ਸਰਹੱਦੀ ਖੇਤਰ ’ਚੋਂ ਸ਼ੱਕੀ ਹਾਲਤ ਵਿੱਚ ਬੰਗਲਾਦੇਸ਼ੀ ਕਾਬੂ

ਤਰਨ ਤਾਰਨ (ਪੱਤਰ ਪ੍ਰੇਰਕ): ਥਾਣਾ ਖਾਲੜਾ ਦੇ ਏਐੱਸਆਈ ਹਰੀ ਸਿੰਘ ਦੀ ਅਗਵਾਈ ਵਾਲੀ ਪੁਲੀਸ ਨੇ ਕੱਲ੍ਹ ਸਰਹੱਦੀ ਖੇਤਰ ਦੇ ਮਨਾਹੀ ਵਾਲੇ ਖੇਤਰ ਵਿੱਚੋਂ ਸ਼ੱਕੀ ਹਾਲਤ ਵਿੱਚ ਘੁੰਮਦੇ ਬੰਗਲਾਦੇਸ਼ੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ| ਉਸ ਦੀ ਪਛਾਣ ਮੁਹੰਮਦ ਮੁਸਤਫਾ ਕਮਲ ਪੁੱਤਰ ਮੁਹੰਮਦ ਅਲੀ ਪਿੰਡ ਗਾਜੀ ਡਾਕਖਾਨਾ, ਤਹਿਸੀਲ ਪੁਰਤਾਪੁਰ ਜ਼ਿਲ੍ਹਾ ਕੇਸਬਪੁਰ (ਬੰਗਲਾਦੇਸ਼) ਵਜੋਂ ਹੋਈ ਹੈ। ਮੁਲਜ਼ਮ ਨੂੰ ਸਰਹੱਦੀ ਖੇਤਰ ਦੇ ਮਨਾਹੀ ਵਾਲੇ ਖੇਤਰ ਦੇ ਪਿੰਡ ਡੱਲ ਨੇੜਿਓਂ ਕਾਬੂ ਕੀਤਾ ਗਿਆ| ਉਸ ਕੋਲ ਕੋਈ ਭਾਰਤੀ ਪਾਸਪੋਰਟ ਨਹੀਂ ਮਿਲਿਆ। ਉਸ ਕੋਲੋਂ ਮੋਬਾਈਲ ਫੋਨ ਅਤੇ 700 ਰੁਪਏ ਭਾਰਤੀ ਕਰੰਸੀ ਬਰਾਮਦ ਕੀਤੀ ਗਈ ਹੈ| ਇਸ ਸਬੰਧੀ ਖਾਲੜਾ ਪੁਲੀਸ ਨੇ ਕੇਸ ਦਰਜ ਲਿਆ ਹੈ।