ਭਾਜਪਾ ਵੱਲੋਂ ਕੇਜਰੀਵਾਲ ਦੇ ਬੰਗਲੇ ਦੀ ਵੀਡੀਓ ਜਾਰੀ

ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 10 ਦਸੰਬਰ
ਦਿੱਲੀ ਦੇ ਸਾਬਕਾ ਮੁੱਖ ਮੰਤਰੀ ਅਤੇ ਆਮ ਆਦਮੀ ਪਾਰਟੀ ਦੇ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਦੀ ਸਰਕਾਰੀ ਰਿਹਾਇਸ਼ ਨੂੰ ‘ਸ਼ੀਸ਼ ਮਹਿਲ’ ਕਹਿੰਦੇ ਹੋਏ, ਭਾਜਪਾ ਨੇ ਸਿਵਲ ਲਾਈਨ ਬੰਗਲੇ ਦਾ ਦੌਰਾ ਕਰਨ ਵਾਲੀ ਚਾਰ ਮਿੰਟ ਦੀ ਵੀਡੀਓ ਜਾਰੀ ਕੀਤੀ ਹੈ। ਇੱਥੇ ‘ਆਪ’ ਦੇ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਜਦੋਂ ਦਿੱਲੀ ਦੇ ਮੁੱਖ ਮੰਤਰੀ ਸਨ ਤਾਂ ਰਹਿੰਦੇ ਸਨ। ਭਾਜਪਾ ਨੇ ਇੱਕ ਰੈਪ ਗੀਤ ‘ਦਿੱਲੀ ਕਾ ਕਰੋੜਪਤੀ’ ਵੀ ਸਾਂਝਾ ਕੀਤਾ, ਜਿਸ ਵਿੱਚ ਆਮ ਆਦਮੀ ਪਾਰਟੀ ਦੇ ਨੇਤਾਵਾਂ ਅਤੇ ਮੰਤਰੀਆਂ ਵਿਰੁੱਧ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਨੂੰ ਉਜਾਗਰ ਕੀਤਾ ਗਿਆ। ਇਸ ਤੋਂ ਪਹਿਲਾਂ ਭਾਜਪਾ ਨੇ ਦੋਸ਼ ਲਗਾਇਆ ਸੀ ਕਿ ਕੇਜਰੀਵਾਲ ਨੇ ਸਿਵਲ ਲਾਈਨ ਵਿੱਚ ਮਕਾਨ ਨਿਯਮਾਂ ਨੂੰ ਛਿੱਕੇ ਟੰਗ ਕੇ ਬਣਾਇਆ ਗਿਆ ਹੈ। ਹੁਣ ਜਿਵੇਂ ਹੀ ਦਿੱਲੀ ਵਿਧਾਨ ਸਭਾ ਚੋਣਾਂ ਨੇੜੇ ਆ ਰਹੀਆਂ ਹਨ ਤਾਂ ਭਾਜਪਾ ਨੇ ਬੰਗਲੇ ’ਤੇ ਰੌਸ਼ਨੀ ਪਾਉਣ ਦਾ ਫੈਸਲਾ ਕੀਤਾ ਹੈ। ਅੱਜ ਐਕਸ ’ਤੇ ਦਿੱਲੀ ਭਾਜਪਾ ਦੇ ਮੁਖੀ ਵਰਿੰਦਰ ਸੱਚਦੇਵਾ ਵੱਲੋਂ ਸ਼ੇਅਰ ਕੀਤੇ ਗਏ ਬੰਗਲੇ ਦੀ ਵੀਡੀਓ, ਇਸ ਦੇ ਗੇਟ ਤੋਂ ਸ਼ੁਰੂ ਹੁੰਦੀ ਹੈ ਅਤੇ ਹੋਰ ਸਹੂਲਤਾਂ ਦੇ ਨਾਲ-ਨਾਲ ਇੱਕ ਚੰਗੀ ਤਰ੍ਹਾਂ ਲੈਸ ਜਿਮ ਅਤੇ ਇੱਕ ਸਪਾ-ਕਮ-ਬਾਥਰੂਮ ਦਿਖਾਉਣ ਲਈ ਅੱਗੇ ਵਧਦੀ ਹੈ। ਇਹ ਵੀਡੀਓ ਵਾਸ਼ਰੂਮ ਖੇਤਰ ਦੇ ਅੰਦਰ ਸਥਾਪਤ ਇੱਕ ਝੰਡੇ, ਇੱਕ ਮਸਾਜ ਟੇਬਲ, ਜੈਕੂਜ਼ੀ ਅਤੇ ਸੈਂਸਰ ਨਾਲ ਲੈਸ ਸ਼ਾਵਰ ਨੂੰ ਵੀ ਉਜਾਗਰ ਕਰਦੀ ਹੈ। ਬੰਗਲਾ ਬਣਾਉਣ ਦੇ ਇਸ ਮਾਮਲੇ ਵਿੱਚ ਲੋਕ ਨਿਰਮਾਣ ਵਿਭਾਗ ਦੇ ਅਧਿਕਾਰੀਆਂ ਖ਼ਿਲਾਫ਼ ਜਾਂਚ ਚੱਲ ਰਹੀ ਹੈ।
ਐਕਸ ’ਤੇ ਵੀਡੀਓ ਪੋਸਟ ਕਰਦੇ ਹੋਏ, ਸਚਦੇਵਾ ਨੇ ਲਿਖਿਆ, ‘ਦਿੱਲੀ ਕੀ ਜਨਤਾ ਕੀ ਖੂਨ ਪਸੀਨੇ ਕੀ ਕਮਾਈ ਲੁਟ ਕਰ ‘ਖਾਸ’ ਆਮ ਆਦਮੀ ਨੇ ਖੜ੍ਹਾ ਕੀਆ ਸ਼ੀਸ਼ ਮਹਿਲ। ਦੇਖੀਏ ਗੱਡੀ, ਬੰਗਲਾ, ਸੁਰੱਖਿਆ ਨਹੀਂ ਕਹਿਨੇ ਵਾਲਾ ਕੇਜਰੀਵਾਲ ਦੇ ਸ਼ੀਸ਼ ਮਹਿਲ ਦੀ ਸ਼ਾਨ-ਓ-ਸ਼ੌਕਤ। ’ਦੇਖੋ ਇਸ ਸ਼ੀਸ਼ ਮਹਿਲ ਦਾ ਘਰ। ਐਕਸ ’ਤੇ ਪੋਸਟ ਕੀਤੇ ਗਏ ਰੈਪ ਗੀਤ ‘ਕੇਜੂ ਹੈ ਦਿੱਲੀ ਕਾ ਕਰੋੜਪਤੀ” ਨੂੰ ਭ੍ਰਿਸਟਾਚਾਰੀ ‘ਆਪ’ ਹੈਸ਼ਟੈਗ ਦੇ ਹੇਠਾਂ ਸਾਂਝਾ ਕੀਤਾ ਗਿਆ। ਦਿੱਲੀ ਭਾਜਪਾ ਦੇ ਪ੍ਰਧਾਨ ਵਰਿੰਦਰ ਸਚਦੇਵਾ ਨੇ ਕਿਹਾ ਕਿ ਵੀਡੀਓ ਦੇਖੋ, ਇਹ ਕੋਈ ਸਾਧਾਰਨ ਘਰ ਨਹੀਂ ਹੈ, ਇਹ ਭ੍ਰਿਸ਼ਟਾਚਾਰ ਦਾ ਅਜਾਇਬ ਘਰ ਹੈ... ਆਪਣੇ ਆਪ ਨੂੰ ਜਨਤਾ ਦਾ ਆਦਮੀ ਕਹਿਣ ਵਾਲੇ ਕੇਜਰੀਵਾਲ ਨੇ ਸੌਨਾ ਅਤੇ ਜੈਕੂਜ਼ੀ ਦਾ ਆਨੰਦ ਲੈਣ ਲਈ ਲੋਕਾਂ ਨੂੰ ਲੁੱਟਿਆ ਹੈ।’ਭਾਜਪਾ ਦੇ ਇੱਕ ਸੀਨੀਅਰ ਨੇਤਾ ਨੇ ਕਿਹਾ ਕਿ ਅਸੀਂ ਕੇਜਰੀਵਾਲ ਦੇ ਆਮ ਆਦਮੀ ਦੇ ਅਕਸ ਨੂੰ ਤੋੜਨ ਲਈ ਨਿਸ਼ਚਤ ਤੌਰ ’ਤੇ ਹੋਰ ਵੀਡੀਓ ਜਾਰੀ ਕਰਾਂਗੇ। ਉਨ੍ਹਾਂ ਕਿਹਾ ਕਿ ਪਾਰਟੀ ਆਪਣੀ ਮੁਹਿੰਮ ਦੌਰਾਨ ਵੀਡੀਓ ਅਤੇ ਗੀਤ ਚਲਾਏਗੀ ਅਤੇ ਇਸ ਲਈ ਇੱਕ ਕਮੇਟੀ ਬਣਾਈ ਗਈ ਹੈ।

ਭਾਜਪਾ ਲੋਕਾਂ ਦਾ ਅਹਿਮ ਮੁੱਦਿਆਂ ਤੋਂ ਹਟਾ ਰਹੀ ਹੈ ਧਿਆਨ: ਸਿਸੋਦੀਆ

ਦਿੱਲੀ ਦੇ ਸਾਬਕਾ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ਭਾਜਪਾ ’ਤੇ ਦਿੱਲੀ ਦੇ 40 ਸਕੂਲਾਂ ਵਿੱਚ ਹਾਲ ਹੀ ਵਿੱਚ ਬੰਬ ਦੀ ਧਮਕੀ ਸਣੇ ਹੋਰ ਅਹਿਮ ਮੁੱਦਿਆਂ ਤੋਂ ਧਿਆਨ ਹਟਾਉਣ ਦਾ ਦੋਸ਼ ਲਗਾਇਆ ਹੈ। ਆਮ ਆਦਮੀ ਪਾਰਟੀ ਦੇ ਸੀਨੀਅਰ ਆਗੂ ਨੇ ਦਿੱਲੀ ਭਾਜਪਾ ਦੇ ਮੁਖੀ ਵਰਿੰਦਰ ਸਚਦੇਵਾ ਵੱਲੋਂ ਅਰਵਿੰਦ ਕੇਜਰੀਵਾਲ ਦੇ ਮੁੱਖ ਮੰਤਰੀ ਹੁੰਦਿਆਂ ਉਨ੍ਹਾਂ ਦੀ ਸਾਬਕਾ ਸਰਕਾਰੀ ਰਿਹਾਇਸ਼ ਸਬੰਧੀ ਲਾਏ ਗਏ ਦੋਸ਼ਾਂ ਨੂੰ ਭਾਜਪਾ ਵੱਲੋਂ ਬੇਬੁਨਿਆਦ ਪ੍ਰਚਾਰ ਕਰਾਰ ਦਿੰਦਿਆਂ ਇਨ੍ਹਾਂ ਦੋਸ਼ਾਂ ਨੂੰ ਖਾਰਜ ਕੀਤਾ ਹੈ। ਸ੍ਰੀ ਸਿਸੋਦੀਆ ਨੇ ਕਿਹਾ ਕਿ ਭਾਜਪਾ ਕੋਲ ਕੋਈ ਦੱਸਣ ਲਈ ਪ੍ਰਾਪਤੀਆਂ ਨਹੀਂ ਹਨ। ਉਨ੍ਹਾਂ ਕਿਹਾ ਕਿ ਹਰਿਆਣਾ ਅਤੇ ਉੱਤਰ ਪ੍ਰਦੇਸ਼ ਵਰਗੇ ਰਾਜਾਂ ਵਿੱਚ ਸਕੂਲਾਂ, ਮਿਡ-ਡੇਅ ਮੀਲ ਅਤੇ ਹਸਪਤਾਲਾਂ ਲਈ ਫੰਡਾਂ ਦੇ ਦੁਰਪ੍ਰਬੰਧ ਬਾਰੇ ਗੰਭੀਰ ਸਵਾਲਾਂ ਦੇ ਜਵਾਬ ਦੇਣ ਦੀ ਬਜਾਏ, ਉਹ ਕੇਜਰੀਵਾਲ ਦੀ ਸਾਬਕਾ ਸਰਕਾਰੀ ਰਿਹਾਇਸ਼ ’ਤੇ ਧਿਆਨ ਕੇਂਦਰਤ ਕਰ ਰਹ ਹਨ। ਲੋਕ ਸਿੱਖਿਆ ਅਤੇ ਸਿਹਤ ਸੁਧਾਰਾਂ ਬਾਰੇ ਪੁੱਛਦੇ ਹਨ, ਉਹ ਇੱਕ ਬੰਗਲੇ ਦੀ ਗੱਲ ਕਰਦੇ ਹਨ। ਸਿਸੋਦੀਆ ਨੇ ਭਾਜਪਾ ’ਤੇ ਦਿੱਲੀ ਦੇ 40 ਸਕੂਲਾਂ ਵਿੱਚ ਹਾਲ ਹੀ ਵਿੱਚ ਬੰਬ ਦੀ ਧਮਕੀ ਸਣੇ ਹੋਰ ਅਹਿਮ ਮੁੱਦਿਆਂ ਤੋਂ ਧਿਆਨ ਹਟਾਉਣ ਦਾ ਦੋਸ਼ ਲਗਾਇਆ। ਉਨ੍ਹਾਂ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਤੋਂ ਰਾਸ਼ਟਰੀ ਰਾਜਧਾਨੀ ਵਿੱਚ ਵਿਗੜਦੀ ਕਾਨੂੰਨ ਵਿਵਸਥਾ ’ਤੇ ਜਵਾਬ ਮੰਗਿਆ। ਇਸ ਦੌਰਾਨ ਆਪਣੀ ਚੋਣ ਮੁਹਿੰਮ ਸ਼ੁਰੂ ਕਰਦਿਆਂ ‘ਆਪ’ ਆਗੂ ਮਨੀਸ਼ ਸਿਸੋਦੀਆ ਆਪਣੀ ਪਤਨੀ ਸੀਮਾ ਸਿਸੋਦੀਆ ਨਾਲ ਨਵੀਂ ਦਿੱਲੀ ਦੇ ਅੰਗੂਰੀ ਦੇਵੀ ਮੰਦਰ ਵਿੱਚ ਨਤਮਸਤਕ ਹੋਏ। ‘ਆਪ’ ਆਗੂ ਪ੍ਰਵੀਨ ਕੁਮਾਰ ਦੇਸ਼ਮੁਖ ਨੇ ਭਾਜਪਾ ਨੂੰ ‘ਪ੍ਰਚਾਰ ਦੀ ਪਾਰਟੀ’ ਕਿਹਾ। ਉਨ੍ਹਾਂ ਅੱਗੇ ਕਿਹਾ ਕਿ ਉਹ ਕਦੇ ਵੀ ਡੀਡੀਏ ਦੁਆਰਾ ਕਾਨੂੰਨ ਅਤੇ ਵਿਵਸਥਾ ਜਾਂ ਨਾਜਾਇਜ਼ ਕਬਜ਼ਿਆਂ ਵਰਗੇ ਮੁੱਦਿਆਂ ਨੂੰ ਹੱਲ ਨਹੀਂ ਕਰਨਗੇ। ਇਸ ਦੀ ਬਜਾਏ, ਉਹ ਬੇਬੁਨਿਆਦ ਦਾਅਵਿਆਂ ਨਾਲ ਜਨਤਾ ਨੂੰ ਗੁੰਮਰਾਹ ਕਰਦੇ ਹਨ। ਲੋਕ ਦੇਖ ਰਹੇ ਹਨ ਅਤੇ ਉਹ ਆਉਣ ਵਾਲੀਆਂ ਚੋਣਾਂ ਵਿੱਚ ਜਵਾਬ ਦੇਣਗੇ।

ਸਾਬਕਾ ਉਪ ਮੁੱਖ ਮੰਤਰੀ ਸਿਸੋਦੀਆ ਵੱਲੋਂ ਪ੍ਰਚਾਰ ਸ਼ੁਰੂ

ਨਵੀਂ ਦਿੱਲੀ (ਪੱਤਰ ਪ੍ਰੇਰਕ):

ਇੱਥੇ ਪੜਪੜਗੰਜ ਸੀਟ ਛੱਡਣ ਤੋਂ ਇੱਕ ਦਿਨ ਬਾਅਦ, ‘ਆਪ’ ਨੇਤਾ ਮਨੀਸ਼ ਸਿਸੋਦੀਆ ਨੇ ਅੱਜ ਆਪਣੇ ਨਵੇਂ ਹਲਕੇ ਜੰਗਪੁਰਾ ਵਿੱਚ ਸਥਾਨਕ ਵਾਸੀਆਂ ਨਾਲ ‘ਹਨੂੰਮਾਨ ਚਾਲੀਸਾ’ ਦੇ ਪਾਠ ਵਿੱਚ ਸ਼ਾਮਲ ਹੋ ਕੇ ਆਪਣੀ ਚੋਣ ਮੁਹਿੰਮ ਦੀ ਸ਼ੁਰੂਆਤ ਕੀਤੀ। ਦਿੱਲੀ ਦੇ ਸਾਬਕਾ ਉਪ ਮੁੱਖ ਮੰਤਰੀ ਨੇ ਪਿਛਲੇ ਸਮੇਂ ਵਿੱਚ ਆਪਣੇ ਆਪ ਨੂੰ ‘ਹਨੂਮਾਨ ਭਗਤ’ ਹੋਣ ਦਾ ਦਾਅਵਾ ਕੀਤਾ ਹੈ। ‘ਆਪ’ ਨੇ ਪੜਪੜਗੰਜ ਹਲਕੇ ਤੋਂ ਸਿਸੋਦੀਆ ਦੀ ਥਾਂ ਕੋਚਿੰਗ ਮਾਹਿਰ ਅਵਧ ਓਝਾ ਨੂੰ ਲਿਆ ਹੈ, ਜੋ ਹਾਲ ਹੀ ਵਿੱਚ ਪਾਰਟੀ ਵਿੱਚ ਸ਼ਾਮਲ ਹੋਏ ਹਨ। ਜ਼ਿਕਰਯੋਗ ਹੈ ਕਿ 2020 ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਸਿਸੋਦੀਆ ਬੜੀ ਮੁਸ਼ਕਲ ਨਾਲ ਪੜਪੜਗੰਜ ਤੋਂ ਜਿੱਤੇ ਸਨ। ਸ੍ਰੀ ਸਿਸੋਦੀਆ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨੂੰ ਸਿੱਖਿਆ ਮੰਤਰੀ ਅਤੇ ਉਪ ਮੁੱਖ ਮੰਤਰੀ ਵਜੋਂ ਲੋਕਾਂ ਦਾ ਬਹੁਤ ਪਿਆਰ ਮਿਲਿਆ ਹੈ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਕੋਈ ਫਰਕ ਨਹੀਂ ਪੈਂਦਾ ਕਿ ਕੋਈ ਕਿਸ ਹਲਕੇ ਤੋਂ ਚੋਣ ਲੜਦਾ ਹੈ। ਇੱਥੋਂ ਤੱਕ ਕਿ ਪੜਪੜਗੰਜ ਤੋਂ ਵਿਧਾਇਕ ਅਤੇ ਉਪ ਮੁੱਖ ਮੰਤਰੀ ਹੋਣ ਦੇ ਨਾਤੇ ਉਨ੍ਹਾਂ ਜੰਗਪੁਰਾ ਲਈ ਬਹੁਤ ਕੰਮ ਕੀਤਾ ਅਤੇ ਨਿੱਜੀ ਤੌਰ ‘ਤੇ ਇੱਥੇ ਸਕੂਲ ਬਣਾਉਣ ‘ਤੇ ਨਜ਼ਰ ਰੱਖੀ। ਜੇ ਉਹ ਹੁਣ ਜੰਗਪੁਰਾ ਤੋਂ ਵਿਧਾਇਕ ਚੁਣੇ ਜਾਂਦੇ ਹਨ ਤਾਂ ਉਹ ਪੂਰੀ ਦਿੱਲੀ ਲਈ ਕੰਮ ਕਰੇਗਾ।