ਲਾਪਤਾ ਠੇਕੇਦਾਰ ਦੀ ਲਾਸ਼ ਰਾਜਸਥਾਨ ਕੈਨਾਲ ’ਚੋਂ ਬਰਾਮਦ
ਜਗਤਾਰ ਸਮਾਲਸਰ/ਪ੍ਰਭ ਦਿਆਲ
ਏਲਨਾਬਾਦ/ਸਿਰਸਾ, 29 ਜੂਨ
ਜ਼ਿਲ੍ਹਾ ਪੁਲੀਸ ਕਪਤਾਨ ਵਿਕਰਾਂਤ ਭੂਸ਼ਣ ਵੱਲੋਂ ਗਠਿਤ ਸੀਆਈਏ ਅਤੇ ਰਾਣੀਆਂ ਥਾਣੇ ਦੀ ਵਿਸ਼ੇਸ਼ ਟੀਮ ਨੇ ਪਿਛਲੇ ਦੋ ਦਿਨਾਂ ਤੋਂ ਲਾਪਤਾ ਖਾਰੀਆ ਜ਼ੋਨ ਦੇ ਸ਼ਰਾਬ ਠੇਕੇਦਾਰ ਰਾਜਿੰਦਰ ਕੁਮਾਰ ਦੇ ਮਾਮਲੇ ਨੂੰ ਸੁਲਝਾਉਂਦਿਆਂ ਦੋ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਮੁੱਢਲੀ ਪੁੱਛਗਿੱਛ ਵਿੱਚ ਸਾਹਮਣੇ ਆਇਆ ਹੈ ਕਿ ਠੇਕੇਦਾਰ ਰਾਜਿੰਦਰ ਵਾਸੀ ਨੀਮਲਾ (ਏਲਨਾਬਾਦ) ਦੀ ਮੌਤ ਨਹੀਂ ਹੋਈ ਸੀ ਸਗੋਂ ਉਸ ਦਾ ਕਤਲ ਕਰ ਕੇ ਲਾਸ਼ ਨੂੰ ਰਾਜਸਥਾਨ ਕੈਨਾਲ ਵਿੱਚ ਸੁੱਟ ਦਿੱਤਾ ਗਿਆ ਸੀ। ਪੁਲੀਸ ਟੀਮ ਨੇ ਠੇਕੇਦਾਰ ਦੀ ਲਾਸ਼ ਬਰਾਮਦ ਕਰ ਕੇ ਪੋਸਟਮਾਰਟਮ ਲਈ ਸਿਰਸਾ ਦੇ ਨਾਗਰਿਕ ਹਸਪਤਾਲ ਭੇਜ ਦਿੱਤੀ ਹੈ ਅਤੇ ਕਾਰਵਾਈ ਕਰਦਿਆਂ ਦੋ ਮੁਲਜ਼ਮਾਂ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ ਹੈ। ਜ਼ਿਲ੍ਹਾ ਪੁਲੀਸ ਕਪਤਾਨ ਵਿਕਰਾਂਤ ਭੂਸ਼ਣ ਨੇ ਦੱਸਿਆ ਕਿ ਮੁਲਜ਼ਮਾਂ ਦੀ ਪਛਾਣ ਧਰਮਿੰਦਰ ਵਾਸੀ ਪਿੰਡ ਖਾਰੀਆ ਅਤੇ ਸੋਨੂੰ ਵਾਸੀ ਪਿੰਡ ਮਹਿਣਾ ਖੇੜਾ ਵਜੋਂ ਹੋਈ ਹੈ। ਉਨ੍ਹਾਂ ਦੱਸਿਆ ਕਿ 27 ਜੂਨ ਨੂੰ ਠੇਕੇਦਾਰ ਰਾਜਿੰਦਰ ਦੇ ਸਾਥੀ ਇੰਦਰਪਾਲ ਨੇ ਰਾਣੀਆਂ ਥਾਣੇ ਵਿੱਚ ਧਰਮਿੰਦਰ ਅਤੇ ਰਾਜਿੰਦਰ ਦੋਵਾਂ ਦੇ ਲਾਪਤਾ ਹੋਣ ਦੀ ਰਿਪੋਰਟ ਦਰਜ ਕਰਵਾਈ ਸੀ। ਉਨ੍ਹਾਂ ਸੀਆਈਏ ਸਿਰਸਾ ਅਤੇ ਰਾਣੀਆਂ ਥਾਣੇ ਦੀ ਵਿਸ਼ੇਸ਼ ਟੀਮ ਦਾ ਗਠਨ ਕਰਕੇ ਇਸ ਘਟਨਾ ਨੂੰ ਜਲਦੀ ਤੋਂ ਜਲਦੀ ਹੱਲ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਸਨ। ਪੁਲੀਸ ਟੀਮ ਨੇ ਅਹਿਮ ਸੁਰਾਗ ਇਕੱਠੇ ਕਰ ਕੇ 24 ਘੰਟਿਆਂ ਵਿੱਚ ਹੀ ਰਾਜਸਥਾਨ ਕੈਨਾਲ ਦੇ ਮਸੀਤਾ ਹੈੱਡ ਕੋਲੋਂ ਸ਼ਰਾਬ ਦੇ ਠੇਕੇਦਾਰ ਰਾਜਿੰਦਰ ਕੁਮਾਰ ਦੀ ਲਾਸ਼ ਬਰਾਮਦ ਕਰ ਲਈ ਅਤੇ ਕਤਲ ਦੇ ਦੋ ਮੁਲਜ਼ਮਾਂ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ। ਉਨ੍ਹਾਂ ਦੱਸਿਆ ਕਿ ਮਾਮਲੇ ਦੀ ਜਾਂਚ ਜਾਰੀ ਹੈ।