Burglary with 50 Master Keys: 50 ਚੋਰ ਚਾਬੀਆਂ ਨਾਲ ਕਈ ਘਰਾਂ ਤੋਂ ਚੋਰੀ ਕਰਨ ਦੇ ਦੋਸ਼ ’ਚ ਔਰਤ ਕਾਬੂ

ਨਵੀਂ ਦਿੱਲੀ, 17 ਜੂਨ
ਇੱਕ ਅਧਿਕਾਰੀ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਸਾਬਕਾ ਕਾਲ ਸੈਂਟਰ ਮੁਲਾਜ਼ਮ ਔਰਤ, ਜੋ ਬਾਅਦ ਵਿਚ ਚੋਰੀਆਂ ਕਰਨ ਲੱਗ ਪਈ, ਨੂੰ ਦੱਖਣ-ਪੱਛਮੀ ਦਿੱਲੀ ਦੇ ਸਰਦੇ-ਪੁੱਜਦੇ ਲੋਕਾਂ ਦੀ ਵੱਸੋਂ ਵਾਲੇ ਇਲਾਕਿਆਂ ਵਿੱਚ 50 ਚੋਰ ਚਾਬੀਆਂ ਦੀ ਵਰਤੋਂ ਕਰ ਕੇ ਬੰਦ ਘਰਾਂ ’ਚੋਂ ਚੋਰੀਆਂ ਕਰਨ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਮਨੀਪੁਰ ਦੀ ਰਹਿਣ ਵਾਲੀ ਦੋਸ਼ੀ, ਜੋਨੀਲਾ ਤੋਂਗਸਿਨ ਅਨਲ (Joynila Tongsin Anal) ਅਕਤੂਬਰ 2024 ਵਿੱਚ ਦਿੱਲੀ ਆਈ ਸੀ ਅਤੇ ਸ਼ੁਰੂ ਵਿੱਚ ਮੁਨੀਰਕਾ ਵਿੱਚ ਰਹਿੰਦਿਆਂ ਇੱਕ ਕਾਲ ਸੈਂਟਰ ਵਿੱਚ ਨੌਕਰੀ ਕਰਦੀ ਸੀ। ਡਿਪਟੀ ਕਮਿਸ਼ਨਰ ਆਫ਼ ਪੁਲੀਸ (ਦੱਖਣ-ਪੱਛਮ) ਅਮਿਤ ਗੋਇਲ ਨੇ ਕਿਹਾ ਕਿ ਉਸ ਨੇ ਜਲਦੀ ਹੀ ਆਪਣੀ ਨੌਕਰੀ ਛੱਡ ਦਿੱਤੀ ਅਤੇ ਕਥਿਤ ਤੌਰ 'ਤੇ ਕਿਸ਼ਨਗੜ੍ਹ ਅਤੇ ਸਫਦਰਜੰਗ ਐਨਕਲੇਵ ਵਰਗੇ ਨੇੜਲੇ ਇਲਾਕਿਆਂ ਵਿੱਚ ਬੰਦ ਘਰਾਂ ਵਿਚ ਚੋਰੀਆਂ ਕਰਨੀਆਂ ਸ਼ੁਰੂ ਕਰ ਦਿੱਤੀਆਂ।
ਉਹ ਦਰਵਾਜ਼ਿਆਂ ਦੇ ਤਾਲੇ ਦੀ ਜਾਂਚ ਕਰਨ ਲਈ ਚਾਬੀਆਂ ਦੇ ਇੱਕ ਸਮੂਹ ਦੀ ਵਰਤੋਂ ਕੀਤੀ ਅਤੇ ਚੋਰੀ-ਛਿਪੇ ਘਰਾਂ ਵਿੱਚ ਦਾਖਲ ਹੋ ਜਾਂਦੀ ਸੀ। ਇਹ ਮਾਮਲਾ ਉਦੋਂ ਸਾਹਮਣੇ ਆਇਆ ਜਦੋਂ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਕਿਸ਼ਨਗੜ੍ਹ ਪੁਲਿਸ ਸਟੇਸ਼ਨ ਅਤੇ ਸਫਦਰਜੰਗ ਐਨਕਲੇਵ ਪੁਲਿਸ ਸਟੇਸ਼ਨ ਵਿੱਚ ਦੋ ਵੱਖ-ਵੱਖ ਚੋਰੀ ਦੀਆਂ ਸ਼ਿਕਾਇਤਾਂ ਦਰਜ ਕੀਤੀਆਂ ਗਈਆਂ।
ਇੱਕ ਸ਼ਿਕਾਇਤਕਰਤਾ ਨੇ ਦੋਸ਼ ਲਗਾਇਆ ਕਿ ਮੁਨੀਰਕਾ ਵਿੱਚ ਉਸਦੇ ਘਰ ਤੋਂ ਇੱਕ ਲੈਪਟਾਪ, LED ਟੀਵੀ ਅਤੇ ਕੈਮਰਾ ਉਪਕਰਣ ਚੋਰੀ ਹੋ ਗਏ ਹਨ ਜਦੋਂ ਕਿ ਇੱਕ ਹੋਰ ਵਿਅਕਤੀ ਨੇ ਦੱਸਿਆ ਕਿ ਉਸਦੇ ਘਰ ਤੋਂ ਸੋਨੇ ਅਤੇ ਹੀਰੇ ਦੀਆਂ ਵਾਲੀਆਂ, ਇੱਕ ਹੈੱਡਫੋਨ, ਜੁੱਤੇ, ਅਤੇ 1,300 ਰੁਪਏ ਦੀ ਨਕਦੀ ਚੋਰੀ ਹੋ ਗਈ ਹੈ।
ਜੋਨੀਲਾ ਨੂੰ 14 ਜੂਨ ਨੂੰ ਛਤਰਪੁਰ ਖੇਤਰ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਪੁੱਛਗਿੱਛ ਦੌਰਾਨ ਉਸਨੇ ਚੋਰੀਆਂ ਦੀ ਗੱਲ ਕਬੂਲ ਕੀਤੀ ਅਤੇ ਪੁਲੀਸ ਨੂੰ ਆਪਣੇ ਘਰ ਲੈ ਗਈ ਜਿੱਥੋਂ ਕਈ ਮਾਮਲਿਆਂ ਨਾਲ ਸਬੰਧਤ ਚੋਰੀ ਦੀਆਂ ਚੀਜ਼ਾਂ ਬਰਾਮਦ ਕੀਤੀਆਂ ਗਈਆਂ।
ਅਧਿਕਾਰੀ ਨੇ ਕਿਹਾ ਕਿ ਉਸ ਦੇ ਕਬਜ਼ੇ ਵਿੱਚੋਂ 50 ਚੋਰ ਚਾਬੀਆਂ ਨੂੰ ਵੀ ਜ਼ਬਤ ਕਰ ਲਿਆ ਗਿਆ, ਜਿਨ੍ਹਾਂ ਨੂੰ ਉਹ ਸਭ ਦੀਆਂ ਨਜ਼ਰਾਂ ਤੋਂ ਬਚ ਕੇ ਤਾਲੇ ਵਾਲੇ ਘਰਾਂ ਨੂੰ ਖੋਲ੍ਹਣ ਲਈ ਵਰਤਦੀ ਸੀ। -ਪੀਟੀਆਈ