ਗੁਲਜ਼ਾਰ ਗਰੁੱਪ ਆਫ ਇੰਸਟੀਚਿਊਟਸ ਵਿੱਚ ਰੰਗਾਰੰਗ ਸਮਾਗਮ

ਨਿੱਜੀ ਪੱਤਰ ਪ੍ਰੇਰਕ
ਖੰਨਾ, 2 ਨਵੰਬਰ
ਇਥੋਂ ਦੇ ਗੁਲਜ਼ਾਰ ਗਰੁੱਪ ਆਫ਼ ਇੰਸਟੀਚਿਊਟਸ ਵੱਲੋਂ ਰੋਸ਼ਨੀ ਅਤੇ ਸੱਚਾਈ ਦੇ ਪ੍ਰਤੀਕ ਦੀਵਾਲੀ ਦੇ ਤਿਉਹਾਰ ਮੌਕੇ ਕੈਂਪਸ ਵਿੱਚ ਰੰਗਾਰੰਗ ਪ੍ਰੋਗਰਾਮ ਕਰਵਾਇਆ ਗਿਆ। ਇਸ ਦੌਰਾਨ ਕੈਂਪਸ ਨੂੰ ਮੇਲੇ ਦਾ ਰੂਪ ਦਿੰਦੇ ਹੋਏ ਖਾਣ ਪੀਣ ਦੇ ਸਟਾਲ ਲਾਏ ਗਏ ਤੇ ਵੱਖ ਵੱਖ ਕਲਾਸਾਂ ਦੇ ਵਿਦਿਆਰਥੀਆਂ ਨੇ ਆਪਣੀ ਕਲਾ ਦਾ ਪ੍ਰਦਰਸ਼ਨ ਕਰਦਿਆਂ ਖੂਬਸੂਰਤ ਪੇਸ਼ਕਾਰੀਆਂ ਕੀਤੀਆਂ। ਵਿਦਿਆਰਥੀਆਂ ਨੇ ਕਾਲਜ ਵਿੱਚ ਰੰਗੋਲੀ ਬਣਾ ਕੇ ਆਪਣੇ ਹੱਥਾਂ ਨਾਲ ਸਜਾਏ ਲਿਬਾਸ, ਗਹਿਣਿਆਂ, ਘਰੇਲੂ ਸਜਾਵਟ ਦਾ ਸਾਮਾਨ, ਹੱਥਾਂ ਨਾਲ ਬਣੇ ਦੀਵੇ, ਗ੍ਰੀਟਿੰਗ ਕਾਰਡ, ਸ਼ਿੰਗਾਰ ਸਾਮਾਨ, ਪੇਪਰ ਬੈਗ ਤੇ ਹੋਰ ਚੀਜ਼ਾਂ ਪੇਸ਼ ਕੀਤੀਆਂ। ਇਸ ਮੌਕੇ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਨੇ ਤੰਬੋਲ, ਲੱਡੂ, ਬਲੱਸ਼ ਗੇਮਜ਼ ਅਤੇ ਸੰਗੀਤ ਕੁਰਸੀਆਂ ਜਿਹੀਆਂ ਮਨੋਰੰਜਕ ਖੇਡਾਂ ਵਿਚ ਜ਼ੋਰ ਸ਼ੋਰ ਨਾਲ ਹਿੱਸਾ ਲਿਆ। ਇਸ ਦੌਰਾਨ ਖਾਣ ਪੀਣ ਦੇ ਸਾਮਾਨ ਕਬਾਬ, ਰੋਲ, ਪੀਜ਼ਾ, ਇੰਡੀਅਨ ਸਟਰੀਟ ਫੂਡ ਸਮੇਤ ਹੋਰ ਕਈ ਸਵਾਦੀ ਵਿਅੰਜਨ ਸਾਰਿਆਂ ਨੂੰ ਖਿੱਚਦੇ ਨਜ਼ਰ ਆਏ। ਚੇਅਰਮੈਨ ਗੁਰਸ਼ਰਨ ਸਿੰਘ ਅਤੇ ਡਾਇਰੈਕਟਰ ਗੁਰਕੀਰਤ ਸਿੰਘ ਨੇ ਸਭ ਨੂੰ ਦੀਵਾਲੀ ਦੀ ਵਧਾਈ ਦਿੰਦਿਆਂ ਸਰਬੱਤ ਦੇ ਭਲੇ ਦੀ ਕਾਮਨਾ ਕੀਤੀ।