਬਰ ਨੂੰ ਬੁਖਾਰ ਹੋਇਆ ਸੀ। ਉਨ੍ਹਾਂ ਸਥਾਨਕ ਡਾਕਟਰ ਤੋਂ ਦਵਾਈ ਲਈ ਤੇ ਟੈਸਟ ਕਰਾਏ ਤਾਂ ਪਲੇਟਲੈਟਸ 45 ਹਜ਼ਾਰ ਆਏ। ਉਸੇ ਦਿਨ ਉਹ ਮੁਹਾਲੀ ਦੇ ਫੇਜ਼ ਛੇ ਦੇ ਸਰਕਾਰੀ ਹਸਪਤਾਲ ਵਿਚ ਦਾਖ਼ਲ ਹੋ ਗਏ। ਟੈਸਟ ’ਚ ਉਨ੍ਹਾਂ ਦਾ ਡੇਂਗੂ ਪਾਜ਼ੇਟਿਵ ਆਇਆ। ਕੋਈ ਫ਼ਰਕ ਨਾ ਪੈਣ ’ਤੇ ਉਨ੍ਹਾਂ ਨੂੰ ਸੈਕਟਰ 32 ਦੇ ਹਸਪਤਾਲ ਲਈ ਰੈਫ਼ਰ ਕੀਤਾ ਗਿਆ। ਉਨ੍ਹਾਂ ਨੂੰ ਖਰੜ ਦੇ ਪ੍ਰਾਈਵੇਟ ਹਸਪਤਾਲ ਵਿੱਚ ਲਿਜਾਇਆ ਗਿਆ। ਉਨ੍ਹਾਂ ਨੂੰ 8 ਨੂੰ ਮੁਹਾਲੀ ਦੇ ਇੱਕ ਪ੍ਰਾਈਵੇਟ ਹਸਪਤਾਲ ’ਚ ਲਿਆਂਦਾ ਗਿਆ ਤੇ 10 ਨੂੰ ਪੀਜੀਆਈ ਲਿਜਾਇਆ ਗਿਆ ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ।