ਚਾਰਲਸ ਵੱਲੋਂ ਮੈਨਨ ਦਾ ਸਨਮਾਨ

ਲੰਡਨ: ਭਾਰਤ ਵਿੱਚ ਜਨਮੇ ਦਿਮਾਗ਼ ਦੇ ਸਦਮੇ ਦੇ ਮਾਹਰ ਅਤੇ ਕੈਂਬ੍ਰਿਜ ਯੂਨੀਵਰਸਿਟੀ ਵਿੱਚ ਅਨੈਸਥੀਜ਼ੀਆ ਦੇ ਪ੍ਰੋਫ਼ੈਸਰ ਡੇਵਿਡ ਕ੍ਰਿਸ਼ਨਾ ਮੈਨਨ ਨੂੰ ਨਿਊਰੋਕ੍ਰਿਟੀਕਲ ਕੇਅਰ ਦੀਆਂ ਸੇਵਾਵਾਂ ਲਈ ਬ੍ਰਿਟੇਨ ਦੇ ਬਾਦਸ਼ਾਹ ਚਾਰਲਸ ਤੀਜੇ ਵੱਲੋਂ ਸਨਮਾਨਿਤ ਕੀਤਾ ਗਿਆ ਹੈ। ਚਾਰਲਸ ਵੱਲੋਂ ਹਫ਼ਤੇ ਦੇ ਅਖੀਰ ਵਿੱਚ ਆਪਣੀ ਸਾਲਾਨਾ ਜਨਮਦਿਨ ਸਨਮਾਨ ਸੂਚੀ ਵਿੱਚ ਪ੍ਰੋਫ਼ੈਸਰ ਮੈਨਨ ਨੂੰ ਕਮਾਂਡਰ ਆਫ਼ ਦਿ ਆਰਡਰ ਆਫ਼ ਬ੍ਰਿਟਿਸ਼ ਐਂਪਾਇਰ (ਸੀਬੀਈ) ਨਾਲ ਸਨਮਾਨਿਤ ਕੀਤਾ ਗਿਆ। ਮੈਨਨ ਨੇ ਪਾਂਡੀਚੇਰੀ ਵਿੱਚ ਜਵਾਹਰ ਲਾਲ ਇੰਸਟੀਚਿਊਟ ਆਫ਼ ਪੋਸਟ ਗਰੈਜੂਏਟ ਮੈਡੀਕਲ ਐਜੂਕੇਸ਼ਨ ਐਂਡ ਰਿਸਰਚ ਵਿੱਚ ਮੈਡੀਸਨ, ਅਨੈਸਥੀਜ਼ੀਆ ਅਤੇ ਇੰਟੈਂਸਿਵ ਕੇਅਰ ਵਿੱਚ ਸਿਖਲਾਈ ਲਈ ਸੀ। -ਪੀਟੀਆਈ