ਰੋਡ ਸ਼ੋਅ ਦੌਰਾਨ ਪੱਥਰ ਵੱਜਣ ਕਾਰਨ ਮੁੱਖ ਮੰਤਰੀ ਰੈੱਡੀ ਜ਼ਖ਼ਮੀ

ਵਿਜੈਵਾੜਾ, 13 ਅਪਰੈਲ
ਆਂਧਰਾ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਵਾਈ.ਐੱਸ. ਜਗਨ ਮੋਹਨ ਰੈੱਡੀ ਅੱਜ ਵਿਜੈਵਾੜਾ ’ਚ ਚੋਣ ਪ੍ਰਚਾਰ ਦੌਰਾਨ ਇੱਕ ਅਣਪਛਾਤੇ ਵਿਅਕਤੀ ਵੱਲੋਂ ਸ਼ੱਕੀ ਤੌਰ ’ਤੇ ਪੱਥਰਾਂ ਨਾਲ ਕੀਤੇ ਹਮਲੇ ’ਚ ਜ਼ਖਮੀ ਹੋ ਗਏ। ਇਹ ਘਟਨਾ ਸਿੰਘ ਨਗਰ ਢਾਬਾ ਕੋਟਲਾ ਕੇਂਦਰ ’ਚ ਵਾਪਰੀ। ਪੱਥਰ ਵੱਜਣ ਕਾਰਨ ਵਾਈਐੱਸਆਰ ਕਾਂਗਰਸ ਪਾਰਟੀ (ਵਾਈਐੱਸਆਰਸੀਪੀ) ਮੁਖੀ ਦੀ ਖੱਬੀ ਅੱਖ ’ਤੇ ਸੱਟ ਲੱਗੀ ਹੈ। ਮੁੱਖ ਮੰਤਰੀ ਰੈੱਡੀ ‘‘ਮੇਮਾਂਥਾ ਸਿੱਧਮ ਯਾਤਰਾ’’ ਦੇ ਹਿੱਸੇ ਪ੍ਰਚਾਰ ਤਹਿਤ ਰੋਡ ਸ਼ੋਅ ਲੋਕਾਂ ਦਾ ਸਵਾਗਤ ਕਬੂਲਣ ਲਈ ਇੱਕ ਵਿਸ਼ੇਸ਼ ਬੱਸ ’ਚ ਖੜ੍ਹੇ ਸਨ ਜਿਸ ਦੌਰਾਨ ਉਨ੍ਹਾਂ ਨੂੰ ਸੱਟ ਲੱਗੀ। ਡਾਕਟਰਾਂ ਨੇ ਬੱਸ ’ਚ ਉਨ੍ਹਾਂ ਨੂੰ ਮੁੱਢਲੀ ਸਹਾਇਤਾ ਮੁਹੱਈਆ ਕਰਵਾਈ। ਦੂਜੇ ਪਾਸੇ ਵਿਜੈਵਾੜਾ ਤੋਂ ਵਾਈਐੱਸਆਰਸੀਪੀ ਨੇਤਾਵਾਂ ਨੇ ਇਸ ਘਟਨਾ ਪਿੱਛੇ ਤੇਲਗੂ ਦੇਸਮ ਪਾਰਟੀ ਕਾਰਕੁਨਾਂ ਦਾ ਹੱਥ ਹੋਣ ਦਾ ਦੋਸ਼ ਲਾਇਆ ਹੈ। -ਆਈਏਐੱਨਐੱਸ