ਬੀਐੱਸਐੱਫ ਨੇ ਜਿੱਤਿਆ ਦਸਮੇਸ਼ ਹਾਕਸ ਹਾਕੀ ਮੁਕਾਬਲਾ

ਜਗਮੋਹਨ ਸਿੰਘ
ਰੂਪਨਗਰ, 24 ਨਵੰਬਰ
ਕੈਬਨਿਟ ਮੰਤਰੀ ਪੰਜਾਬ ਹਰਜੋਤ ਸਿੰਘ ਬੈਂਸ ਨੇ ਕਿਹਾ ਕਿ ਸਿਹਤਮੰਦ ਜੀਵਨ ਸ਼ੈਲੀ ਅਪਣਾਉਣ ਲਈ ਨੌਜਵਾਨਾਂ ਨੂੰ ਖੇਡਾਂ ਆਪਣੇ ਰੋਜ਼ਮਰਾ ਦੀ ਜ਼ਿੰਦਗੀ ਵਿਚ ਸ਼ਾਮਲ ਕਰਨਾ ਚਾਹੀਦਾ ਹੈ। ਉਹ ਅੱਜ ਇੱਥੇ ਹਾਕਸ ਸਟੇਡੀਅਮ ਰੂਪਨਗਰ ਵਿੱਚ ਹਾਕੀ ਫੈਸਟੀਵਲ ਦੇ ਇਨਾਮ ਵੰਡ ਸਮਾਰੋਹ ’ਚ ਪੁੱਜੇ ਸਨ। ਉਨ੍ਹਾਂ ਵੱਲੋਂ ਬੀਐੱਸਐੱਫ ਦੀ ਜੇਤੂ ਟੀਮ ਨੂੰ 1.25 ਲੱਖ ਰੁਪਏ ਤੇ ਉਪ ਜੇਤੂ ਰਹੀ ਸੀਆਰਪੀਐਫ ਨੂੰ 75 ਹਜ਼ਾਰ ਰੁਪਏ ਦੀ ਰਕਮ ਦੇ ਕੇ ਸਨਮਾਨਿਆ ਗਿਆ।
ਉਨ੍ਹਾਂ ਇਸ ਟੂਰਨਾਮੈਂਟ ਤੇ ਇਨਾਮੀ ਰਕਮ ਪ੍ਰਦਾਨ ਕਰਨ ਲਈ ਐਮਡੀ ਚੀਮਾ ਬੁਆਇਲਰ ਹਰਦੀਪ ਸਿੰਘ ਚੀਮਾ ਦੀ ਸ਼ਲਾਘਾ ਕੀਤੀ। ਇਸ ਮੌਕੇ ਲੋਕ ਗਾਇਕ ਜਸਮੇਰ ਮਿਆਂਪੁਰੀ, ਜੱਗ ਸਿੱਧੂ ਅਤੇ ਪੰਜਾਬੀ ਐਕਟਰ ਹਰਬੀ ਸੰਘਾ ਨੇ ਆਏ ਹੋਏ ਖੇਡ ਪ੍ਰੇਮੀਆਂ ਦਾ ਮਨੋਰੰਜਨ ਕੀਤਾ।
ਇਸ ਮੌਕੇ ਐੱਸਐੱਸਪੀ ਗੁਲਨੀਤ ਸਿੰਘ ਖੁਰਾਣਾ, ਆਰਟੀਓ ਗੁਰਵਿੰਦਰ ਸਿੰਘ ਜੌਹਲ, ਤੇਗਇੰਦਰ ਕੌਰ ਚੀਮਾ, ਸਤਬੀਰ ਸਿੰਘ ਚੀਮਾ, ਰਿਟਾ. ਏ.ਆਈ.ਜੀ. ਜਸਵੀਰ ਸਿੰਘ ਰਾਏ ਅਤੇ ਇਸ ਸਮੁੱਚੇ ਮੈਚ ਦੀ ਕਮੈਂਟਰਿੰਗ ਪ੍ਰੋਫੈਸਰ ਮੱਖਣ ਸਿੰਘ ਹਕੀਮਪੁਰ ਅਤੇ ਬੀਰਾ ਰੈਲਮਾਜਰਾ ਵਲੋਂ ਕੀਤੀ ਗਈ।