ਦੋਆਬੇ ਵਿੱਚ ਕੰਮ ਨਾ ਆਈ ਬਸਪਾ ਦੀ ਦਹਾੜ

ਸੁਰਜੀਤ ਮਜਾਰੀ
ਬੰਗਾ, 4 ਜੂਨ
ਬਹੁਜਨ ਸਮਾਜ ਪਾਰਟੀ ਦੀ ਇਸ ਵਾਰ ਦੇਸ਼ ਦੀ ਸੱਤਾ ’ਚ ਹਿੱਸੇਦਾਰੀ ਪਾਉਣ ਅਤੇ ਪੰਜਾਬ ਦੇ ਦੋਆਬਾ ਖੇਤਰ ਵਿੱਚ ਭਾਰੀ ਜਿੱਤ ਦੀ ਮਾਰੀ ਦਹਾੜ ਅਜਾਈਂ ਗਈ। ਦੋਆਬੇ ਦੇ ਆਨੰਦਪੁਰ ਸਾਹਿਬ ਹਲਕੇ ਤੋਂ ਸੂਬਾ ਮੁਖੀ ਜਸਵੀਰ ਸਿੰਘ ਗੜ੍ਹੀ ਖੁਦ ਪੰਜਵੇਂ ਸਥਾਨ ’ਤੇ ਆਏ। ਬਸਪਾ ਵੱਲੋਂ ਦੋਆਬੇ ਅੰਦਰ ਹੁਸ਼ਿਆਰਪੁਰ ਤੇ ਜਲੰਧਰ ਵਿੱਚ ਵੀ ਵੱਡੀ ਲੀਡ ਨਾਲ ਜਿੱਤ ਦੇ ਦਾਅਵੇ ਕੀਤੇ ਜਾ ਰਹੇ ਸਨ ਜਿਨ੍ਹਾਂ ਵਿੱਚੋਂ ਜਲੰਧਰ ਤੋਂ ਐਡਵੋਕੇਟ ਬਲਵਿੰਦਰ ਕੁਮਾਰ ਤੇ ਹੁਸ਼ਿਆਰਪੁਰ ਤੋਂ ਐਡਵੋਕੇਟ ਰਣਜੀਤ ਕੁਮਾਰ ਵੀ ਮੁਕਾਬਲੇ ’ਚ ਬੁਰੀ ਤਰ੍ਹਾਂ ਹਾਰ ਗਏ। ਪਾਰਟੀ ਦੇ ਵਿਧਾਇਕ ਨਛੱਤਰ ਪਾਲ ਨੇ ਕਿਹਾ ਕਿ ਜਿੱਤ ਹਾਰ ਆਪਣੀ ਥਾਂ ਮਹੱਤਵਪੂਰਨ ਹੈ ਪਰ ‘ਸਮਾਜਿਕ ਪ੍ਰੀਵਰਤਨ ਅਤੇ ਆਰਥਿਕ ਮੁਕਤੀ’ ਦੇ ਮਿਸ਼ਨ ਲਈ ਬਸਪਾ ਪਹਿਲਾਂ ਵੀ ਸੰਘਰਸ਼ਸ਼ੀਲ ਸੀ ਅਤੇ ਹੁਣ ਹੋਰ ਬਲ ਨਾਲ ਇਸ ਮਿਸ਼ਨ ਨੂੰ ਲੈ ਕੇ ਅੱਗੇ ਵਧੇਗੀ।

ਗੱਠਜੋੜ ਟੁੱਟਣ ਨਾਲ ਹੋਇਆ ਨੁਕਸਾਨ

ਬਸਪਾ ਦਾ ਅਕਾਲੀ ਦਲ ਨਾਲੋਂ ਚੋਣਾਂ ਦੇ ਮੌਕੇ ਗੱਠਜੋੜ ਟੁੱਟ ਜਾਣਾ ਉਸ ਦੀ ਹਾਰ ਦਾ ਵੱਡਾ ਕਾਰਨ ਬਣਿਆ। ਇਸ ਗੱਠਜੋੜ ਦੇ ਬਰਕਰਾਰ ਰਹਿਣ ਲਈ ਪਾਰਟੀ ਵਰਕਰ ਆਸਵੰਦ ਸਨ ਅਤੇ ਉਨ੍ਹਾਂ ਨੂੰ ਹੂੰਝਾਫੇਰ ਜਿੱਤ ਨਜ਼ਰ ਆਉਣ ਲੱਗ ਪਈ ਸੀ ਪਰ ਅਚਾਨਕ ਆਪਣੇ ਬਲਬੂਤੇ ਚੋਣ ਲੜਨ ਦਾ ਐਲਾਨ ਉਨ੍ਹਾਂ ਨੂੰ ਹੈਰਾਨ ਕਰ ਗਿਆ। ਇਹੀ ਕਾਰਨ ਹੋਇਆ ਕਿ ਦੋਆਬੇ ਵਿੱਚ ਵੀ ਬਸਪਾ ਨੂੰ ਹਾਰ ਦਾ ਮੂੰਹ ਦੇਖਣਾ ਪਿਆ।