ਫ਼ਰੀਦਕੋਟ ਵਿੱਚ ਚਮੜੀ ਦੇ ਰੋਗਾਂ ਸਬੰਧੀ ਕਾਨਫਰੰਸ
ਨਿੱਜੀ ਪੱਤਰ ਪ੍ਰੇਰਕ
ਫ਼ਰੀਦਕੋਟ, 6 ਮਈ
ਇੰਡੀਅਨ ਐਸੋਸੀਏਸ਼ਨ ਦੇ ਬੈਨਰ ਹੇਠ ਬਾਬਾ ਫ਼ਰੀਦ ਯੂਨੀਵਰਸਿਟੀ ਆਫ਼ ਹੈਲਥ ਸਾਇੰਸਿਜ਼ ਵਿੱਚ ਚਮੜੀ ਦੇ ਰੋਗਾਂ ਸਬੰਧੀ ਕਾਨਫਰੰਸ ਕਰਵਾਈ ਗਈ। ਇਸ ਸਬੰਧੀ ਵਾਈਸ ਚਾਂਸਲਰ ਡਾ. ਰਾਜੀਵ ਸੂਦ ਨੇ ਦੱਸਿਆ ਕਿ ਇਹ ਕਾਨਫਰੰਸ ਚਮੜੀ ਵਿਗਿਆਨ ਦੇ ਖੇਤਰ ਵਿੱਚ ਖੋਜ ਅਤੇ ਅਭਿਆਸ ਨੂੰ ਅੱਗੇ ਵਧਾਉਣ ਦੇ ਉਦੇਸ਼ ਨਾਲ ਕਰਵਾਇਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਡਰਮੋਸਕੋਪੀ ਵਿੱਚ ਨਵੀਨਤਮ ਉੱਨਤੀਆਂ ਦਾ ਪਤਾ ਲਗਾਉਣ ਲਈ ਦੇਸ਼ ਭਰ ਦੇ ਮੰਨੇ-ਪ੍ਰਮੰਨੇ ਡਰਮਾਟੋਲੋਜਿਸਟ, ਖੋਜਕਰਤਾ ਅਤੇ ਮਾਹਰ ਇਸ ਕਾਨਫਰੰਸ ਵਿੱਚ ਸ਼ਾਮਲ ਹੋਏ ਜਿਨ੍ਹਾਂ ਚਮੜੀ ਵਿਗਿਆਨ ਦੇ ਖੇਤਰ ਵਿੱਚ ਆਪੋ-ਆਪਣੇ ਵਿਚਾਰ ਤੇ ਖੋਜ ਕਾਰਜ ਪੇਸ਼ ਕੀਤੇ। ਆਈ.ਏ.ਡੀ.ਵੀ.ਐਲ ਪੰਜਾਬ, ਹਿਮਾਚਲ ਪ੍ਰਦੇਸ਼ ਅਤੇ ਚੰਡੀਗੜ੍ਹ ਦੇ ਪ੍ਰਧਾਨ ਡਾ. ਸੁਮੀਰ ਕੁਮਾਰ ਅਤੇ ਸੰਸਥਾ ਦੇ ਚੇਅਰਪਰਸਨ ਨੇ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਐਸ.ਆਈ.ਜੀ ਡਰਮੋਸਕੋਪੀ ਚਮੜੀ ਦੀ ਦੇਖਭਾਲ ਨੂੰ ਅੱਗੇ ਵਧਾਉਣ ਲਈ ਮੁਹਾਰਤ, ਨਵੀਨਤਾ ਅਤੇ ਸਮਰਪਣ ਦੇ ਕਨਵਰਜ਼ਨ ਨੂੰ ਦਰਸਾਉਂਦੀ ਹੈ। ਕਾਨਫਰੰਸ ਨੂੰ ਡਾ. ਅਮਰਬੀਰ ਸਿੰਘ ਬੋਪਾਰਾਏ ਅਤੇ ਡਾ. ਨੀਰਜਾ ਪੁਰੀ ਨੇ ਵੀ ਸੰਬੋਧਨ ਕੀਤਾ।