ਕੁੱਟਮਾਰ ਮਾਮਲਾ: ਪੁਲੀਸ ਨੇ ਹਾਲੇ ਤੱਕ ਦਰਜ ਨਹੀਂ ਕੀਤਾ ਕੇਸ

ਬਰਨਾਲਾ/ਧਨੌਲਾ (ਰਵਿੰਦਰ ਰਵੀ): ਧਨੌਲਾ ਪੁਲੀਸ ਨੇ 24 ਘੰਟੇ ਬੀਤ ਜਾਣ ਦੇ ਬਾਵਜੂਦ ਬਡਬਰ ਟੌਲ ਪਲਾਜ਼ਾ ਵਾਲਿਆਂ ਵੱਲੋਂ ਬੈਂਡ ਵਾਲੇ ਪਿਉ-ਪੁੱਤ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕਰਨ ਦੇ ਮਾਮਲੇ ਵਿੱਚ ਪਰਚਾ ਦਰਜ ਨਹੀਂ ਕੀਤਾ ਸਗੋਂ ਬਿਆਨ ਦਰਜ ਕਰਕੇ ਹੀ ਪੜਤਾਲ ਕੀਤੀ ਜਾ ਰਹੀ ਹੈ। ਜ਼ਿਕਰਯੋਗ ਹੈ ਕਿ ਬੀਤੀ ਰਾਤ ਤਕਰੀਬਨ 2 ਵਜੇ ਬਰਨਾਲਾ ਦੇ ਵਾਜੇ ਵਾਲੇ (ਬੈਂਡ ਵਾਲੇ) ਪਟਿਆਲਾ ਵਿਚ ਆਪਣਾ ਪ੍ਰੋਗਰਾਮ ਕਰਕੇ ਵਾਪਸ ਬਰਨਾਲਾ ਆ ਰਹੇ ਸਨ ਤਾਂ ਬਡਬਰ ਟੌਲ ਪਲਾਜ਼ਾ ਟੌਲ ਦੇ ਮੁਲਾਜ਼ਮਾਂ ਵੱਲੋਂ ਕਥਿਤ ਬੈਂਡ ਮਾਲਕ ਗੋਪਾਲ ਚੰਦ ਅਤੇ ਉਸ ਦੇ ਪਿਤਾ ਸੁੰਦਰ ਲਾਲ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ ਗਈ। ਦੋਵਾਂ ਨੂੰ ਜ਼ਖ਼ਮੀ ਹਾਲਤ ਧਨੌਲਾ ਦੇ ਸਿਵਲ ਹਸਪਤਾਲ ’ਚ ਦਾਖ਼ਲ ਕਰਵਾਇਆ ਗਿਆ,­ ਜਿੱਥੇ ਡਾਕਟਰਾਂ ਨੇ ਸੁੰਦਰ ਲਾਲ ਦੀ ਗੰਭੀਰ ਹਾਲਤ ਨੂੰ ਦੇਖਦਿਆਂ ਉਸ ਨੂੰ ਫਰੀਦਕੋਟ ਦੇ ਸਰਕਾਰੀ ਹਸਪਤਾਲ ਵਿੱਚ ਰੈਫਰ ਕਰ ਦਿੱਤਾ ਹੈ। ਧਨੌਲਾ ਥਾਣਾ ਇੰਚਾਰਜ ਲਖਵੀਰ ਸਿੰਘ ਨੇ ਉਨ੍ਹਾਂ ਕਿਹਾ ਕਿ ਬਡਬਰ ਟੌਲ ਪਲਾਜ਼ਾ ਵਾਲਿਆਂ ਦਾ ਵੀ ਇੱਕ ਮੁਲਾਜ਼ਮ ਹਸਪਤਾਲ ਵਿੱਚ ਦਾਖਲ ਹੈ ਅਤੇ ਦੋਵੇਂ ਧਿਰਾਂ ਦੇ ਬਿਆਨ ਦਰਜ ਕਰ ਲਏ ਹਨ। ਡਾਕਟਰਾਂ ਮੁਤਾਬਕ ਬੈਂਡ ਵਾਲੇ ਗੋਪਾਲ ਚੰਦ ਦਾ ਪਿਤਾ ਸੁੰਦਰ ਲਾਲ ਹਾਲੇ ਬਿਆਨ ਦੇਣ ਦੀ ਹਾਲਤ ’ਚ ਨਹੀਂ ਹੈ।