ਦਸ ਲੱਖ ਰੁਪਏ ਫਿਰੌਤੀ ਮੰਗਣ ’ਤੇ ਕੇਸ ਦਰਜ

ਪੱਤਰ ਪ੍ਰੇਰਕ
ਡੱਬਵਾਲੀ, 18 ਅਗਸਤ

ਇੱਥੋਂ ਦੇ ਵਿਅਕਤੀ ਤੋਂ ਵਟਸਐਪ ਕਾਲ ਰਾਹੀਂ ਦਸ ਲੱਖ ਰੁਪਏ ਦੀ ਫਿਰੌਤੀ ਮੰਗਣ ਅਤੇ ਨਾ ਦੇਣ ’ਤੇ ਜਾਨੋਂ ਮਾਰਨ ਦੀ ਧਮਕੀ ਦੇਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਸਿਟੀ ਪੁਲੀਸ ਨੇ ਕੇਸ ਦਰਜ ਕਰਕੇ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ। ਵਾਰਡ ਨੰਬਰ-11 ਦੇ ਵਾਸੀ ਸੌਰਭ ਪੁੱਤਰ ਸ਼ਾਮ ਲਾਲ ਨੇ ਦੋਸ਼ ਲਗਾਇਆ ਕਿ 6 ਅਗਸਤ ਨੂੰ ਉਸ ਨੂੰ ਅਣਪਛਾਤੇ ਵਿਅਕਤੀ ਨੇ 90534-21635 ਤੋਂ ਵਟਸਐਪ ਕਾਲ ਕੀਤੀ। ਫੋਨ ਕਰਨ ਵਾਲੇ ਨੇ ਉਸ ਤੋਂ ਦਸ ਲੱਖ ਰੁਪਏ ਦੀ ਫਿਰੌਤੀ ਮੰਗੀ। ਉਸ ਦੀ ਗੱਲ ਨਾ ਮੰਨਣ ’ਤੇ ਜਾਨ ਤੋਂ ਮਾਰਨ ਦਾ ਡਰਾਵਾ ਵੀ ਦਿੱਤਾ ਗਿਆ। ਸੌਰਭ ਮੁਤਾਬਕ ਵੱਖ-ਵੱਖ ਨੰਬਰਾਂ ਤੋਂ ਉਸ ਦੇ ਨੰਬਰ ’ਤੇ ਵਟਸਐਪ ਕਾਲਾਂ ਕੀਤੀਆਂ ਜਾ ਰਹੀਆਂ ਹਨ ਤੇ ਦਸ ਲੱਖ ਰੁਪਏ ਦੀ ਫਿਰੌਤੀ ਮੰਗੀ ਜਾ ਰਹੀ ਹੈ। ਸਿਟੀ ਪੁਲੀਸ ਨੇ ਸੌਰਭ ਦੀ ਸ਼ਿਕਾਇਤ ’ਤੇ ਧਾਰਾ 387/506 ਤਹਿਤ ਕੇਸ ਦਰਜ ਕਰ ਲਿਆ ਹੈ। ਪੁਲੀਸ ਵੱਲੋਂ ਵੱਖ-ਵੱਖ ਪਹਿਲੂਆਂ ਤੋਂ ਜਾਂਚ ਕੀਤੀ ਜਾ ਰਹੀ ਹੈ।