ਭਾਜਪਾ ਨੂੰ ਹਰਾਇਆ ਜਾ ਸਕਦੈ: ਊਧਵ ਠਾਕਰੇ

ਮੁੰਬਈ, 5 ਜੂਨ
ਸ਼ਿਵ ਸੈਨਾ (ਯੂਬੀਟੀ) ਨੇ ਲੋਕ ਸਭਾ ਚੋਣਾਂ ਵਿੱਚ ਆਪਣੀ ਪਾਰਟੀ ਦੇ ਜੇਤੂ ਉਮੀਦਵਾਰਾਂ ਨਾਲ ਮੁਲਾਕਾਤ ਦੌਰਾਨ ਕਿਹਾ ਕਿ ਇਨ੍ਹਾਂ ਚੋਣਾਂ ਨੇ ਸਾਬਤ ਕਰ ਦਿੱਤਾ ਹੈ ਕਿ ਭਾਜਪਾ ਨੂੰ ਹਰਾਇਆ ਜਾ ਸਕਦਾ ਹੈ। ਨਾਸਿਕ ਤੋਂ ਸ਼ਿਵ ਸੈਨਾ (ਯੂਬੀਟੀ) ਦੇ ਜੇਤੂ ਉਮੀਦਵਾਰ ਰਾਜਾਭਾਊ ਪ੍ਰਕਾਸ਼ ਵਾਜੇ (ਨਾਸਿਕ) ਅਤੇ ਮੁੰਬਈ ਉੱਤਰ-ਪੂਰਬੀ ਤੋਂ ਜੇਤੂ ਸੰਜੈ ਦੀਨਾ ਪਾਟਿਲ ਨੇ ਚੋਣ ਨਤੀਜਿਆਂ ਦੇ ਐਲਾਨ ਤੋਂ ਇਕ ਦਿਨ ਬਾਅਦ ਅੱਜ ਮਹਾਰਾਸ਼ਟਰ ਦੇ ਸਾਬਕਾ ਮੁੱਖ ਮੰਤਰੀ ਊਧਵ ਠਾਕਰੇ ਨਾਲ ਉਨ੍ਹਾਂ ਦੀ ਰਿਹਾਇਸ਼ ’ਤੇ ਮੁਲਾਕਾਤ ਕੀਤੀ। ਇਸ ਦੌਰਾਨ ਠਾਕਰੇ ਨੇ ਕਿਹਾ, “ਚੋਣਾਂ ਨੇ ਦਿਖਾ ਦਿੱਤਾ ਹੈ ਕਿ ਭਾਜਪਾ ਨੂੰ ਹਰਾਇਆ ਜਾ ਸਕਦਾ ਹੈ। ਇਹ ਭਰਮ (ਕਿ ਉਸ ਨੂੰ ਹਰਾਇਆ ਨਹੀਂ ਜਾ ਸਕਦਾ) ਟੁੱਟ ਗਿਆ ਹੈ।’’
ਬੀਤੀ ਸ਼ਾਮ ਠਾਕਰੇ ਨੇ ਮੁੰਬਈ ਦੱਖਣੀ ਸੀਟ ਤੋਂ ਜੇਤੂ ਉਮੀਦਵਾਰ ਅਰਵਿੰਦ ਸਾਵੰਤ ਅਤੇ ਮੁੰਬਈ ਦੱਖਣ-ਕੇਂਦਰੀ ਸੀਟ ਤੋਂ ਜੇਤੂ ਅਨਿਲ ਦੇਸਾਈ ਨਾਲ ਮੁਲਾਕਾਤ ਕੀਤੀ ਸੀ। ਜ਼ਿਕਰਯੋਗ ਹੈ ਕਿ ਸ਼ਿਵ ਸੈਨਾ (ਯੂਬੀਟੀ) ਨੇ ਇਨ੍ਹਾਂ ਚੋਣਾਂ ਦੌਰਾਨ ਕੁੱਲ ਨੌਂ ਸੀਟਾਂ ਜਿੱਤੀਆਂ ਹਨ। -ਪੀਟੀਆਈ