ਚੀਨ: ਪੁਲ ਢਹਿਣ ਕਾਰਨ 11 ਲੋਕਾਂ ਦੀ ਮੌਤ, 30 ਲਾਪਤਾ

ਬੀਜਿੰਗ, 19 ਜੁਲਾਈ

ਚੀਨ ਦੇ ਸ਼ਾਂਕਸੀ ਸੂਬੇ ਵਿਚ ਅਚਾਨਕ ਆਏ ਹੜ੍ਹ ਕਾਰਨ ਇਕ ਹਾਈਵੇਅ ਤੇ ਇਕ ਪੁਲ ਦੇ ਅੰਸ਼ਕ ਤੌਰ ਤੇ ਢਹਿ ਜਾਣ ਕਾਰਨ ਘੱਟੋ ਘੱਟ 11 ਲੋਕਾਂ ਦੀ ਮੌਤ ਹੋ ਗਈ ਅਤੇ 30 ਤੋਂ ਵੱਧ ਲਾਪਤਾ ਹੋ ਗਏ। ਸੂਬਾਈ ਪ੍ਰਚਾਰ ਵਿਭਾਗ ਦੇ ਹਵਾਲੇ ਨਾਲ ਸਿਨਹੂਆ ਨਿਊਜ਼ ਏਜੰਸੀ ਨੇ ਦੱਸਿਆ ਕਿ ਸ਼ਾਂਗਲੁਓ ਸ਼ਹਿਰ ਦੇ ਝਾਸ਼ੂਈ ਕਾਉਂਟੀ ਵਿੱਚ ਸਥਿਤ ਪੁਲ ਸ਼ੁੱਕਰਵਾਰ ਸ਼ਾਮ ਨੂੰ ਅਚਾਨਕ ਪਏ ਮੀਂਹ ਅਤੇ ਹੜ੍ਹਾਂ ਕਾਰਨ ਢਹਿ ਗਿਆ।

ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਸ਼ਨੀਵਾਰ ਸਵੇਰ ਤੱਕ 11 ਲੋਕਾਂ ਦੇ ਮਰਨ ਦੀ ਪੁਸ਼ਟੀ ਕੀਤੀ ਗਈ ਸੀ, 30 ਤੋਂ ਵੱਧ ਲਾਪਤਾ ਹੋਏ ਹਨ। ਪੁਲ ਢਹਿਣ ਕਾਰਨ ਕੁਝ ਵਾਹਨ ਹੇਠਾਂ ਜਿਨਕਿਆਨ ਨਦੀ ਵਿਚ ਡਿੱਗ ਗਏ ਅਤੇ ਡਿੱਗਣ ਵਾਲੇ ਵਾਹਨਾਂ ਦੀ ਸਹੀ ਗਿਣਤੀ ਦਾ ਅਜੇ ਪਤਾ ਲਗਾਇਆ ਜਾ ਰਿਹਾ ਹੈ। ਏਜੰਸੀ ਅਨੁਸਾਰ ਬਚਾਅ ਟੀਮਾਂ ਨੇ ਹੁਣ ਤੱਕ ਨਦੀ ਵਿਚ ਡਿੱਗਣ ਵਾਲੇ ਪੰਜ ਵਾਹਨਾਂ ਨੂੰ ਬਰਾਮਦ ਕਰ ਲਿਆ ਹੈ ਅਤੇ ਰਾਹਤ ਕਾਰਜ ਜਾਰੀ ਹਨ। ਚੀਨ ਦੇ ਆਫ਼ਤ ਪ੍ਰਬੰਧਨ ਦਲ ਨੇ ਬਚਾਅ ਕਾਰਜਾਂ ਲਈ 736 ਲੋਕ, 76 ਵਾਹਨ, 18 ਕਿਸ਼ਤੀਆਂ ਅਤੇ 32 ਡਰੋਨ ਭੇਜੇ ਹਨ। ਪੀਟੀਆਈ