ਕੈਨੇਡਾ ’ਚ ਝੀਲ ’ਚ ਡੁੱਬਣ ਕਾਰਨ ਕਲਾਨੌਰ ਦੇ ਨੌਜਵਾਨ ਦੀ ਮੌਤ

ਨਿੱਜੀ ਪੱਤਰ ਪ੍ਰੇਰਕ
ਗੁਰਦਾਸਪੁਰ, 4 ਨਵੰਬਰ
ਸਰਹੱਦੀ ਕਸਬਾ ਕਲਾਨੌਰ ਦੇ ਨੌਜਵਾਨ ਜ਼ੋਰਾਵਰ ਸਿੰਘ ਦੀ ਕੈਨੇਡਾ ਵਿੱਚ ਭੇਤਭਰੀ ਹਾਲਤ ਵਿੱਚ ਝੀਲ ’ਚ ਡੁੱਬਣ ਕਾਰਨ ਮੌਤ ਹੋ ਗਈ। ਜ਼ੋਰਾਵਰ ਸਿੰਘ ਉਰਫ਼ ਬੱਬੂ (23) ਦੇ ਪਿਤਾ ਮਨੋਹਰ ਸਿੰਘ ਨੇ ਦੱਸਿਆ ਕਿ ਕਰੀਬ ਤਿੰਨ ਸਾਲ ਪਹਿਲਾਂ ਉਹ ਕੈਨੇਡਾ ਗਿਆ ਸੀ। ਮਗਰੋਂ ਬੱਬੂ ਦਾ ਵੱਡਾ ਭਰਾ ਵੀ ਕੈਨੇਡਾ ਚਲੇ ਗਿਆ। ਦੋਵੇਂ ਭਰਾ ਵੱਖ-ਵੱਖ ਸ਼ਿਫ਼ਟਾਂ ਵਿੱਚ ਇੱਕੋ ਕੰਪਨੀ ਵਿੱਚ ਕੰਮ ਕਰਦੇ ਸਨ। ਬੀਤੀ ਸਵੇਰ ਉਹ ਆਪਣੀ ਕਾਰ ’ਤੇ ਘਰੋਂ ਗਿਆ ਸੀ ਪਰ ਫ਼ੈਕਟਰੀ ਨਾ ਪੁੱਜਿਆ। ਉਸ ਦੇ ਵੱਡੇ ਭਰਾ ਨੂੰ ਕੰਪਨੀ ਤੋਂ ਫ਼ੋਨ ਆਉਣੇ ਸ਼ੁਰੂ ਹੋ ਗਏ। ਭਾਲ ਕਰਨ ’ਤੇ ਫ਼ੈਕਟਰੀ ਨੂੰ ਜਾਂਦੇ ਰਸਤੇ ’ਤੇ ਜ਼ੋਰਾਵਰ ਸਿੰਘ ਦੀ ਕਾਰ ਮਿਲੀ ਅਤੇ ਨੇੜੇ ਝੀਲ ਵਿੱਚੋਂ ਉਸ ਦੀ ਲਾਸ਼ ਬਰਾਮਦ ਹੋਈ। ਪਰਿਵਾਰਕ ਮੈਂਬਰਾਂ ਨੇ ਕੇਂਦਰ ਅਤੇ ਪੰਜਾਬ ਸਰਕਾਰ ਨੂੰ ਲਾਸ਼ ਭਾਰਤ ਲਿਆਉਣ ਦੀ ਅਪੀਲ ਕੀਤੀ ਹੈ।