ਬੀਐੱਮਡਬਲਿਊ ਹਾਦਸੇ ਸਮੇਂ ਨਸ਼ੇ ’ਚ ਸੀ ਮੁੱਖ ਮੁਲਜ਼ਮ: ਪੁਲੀਸ
ਮੁੰਬਈ:
ਇੱਥੋਂ ਦੇ ਬੀਐਮਡਬਲਿਊ ਹਿੱਟ ਐਂਡ ਰਨ ਕੇਸ ਵਿਚ ਪੁਲੀਸ ਨੇ ਖੁਲਾਸਾ ਕੀਤਾ ਕਿ ਹਾਦਸੇ ਵੇਲੇ ਕਾਰ ਚਾਲਕ ਮਿਹਿਰ ਸ਼ਾਹ ਨੇ ਨਸ਼ਾ ਕੀਤਾ ਹੋਇਆ ਸੀ ਤੇ ਉਸ ਨੂੰ ਸੁੱਧ ਬੁੱਧ ਨਹੀਂ ਸੀ। ਦੂਜੇ ਪਾਸੇ ਅਦਾਲਤ ਨੇ ਇਸ ਮਾਮਲੇ ਦੇ ਸਹਿ-ਮੁਲਜ਼ਮ ਕਾਰ ਚਾਲਕ ਨੂੰ 14 ਦਿਨਾਂ ਦੀ ਨਿਆਂਇਕ ਹਿਰਾਸਤ ਵਿਚ ਭੇਜ ਦਿੱਤਾ ਹੈ। ਇਸ ਹਾਦਸੇ ’ਚ ਇੱਕ ਮਹਿਲਾ ਦੀ ਮੌਤ ਹੋ ਗਈ ਸੀ। ਮਾਮਲੇ ਦੀ ਜਾਂਚ ਕਰ ਰਹੀ ਪੁਲੀਸ ਟੀਮ ਨੇ ਵਧੇਰੇ ਜਾਣਕਾਰੀ ਲਈ ਘਟਨਾ ਸਥਾਨ ’ਤੇ ਜਾ ਕੇ ਹਾਦਸੇ ਦਾ ਦ੍ਰਿਸ਼ ਮੁੜ ਸਿਰਜਿਆ। ਇਸ ਤੋਂ ਇਲਾਵਾ ਟੀਮ ਨੇ ਮਿਹਿਰ ਸ਼ਾਹ ਅਤੇ ਉਸ ਦੇ ਪਰਿਵਾਰ ਦੇ ਡਰਾਈਵਰ ਤੇ ਕੇਸ ਵਿੱਚ ਸਹਿ-ਮੁਲਜ਼ਮ ਰਾਜਰਿਸ਼ੀ ਬਿਦਾਵਤ ਤੋਂ ਇੱਕ-ਦੂਜੇ ਦੇ ਸਾਹਮਣੇ ਪੁੱਛ ਪੜਤਾਲ ਕੀਤੀ, ਜੋ ਹਾਦਸੇ ਸਮੇਂ ਕਾਰ ’ਚ ਸਵਾਰ ਸੀ। ਅਧਿਕਾਰੀ ਨੇ ਦੱਸਿਆ ਕਿ ਸ਼ਾਹ ਨੂੰ ਲੰਘੇ ਮੰਗਲਵਾਰ ਗੁਆਂਢੀ ਪਾਲਘਰ ਜ਼ਿਲ੍ਹੇ ਦੇ ਵਿਰਾਰ ਫਾਟਾ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ ਅਤੇ ਵਰਲੀ ਪੁਲੀਸ ਉਸ ਤੋਂ ਪੁੱਛ ਪੜਤਾਲ ਕਰ ਰਹੀ ਹੈ। ਉਨ੍ਹਾਂ ਦੱਸਿਆ, ‘ਸਾਡੀ ਜਾਂਚ ’ਚ ਪਤਾ ਚੱਲਿਆ ਹੈ ਕਿ ਹਾਦਸੇ ਸਮੇਂ ਉਹ (ਮਿਹਿਰ ਸ਼ਾਹ) ਸ਼ਰਾਬ ਦੇ ਨਸ਼ੇ ’ਚ ਸੀ।’ -ਪੀਟੀਆਈ