ਸੀਬੀਐੱਸਈ ਵੱਲੋਂ ਦਸਵੀਂ ਤੇ ਬਾਰ੍ਹਵੀਂ ਜਮਾਤਾਂ ਲਈ ਕੰਪਾਰਟਮੈਂਟ ਦੀ ਡੇਟਸ਼ੀਟ ਜਾਰੀ
ਸੁੁਖਵਿੰਦਰ ਪਾਲ ਸੋਢੀ
ਚੰਡੀਗੜ੍ਹ, 21 ਜੂਨ
ਸੈਂਟਰਲ ਬੋਰਡ ਆਫ ਸੈਕੰਡਰੀ ਐਜੂਕੇਸ਼ਨ (ਸੀਬੀਐੱਸਈ) ਵੱਲੋਂ ਦਸਵੀਂ ਤੇ ਬਾਰ੍ਹਵੀਂ ਜਮਾਤਾਂ ਦੀਆਂ ਕੰਪਾਰਟਮੈਂਟ ਪ੍ਰੀਖਿਆਵਾਂ ਦੀ ਡੇਟਸ਼ੀਟ ਅੱਜ ਜਾਰੀ ਕਰ ਦਿੱਤੀ ਗਈ ਹੈ। ਬੋਰਡ ਵਲੋਂ ਦਸਵੀਂ ਜਮਾਤ ਦੀਆਂ ਪ੍ਰੀਖਿਆਵਾਂ 15 ਤੋਂ 22 ਜੁਲਾਈ ਤਕ ਲਈਆਂ ਜਾਣਗੀਆਂ ਜਦਕਿ ਬਾਰ੍ਹਵੀਂ ਦੀ ਪ੍ਰੀਖਿਆ 15 ਜੁਲਾਈ ਨੂੰ ਹੀ ਲਈ ਜਾਵੇਗੀ। ਦਸਵੀਂ ਜਮਾਤ ਦੀ ਪਹਿਲੀ ਪ੍ਰੀਖਿਆ 15 ਜੁਲਾਈ ਨੂੰ ਸੋਸ਼ਲ ਸਾਇੰਸ, 16 ਨੂੰ ਹਿੰਦੀ, 18 ਨੂੰ ਵਿਗਿਆਨ, 19 ਨੂੰ ਗਣਿਤ ਸਟੈਂਡਰਡ ਤੇ ਗਣਿਤ ਬੇਸਿਕ, 20 ਨੂੰ ਅੰਗਰੇਜ਼ੀ ਤੇ 22 ਜੁਲਾਈ ਨੂੰ ਉਰਦੂ ਤੇ ਖੇਤਰੀ ਭਾਸ਼ਾਵਾਂ ਸਣੇ ਸੰਸਕ੍ਰਿਤ, ਕੰਪਿਊਟਰ ਐਪਲੀਕੇਸ਼ਨ ਦੀ ਪ੍ਰੀਖਿਆ ਹੋਵੇਗੀ। ਬੋਰਡ ਨੇ ਅੱਜ ਸਕੂਲਾਂ ਨੂੰ ਸਰਕੁਲਰ ਜਾਰੀ ਕਰ ਕੇ ਸਪੱਸ਼ਟ ਕੀਤਾ ਹੈ ਕਿ ਪ੍ਰੀਖਿਆ ਕੇਂਦਰ ਵਿੱਚ ਵਿਦਿਆਰਥੀ ਕੋਈ ਵੀ ਸੰਚਾਰ ਸਾਧਨ ਨਹੀਂ ਲੈ ਕੇ ਜਾਵੇਗਾ। ਬੋਰਡ ਨੇ ਇਹ ਵੀ ਕਿਹਾ ਹੈ ਕਿ ਜਿਨ੍ਹਾਂ ਵਿਦਿਆਰਥੀਆਂ ਦੀ ਐਲਓਸੀ ਜਮ੍ਹਾਂ ਹੋਈ ਹੈ ਉਨ੍ਹਾਂ ਵਿਦਿਆਰਥੀਆਂ ਨੂੰ ਹੀ ਪ੍ਰੀਖਿਆ ਕੇਂਦਰ ਵਿਚ ਬੈਠਣ ਦੀ ਆਗਿਆ ਦਿੱਤੀ ਜਾਵੇਗੀ।
ਦਸਵੀਂ ਦੇ ਦੋ ਤੇ ਬਾਰ੍ਹਵੀਂ ਦੇ ਇਕ ਵਿਸ਼ੇ ਵਿੱਚ ਅੰਕ ਸੁਧਾਰਨ ਦਾ ਮੌਕਾ
ਬੋਰਡ ਨੇ ਸਪੱਸ਼ਟ ਕੀਤਾ ਹੈ ਕਿ ਜਿਹੜੇ ਵਿਦਿਆਰਥੀ ਦਸਵੀਂ ਜਮਾਤ ਦੇ ਦੋ ਤੇ ਬਾਰ੍ਹਵੀਂ ਦੇ ਇਕ ਵਿਸ਼ੇ ਵਿੱਚ ਅੰਕਾਂ ਦਾ ਸੁਧਾਰ ਕਰਨਾ ਚਾਹੁੰਦੇ ਹਨ ਉਹ ਵੀ ਬੋਰਡ ਵੱਲੋਂ ਭੇਜੇ ਲਿੰਕ ਰਾਹੀਂ ਅਪਲਾਈ ਕਰ ਸਕਦੇ ਹਨ। ਜਿਹੜੇ ਵਿਦਿਆਰਥੀ ਇਸ ਤੋਂ ਪਹਿਲਾਂ ਪਹਿਲੇ ਤੇ ਦੂਜੇ ਮੌਕੇ ਦੌਰਾਨ ਪ੍ਰੀਖਿਆ ਪਾਸ ਨਹੀਂ ਕਰ ਸਕੇ ਉਨ੍ਹਾਂ ਨੂੰ ਤੀਜਾ ਤੇ ਆਖਰੀ ਮੌਕਾ ਦਿੱਤਾ ਜਾਂਦਾ ਹੈ ਪਰ ਉਹ ਪ੍ਰਾਈਵੇਟ ਵਿਦਿਆਰਥੀ ਵਜੋਂ ਅਪਲਾਈ ਕਰ ਸਕਦੇ ਹਨ।