ਪੰਜਾਬ ਸਟੇਟ ਫੂਡ ਕਮਿਸ਼ਨ ਵੱਲੋਂ ਸਕੂਲਾਂ ਦੀ ਚੈਕਿੰਗ

ਪੱਤਰ ਪ੍ਰੇਰਕ
ਤਰਨ ਤਾਰਨ, 17 ਜੁਲਾਈ
ਪੰਜਾਬ ਸਟੇਟ ਫੂਡ ਕਮਿਸ਼ਨ ਦੇ ਮੈਂਬਰ ਪ੍ਰੀਤੀ ਚਾਵਲਾ ਅਤੇ ਵਧੀਕ ਡਿਪਟੀ ਕਮਿਸ਼ਨਰ ਵਰਿੰਦਰਪਾਲ ਸਿੰਘ ਬਾਜਵਾ ਦੀ ਟੀਮ ਨੇ ਅੱਜ ਜ਼ਿਲ੍ਹੇ ਦੇ ਵੱਖ-ਵੱਖ ਸਕੂਲਾਂ ਅਤੇ ਆਂਗਨਵਾੜੀ ਕੇਂਦਰਾਂ ਦਾ ਅਚਨਚੇਤੀ ਦੌਰਾ ਕਰਕੇ ਮਿੱਡ-ਡੇਅ ਮੀਲ ਤਿਆਰ ਕਰਨ ਆਦਿ ਦੀਆਂ ਹਾਲਤਾਂ ਦੀ ਚੈਕਿੰਗ ਕੀਤੀ ਅਤੇ ਇਸ ਸਬੰਧੀ ਪ੍ਰਬੰਧਾਂ ਨੂੰ ਹੋਰ ਬਿਹਤਰ ਕਰਨ ਲਈ ਹਦਾਇਤਾਂ ਜਾਰੀ ਕੀਤੀਆਂ| ਅਧਿਕਾਰੀਆਂ ਦੀ ਟੀਮ ਦੇ ਦੌਰੇ ਦੌਰਾਨ ਮੱਲੀਆ, ਚੁਤਾਲਾ, ਰਸੂਲਪੁਰ ਆਦਿ ਪਿੰਡਾਂ ਦੇ ਸਰਕਾਰੀ ਐਲੀਮੈਂਟਰੀ ਸਕੂਲਾਂ ਅਤੇ ਆਂਗਨਵਾੜੀ ਕੇਂਦਰਾਂ ਦੀ ਚੈਕਿੰਗ ਕੀਤੀ ਗਈ| ਅਧਿਕਾਰੀਆਂ ਨੇ ਖਾਣੇ ਦੀ ਗੁਣਵੱਤਾ, ਬਾਥਰੂਮਾਂ ਦੀ ਸਫਾਈ, ਕੁੱਕਾਂ ਦੀ ਸਾਫ਼-ਸਫ਼ਾਈ ਦੀ ਆਦਿ ਦਾ ਨਿਰੀਖਣ ਕੀਤਾ ਅਤੇ ਪੀਣ ਵਾਲੇ ਪਾਣੀ ਦੇ ਲਈ ਆਰਓ ਲਗਾਉਣ ਲਈ ਹਦਾਇਤ ਕੀਤੀ। ਉਨ੍ਹਾਂ ਆਇਰਨ-ਫੋਲਿਕ ਦੀਆਂ ਗੋਲੀਆਂ ਅਤੇ ਰੋਜ਼ਾਨਾ ਮਿੱਡ-ਡੇ ਮੀਲ, ਐੱਸਐੱਮਐੱਸ ਬਾਰੇ ਵੀ ਨਿਰੀਖਣ ਕੀਤਾ| ਪ੍ਰੀਤੀ ਚਾਵਲਾ ਨੇ ਹਰੇਕ ਕੁੱਕ ਦਾ ਛੇ ਮਹੀਨੇ ਬਾਅਦ ਮੈਡੀਕਲ ਕਰਵਾਉਣ ਅਤੇ ਇਸ ਦਾ ਰਿਕਾਰਡ ਰਜਿਸਟਰ ਵਿੱਚ ਦਰਜ ਕਰਨ ਲਈ ਕਿਹਾ। ਕੁੱਕਾਂ ਦੇ ਸਮੇਂ-ਸਮੇਂ ਨਹੁੰ ਚੈੱਕ ਕਰਨ, ਸਾਫ਼ ਕੱਪੜੇ ਪਹਿਨਣ ਆਦਿ ਲਈ ਦੀ ਵੀ ਹਦਾਇਤ ਕੀਤੀ।