ਕਬੱਡੀ ਟੂਰਨਾਮੈਂਟ ਵਿੱਚ ਕੋਰਟ ਟੋਡਰ ਮੱਲ ਦੀ ਟੀਮ ਜੇਤੂ

ਪਠਾਨਕੋਟ: ਸੁਜਾਨਪੁਰ ਮੁਹੱਲਾ ਕੈਲਾਸ਼ਪੁਰ ਦੇ ਖੇਡ ਮੈਦਾਨ ਵਿੱਚ ਹਿੰਦੂ-ਸਿੱਖ ਏਕਤਾ ਕਲੱਬ ਦੇ ਪ੍ਰਧਾਨ ਸਮੀਰ ਠਾਕੁਰ ਅਤੇ ਕੌਂਸਲਰ ਅਸ਼ਵਨੀ ਬੰਟੀ ਦੀ ਅਗਵਾਈ ਵਿੱਚ ਚੌਥਾ ਕਬੱਡੀ ਟੂਰਨਾਮੈਂਟ ਕਰਵਾਇਆ ਗਿਆ ਜਿਸ ਵਿੱਚ ਮੁੱਖ ਮਹਿਮਾਨ ਵਜੋਂ ਵਿਧਾਇਕ ਨਰੇਸ਼ ਪੁਰੀ ਸ਼ਾਮਲ ਹੋਏ। ਉਨ੍ਹਾਂ ਜੇਤੂ ਕਬੱਡੀ ਖਿਡਾਰੀਆਂ ਨੂੰ ਸਨਮਾਨਿਤ ਕੀਤਾ। ਹਿੰਦੂ-ਸਿੱਖ ਏਕਤਾ ਕਲੱਬ ਦੇ ਪ੍ਰਧਾਨ ਸਮੀਰ ਠਾਕੁਰ ਅਤੇ ਅਸ਼ਵਨੀ ਬੰਟੀ ਨੇ ਕਿਹਾ ਕਿ ਇਸ ਟੂਰਨਾਮੈਂਟ ਵਿੱਚ ਅੰਮ੍ਰਿਤਸਰ, ਗੁਰਦਾਸਪੁਰ, ਚੰਡੀਗੜ੍ਹ, ਜਲੰਧਰ ਤੇ ਗੁਰਦਾਸਪੁਰ ਦੇ ਖਿਡਾਰੀਆਂ ਨੇ ਭਾਗ ਲਿਆ। ਇਸ ਟੂਰਨਾਮੈਂਟ ਦੌਰਾਨ ਫਾਈਨਲ ਮੁਕਾਬਲਾ ਕੋਰਟ ਟੋਡਰ ਮੱਲ ਅਤੇ ਬਾਬਾ ਸ੍ਰੀ ਚੰਦ ਘਰੋਟਾ ਦੀਆਂ ਟੀਮਾਂ ਦਰਮਿਆਨ ਕਰਵਾਇਆ ਗਿਆ ਜਿਸ ਵਿੱਚ ਕੋਰਟ ਟੋਡਰ ਮੱਲ ਦੀ ਟੀਮ ਜੇਤੂ ਹੋ ਨਿਬੜੀ। ਵਿਧਾਇਕ ਨਰੇਸ਼ ਪੁਰੀ ਨੇ ਜੇਤੂ ਟੀਮ ਨੂੰ 31 ਹਜ਼ਾਰ ਰੁਪਏ ਇਨਾਮ ਵਜੋਂ ਦਿੱਤੇ ਜਦਕਿ ਉਪ-ਜੇਤੂ ਬਾਬਾ ਸ੍ਰੀ ਚੰਦ ਘਰੋਟਾ ਦੀ ਟੀਮ ਨੂੰ 21 ਹਜ਼ਾਰ ਰੁਪਏ ਇਨਾਮ ਵਜੋਂ ਦਿੱਤੇ ਗਏ। ਇਸ ਮੌਕੇ ਸੁਭਾਸ਼ ਬੈਂਸ, ਅਰਜੁਨ ਕੁਮਾਰ, ਰਵੀ ਮਹਿਰਾ, ਲਲਿਤ ਮਹਿਰਾ, ਅਸ਼ੋਕ ਕੁਮਾਰ, ਰੋਹਿਤ ਚੌਧਰੀ, ਖੁਸ਼ਦੀਪ, ਗੁਲਸ਼ਨ, ਮੱਖਣ ਸਿੰਘ ਤੇ ਸੁਰਿੰਦਰ ਸ਼ਰਮਾ ਆਦਿ ਹਾਜ਼ਰ ਸਨ। -ਪੱਤਰ ਪ੍ਰੇਰਕ