ਯਮੁਨਾ ਕੰਢਿਓਂ ਲੜਕੀ ਦੀ ਲਾਸ਼ ਬਰਾਮਦ

ਪੱਤਰ ਪ੍ਰੇਰਕ
ਫਰੀਦਾਬਾਦ, 27 ਮਾਰਚ
ਫਰੀਦਾਬਾਦ ਪੁਲੀਸ ਨੂੰ ਯਮੁਨਾ ਨਦੀ ਕੰਢਿਓਂ ਇੱਕ ਲੜਕੀ ਦੀ ਲਾਸ਼ ਬਰਾਮਦ ਹੋਈ ਹੈ। ਪੁਲੀਸ ਨੂੰ ਲੜਕੀ ਦੇ ਕਤਲ ਦਾ ਸ਼ੱਕ ਹੈ। ਪੁਲੀਸ ਮੁਤਾਬਕ ਲੜਕੀ ਦੇ ਗਲੇ ’ਤੇ ਸੱਟ ਦੇ ਨਿਸ਼ਾਨ ਹਨ। ਲੜਕੀ ਦੀ ਪਛਾਣ ਕਰਨ ਲਈ ਕੇਜੀਪੀ ’ਤੇ ਲਗਾਏ 111 ਕੈਮਰਿਆਂ ਦੀ ਫੁਟੇਜ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਅਜਿਹੇ ’ਚ ਪੁਲੀਸ ਨੇ ਲੜਕੀ ਦੇ ਸੰਸਕਾਰ ਲਈ ਮੈਡੀਕਲ ਅਫਸਰ ਤੋਂ 12 ਦਿਨਾਂ ਦੀ ਇਜਾਜ਼ਤ ਮੰਗੀ ਹੈ। ਪੁਲੀਸ ਚੌਕੀ ਚਾਂਦਪੁਰ ਦੇ ਇੰਚਾਰਜ ਓਮ ਪ੍ਰਕਾਸ਼ ਨੇ ਦੱਸਿਆ ਕਿ ਡਾਕਟਰਾਂ ਅਨੁਸਾਰ ਲੜਕੀ ਦੀ ਗਰਦਨ ’ਤੇ ਸੱਟ ਦੇ ਨਿਸ਼ਾਨ ਹਨ। ਲੜਕੀ ਦੀ ਇਕ ਲੱਤ ਪੂਰੀ ਤਰ੍ਹਾਂ ਟੁੱਟ ਗਈ ਹੈ। ਇਹ ਵੀ ਖਦਸ਼ਾ ਜਤਾਇਆ ਜਾ ਰਿਹਾ ਹੈ ਕਿ ਲੜਕੀ ਦਾ ਗਲਾ ਘੁੱਟ ਕੇ ਹੱਤਿਆ ਕਰਨ ਤੋਂ ਬਾਅਦ ਉਸ ਨੂੰ ਕੇਜੀਪੀ ਪੁਲ ਤੋਂ ਸੁੱਟ ਦਿੱਤਾ ਗਿਆ ਹੋਵੇ। ਲੜਕੀ ਦੀ ਪਛਾਣ ਲਈ ਪੁਲੀਸ ਕਾਰਵਾਈ ਕਰ ਰਹੀ ਹੈ।