IDBI Bank ਨਾਲ 126.07 ਕਰੋੜ ਦੀ ਠੱਗੀ ਸਬੰਧੀ Supertech ਤੇ ਪ੍ਰਮੋਟਰਾਂ ਖ਼ਿਲਾਫ਼ CBI ਵੱਲੋਂ ਐਫਆਈਆਰ

ਨਵੀਂ ਦਿੱਲੀ, 14 ਜੂਨ
ਅਧਿਕਾਰੀਆਂ ਨੇ ਸ਼ਨਿੱਚਰਵਾਰ ਨੂੰ ਕਿਹਾ ਕਿ ਸੀਬੀਆਈ ਨੇ ਨੋਇਡਾ ਸਥਿਤ ਉਸਾਰੀ ਫਰਮ ਸੁਪਰਟੈਕ ਲਿਮਟਿਡ (Supertech Limited) ਅਤੇ ਇਸਦੇ ਪ੍ਰਮੋਟਰ ਆਰ ਕੇ ਅਰੋੜਾ ਸਮੇਤ ਹੋਰਨਾਂ ਵਿਰੁੱਧ ਆਈਡੀਬੀਆਈ ਬੈਂਕ (IDBI Bank) ਨਾਲ 126.07 ਕਰੋੜ ਰੁਪਏ ਦੀ ਧੋਖਾਧੜੀ ਕਰਨ ਦੇ ਦੋਸ਼ ਵਿੱਚ ਐਫਆਈਆਰ ਦਰਜ ਕੀਤੀ ਹੈ।
ਉਨ੍ਹਾਂ ਕਿਹਾ ਕਿ ਨੋਇਡਾ ਸਥਿਤ ਕੰਪਨੀ ਤੋਂ ਇਲਾਵਾ ਅਰੋੜਾ ਨੂੰ ਕੁੱਲ-ਵਕਤੀ ਡਾਇਰੈਕਟਰਾਂ ਸੰਗੀਤਾ ਅਰੋੜਾ, ਮੋਹਿਤ ਅਰੋੜਾ, ਪਾਰੁਲ ਅਰੋੜਾ, ਵਿਕਾਸ ਕਾਂਸਲ, ਪ੍ਰਦੀਪ ਕੁਮਾਰ, ਅਨਿਲ ਕੁਮਾਰ ਸ਼ਰਮਾ ਅਤੇ ਅਨਿਲ ਕੁਮਾਰ ਜੈਨ ਦੇ ਨਾਲ ਐਫਆਈਆਰ ਵਿੱਚ ਨਾਮਜ਼ਦ ਕੀਤਾ ਗਿਆ ਹੈ।
ਸ਼ਨਿੱਚਰਵਾਰ ਨੂੰ ਸੀਬੀਆਈ ਨੇ ਮਾਮਲੇ ਦੇ ਸਬੰਧ ਵਿੱਚ ਮੁਲਜ਼ਮਾਂ ਨਾਲ ਜੁੜੇ ਪੰਜ ਸਥਾਨਾਂ 'ਤੇ ਤਾਲਮੇਲ ਆਧਾਰਤ ਤਲਾਸ਼ੀ ਮੁਹਿੰਮ ਚਲਾਈ, ਜਿਸ ਵਿੱਚ ਨੋਇਡਾ ਅਤੇ ਗਾਜ਼ੀਆਬਾਦ ਸਥਿਤ ਸਰਕਾਰੀ ਅਤੇ ਰਿਹਾਇਸ਼ੀ ਇਮਾਰਤਾਂ ਸ਼ਾਮਲ ਹਨ।
ਸੀਬੀਆਈ (Central Bureau of Investigation - CBI) ਦੇ ਬੁਲਾਰੇ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਛਾਪੇਮਾਰੀ ਦੌਰਾਨ ਏਜੰਸੀ ਦੇ ਅਧਿਕਾਰੀਆਂ ਨੇ 28.5 ਲੱਖ ਰੁਪਏ ਦੀ ਨਕਦੀ ਜ਼ਬਤ ਕੀਤੀ ਹੈ। ਇਹ ਮਾਮਲਾ ਆਈਡੀਬੀਆਈ ਬੈਂਕ ਦੀ ਸ਼ਿਕਾਇਤ ਤੋਂ ਬਾਅਦ ਸ਼ੁਰੂ ਕੀਤਾ ਗਿਆ ਸੀ, ਜਿਸ ਵਿੱਚ ਦੋਸ਼ ਲਗਾਇਆ ਗਿਆ ਸੀ ਕਿ ਮੁਲਜ਼ਮਾਂ ਨੇ ਠੱਗੀ ਤੇ ਧੋਖਾਧੜੀ ਵਾਲੇ ਤਰੀਕਿਆਂ ਨਾਲ ਮਨਜ਼ੂਰ ਕੀਤੇ ਕਰਜ਼ੇ ਦੇ ਫੰਡਾਂ ਦੀ ਦੁਰਵਰਤੋਂ ਕਰਨ ਦੀ ਸਾਜ਼ਿਸ਼ ਰਚੀ ਸੀ।
ਐਫਆਈਆਰ ਅਨੁਸਾਰ, ਬੈਂਕ ਨੇ ਦੋਸ਼ ਲਗਾਇਆ ਕਿ ਕੰਪਨੀ ਅਤੇ ਇਸਦੇ ਡਾਇਰੈਕਟਰਾਂ ਨੇ ਝੂਠੇ ਬਹਾਨਿਆਂ ਤਹਿਤ ਕ੍ਰੈਡਿਟ ਸਹੂਲਤਾਂ ਪ੍ਰਾਪਤ ਕਰਨ ਲਈ ਜਾਅਲੀ ਦਸਤਾਵੇਜ਼ ਪੇਸ਼ ਕੀਤੇ।
ਸੀਬੀਆਈ ਨੇ ਕਿਹਾ ਕਿ ਕਰਜ਼ਾ ਖਾਤੇ ਨੂੰ ਬਾਅਦ ਵਿੱਚ ਜਾਣਬੁੱਝ ਕੇ ਡਿਫਾਲਟ ਐਲਾਨਿਆ ਗਿਆ ਸੀ ਅਤੇ ਧੋਖਾਧੜੀ ਵਜੋਂ ਸੂਚੀਬੱਧ ਕੀਤਾ ਗਿਆ ਸੀ, ਜਿਸਦੇ ਨਤੀਜੇ ਵਜੋਂ ਕਥਿਤ ਤੌਰ 'ਤੇ ਆਈਡੀਬੀਆਈ ਬੈਂਕ ਲਿਮਟਿਡ ਨੂੰ ਕੁੱਲ 126.07 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਸੀ। ਪੀਟੀਆਈ