ਉਮੀਦਵਾਰਾਂ ਨੇ ਚੋਣ ਪ੍ਰਚਾਰ ਦੇ ਤਜਰਬੇ ਸਾਂਝੇ ਕੀਤੇ
ਕਰਮਜੀਤ ਸਿੰਘ ਚਿੱਲਾ
ਬਨੂੜ, 2 ਜੂਨ
ਪਿਛਲੇ ਮਹੀਨੇ ਤੋਂ ਲਗਾਤਾਰ ਚੋਣ ਪ੍ਰਚਾਰ ਵਿੱਚ ਰੁੱਝੇ ਇਸ ਖੇਤਰ ਦੇ ਉਮੀਦਵਾਰਾਂ ਨੇ ਅੱਜ ਆਪੋ-ਆਪਣੇ ਘਰ ਆਰਾਮ ਕੀਤਾ। ਉਨ੍ਹਾਂ ਆਪਣੇ ਪਰਿਵਾਰ ਨਾਲ ਸਮਾਂ ਬਿਤਾਇਆ ਅਤੇ ਚੋਣ ਪ੍ਰਚਾਰ ਦੌਰਾਨ ਹੋਏ ਕੌੜੇ-ਮਿੱਠੇ ਤਜਰਬੇ ਵੀ ਸਾਂਝੇ ਕੀਤੇ। ਪ੍ਰਮੁੱਖ ਧਿਰਾਂ ਅੱਜ ਸਾਰਾ ਦਿਨ ਆਪੋ-ਆਪਣੇ ਪੋਲਿੰਗ ਏਜੰਟਾਂ ਕੋਲੋਂ ਬੂਥਾਂ ’ਤੇ ਪਈਆਂ ਵੋਟਾਂ, ਇਨ੍ਹਾਂ ਵਿੱਚੋਂ ਆਪਣੀਆਂ ਸੰਭਾਵਿਤ ਵੋਟਾਂ ਤੇ ਘੱਟ ਪੋਲਿੰਗ ਦੇ ਨਵੇਂ ਨੁਕਸਾਨਾਂ ਬਾਰੇ ਜਾਣਕਾਰੀ ਲੈ ਕੇ ਆਪੋ-ਆਪਣੇ ਢੰਗ ਨਾਲ ਮੁਲਾਂਕਣ ਕਰਦੇ ਰਹੇ।
ਪਟਿਆਲਾ ਲੋਕ ਸਭਾ ਹਲਕੇ ਤੋਂ ਬਸਪਾ ਉਮੀਦਵਾਰ ਜਗਜੀਤ ਸਿੰਘ ਛੜਬੜ ਅੱਜ ਸਾਰਾ ਦਿਨ ਆਪਣੇ ਬਨੂੜ ਸਥਿਤ ਘਰ ਵਿੱਚ ਆਪਣੇ ਪਰਿਵਾਰ ਨਾਲ ਰਹੇ। ਉਨ੍ਹਾਂ ਆਪਣੇ ਸਮਰਥਕਾਂ, ਪਾਰਟੀ ਵਰਕਰਾਂ ਅਤੇ ਵੋਟਰਾਂ ਦਾ ਸਹਿਯੋਗ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਦੱਸਿਆ ਕਿ ਚੋਣ ਪ੍ਰਚਾਰ ਸਮੇਂ ਦੇਰ ਰਾਤ ਤੱਕ ਪ੍ਰਚਾਰ ਕਰਨ, ਸਵੇਰੇ ਜਲਦੀ ਜਾਗਣ ਕਾਰਨ ਪੂਰਾ ਆਰਾਮ ਨਹੀਂ ਮਿਲ ਸਕਿਆ ਸੀ ਤੇ ਅੱਜ ਉਨ੍ਹਾਂ ਆਪਣਾ ਸਾਰਾ ਥਕੇਵਾਂ ਦੂਰ ਕੀਤਾ।
ਪਿੰਡ ਗੋਬਿੰਦਗੜ੍ਹ ਦੇ ਸ੍ਰੀ ਆਨੰਦਪੁਰ ਸਾਹਿਬ ਲੋਕ ਸਭਾ ਹਲਕੇ ਦੇ ਆਜ਼ਾਦ ਉਮੀਦਵਾਰ ਮੇਘ ਰਾਜ ਨੇ ਵੀ ਜ਼ਿਆਦਾ ਸਮਾਂ ਘਰ ਰਹਿ ਕੇ ਪਰਿਵਾਰ ਨਾਲ ਹੀ ਬਿਤਾਇਆ। ਉਨ੍ਹਾਂ ਵੀ ਆਪਣੇ ਸਾਰੇ ਸਮਰਥਕਾਂ ਦਾ ਸਹਿਯੋਗ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਵੱਡਾ ਹਲਕਾ ਅਤੇ ਸਰੋਤਾਂ ਦੀ ਘਾਟ ਦੇ ਬਾਵਜੂਦ ਉਨ੍ਹਾਂ ਨੂੰ ਲੋਕਾਂ ਦਾ ਵੱਡਾ ਸਹਿਯੋਗ ਮਿਲਿਆ ਹੈ।
ਭਾਰਤੀ ਜਨਤਾ ਪਾਰਟੀ ਦੇ ਵਰਕਰ ਉਤਸ਼ਾਹਿਤ
ਐਗਜ਼ਿਟ ਪੋਲਾਂ ਵੱਲੋਂ ਨਰਿੰਦਰ ਮੋਦੀ ਦੇ ਤੀਜੀ ਵੇਰ ਪ੍ਰਧਾਨ ਮੰਤਰੀ ਬਣਨ ਦੀਆਂ ਕਿਆਸ-ਅਰਾਈਆਂ ਮਗਰੋਂ ਭਾਜਪਾ ਵਰਕਰ ਇਸ ਖੇਤਰ ਵਿੱਚ ਵੋਟਰਾਂ ਵੱਲੋਂ ਮਿਲੇ ਭਰਵੇਂ ਸਹਿਯੋਗ ਤੋਂ ਕਾਫ਼ੀ ਉਤਸ਼ਾਹਿਤ ਹਨ। ਸਥਾਨਕ ਆਗੂ ਪ੍ਰੇਮ ਕੁਮਾਰ ਥੱਮਣ, ਹੈਪੀ ਕਟਾਰੀਆ ਤੇ ਰਿੰਕੂ ਸਲੇਮਪੁਰ ਨੇ ਕਿਹਾ ਕਿ ਦੇਸ਼ ਵਿੱਚ ਭਾਜਪਾ ਦੀ ਸਰਕਾਰ ਬਣਨੀ ਤੈਅ ਹੈ। ਉਨ੍ਹਾਂ ਪਟਿਆਲਾ ਹਲਕੇ ਤੋਂ ਵੀ ਮਹਾਰਾਣੀ ਪ੍ਰਨੀਤ ਕੌਰ ਦੀ ਜਿੱਤ ਦਾ ਦਾਅਵਾ ਕੀਤਾ।