ਵਿਸਾਖੀ ਮੇਲੇ ਨੇ ਸਿਡਨੀ ਵਿੱਚ ਲਾਈ ਰੌਣਕ

ਲਖਵਿੰਦਰ ਸਿੰਘ ਰਈਆ

ਸਿਡਨੀ: ਦੋ ਦਹਾਕੇ ਤੋਂ ਸੱਭਿਆਚਾਰਕ ਵਿਸਾਖੀ ਮੇਲਾ ਮਨਾਉਣ ਦੀ ਪਰੰਪਰਾ ਨੂੰ ਜਾਰੀ ਰੱਖਦਿਆਂ ਬਲੈਕਟਾਊਨ ਸਿਡਨੀ ਦੀ ਸੌਅ ਗਰਾਊਂਡ ਵਿੱਚ ਪੰਜਾਬੀ ਸੰਗੀਤ ਸੈਂਟਰ ਦੇ ਡਾਇਰੈਕਟਰ ਦਵਿੰਦਰ ਸਿੰਘ ਧਾਰੀਆ ਤੇ ਹਰਕੀਰਤ ਸਿੰਘ ਸੰਧਰ ਦੀ ਸਮੁੱਚੀ ਟੀਮ ਦੀ ਅਗਵਾਈ ਹੇਠ ਵਿਸਾਖੀ ਮੇਲਾ ਧੂਮਧਾਮ ਨਾਲ ਮਨਾਇਆ ਗਿਆ।
ਸ਼ਬਦ ਗਾਇਨ ਨਾਲ ਮੇਲੇ ਦੀ ਸ਼ੁਰੂਆਤ ਹੋਣ ਤੋਂ ਬਾਅਦ ਪੰਜਾਬੀ ਸੱਭਿਆਚਾਰ ਦੀਆਂ ਵੱਖ ਵੱਖ ਵੰਨਗੀਆਂ ਦਾ ਗੁਲਦਸਤਾ ਪੇਸ਼ ਕਰਦਿਆਂ ਬੱਚਿਆਂ, ਗੱਭਰੂਆਂ ਅਤੇ ਮੁਟਿਆਰਾਂ ਦੇ ਟੋਲਿਆਂ ਨੇ ਖ਼ੂਬ ਰੰਗ ਬੰਨ੍ਹਿਆ। ਵੱਖ ਵੱਖ ਤਰ੍ਹਾਂ ਦੇ ਪੰਜਾਬੀ ਪਹਿਰਾਵੇ ਵਿੱਚ ਤਿਆਰ ਹੋ ਕੇ ਕੀਤੀ ਪੇਸ਼ਕਾਰੀ ਨਾਲ ਵਿਦੇਸ਼ ਵਿੱਚ ਹੀ ਪੰਜਾਬ ਦਾ ਰੰਗ ਬੰਨ੍ਹ ਦਿੱਤਾ। ਡਾ. ਸੁਰਜੀਤ ਪਾਤਰ ਦੀਆਂ ਕਵਿਤਾਵਾਂ ਗਾ ਕੇ ਉਨ੍ਹਾਂ ਨੂੰ ਸ਼ਰਧਾਂਜਲੀ ਦਿੱਤੀ ਗਈ।
ਪੈਰਾਮੈਟਾ ਦੇ ਮੇਅਰ ਸੁਨੀਲ ਪਾਂਡੇ ਤੇ ਬਲੈਕਟਾਊਨ ਦੇ ਕੌਂਸਲਰ ਮਨਿੰਦਰ ਸਿੰਘ ਆਦਿ ਪਤਵੰਤਿਆਂ ਸਮੇਤ ਵੱਡੀ ਗਿਣਤੀ ਵਿੱਚ ਪੰਜਾਬੀਆਂ ਦੀ ਸ਼ਮੂਲੀਅਤ ਨੇ ਮੇਲੇ ਲਾਉਣੇ ਅਤੇ ਮਾਣਨ ਦੇ ਸ਼ੌਕ ਨੂੰ ਦਰਸਾ ਦਿੱਤਾ। ਮੇਲੇ ਦੌਰਾਨ ਹੱਥਾਂ ਵਿੱਚ ਫੜੇ ਖੂੰਡੇ, ਲੜ ਛੱਡਵੇਂ ਬੰਨ੍ਹੇ ਧੂਹਵੇਂ ਚਾਦਰੇ ਤੇ ਲਈਆਂ ਫੁਲਕਾਰੀਆਂ ਅਤੇ ਪੰਜਾਬੀ ਜੁੱਤੀਆਂ ਦੀ ਆਪਣੀ ਹੀ ਟੌਹਰ ਸੀ। ਸ਼ਿੰਗਾਰੇ ਟਰੈਕਟਰ ਦੀ ਆਮਦ ਨੇ ਮਨ ਵਿੱਚ ‘ਮਾਰਦਾ ਦਮਾਮੇ ਜੱਟ ਮੇਲੇ ਆ ਗਿਆ’ ਦੀ ਮਿੱਠੀ ਸੁਰ ਛੇੜ ਦਿੱਤੀ। ਚਰਖੇ, ਗਾਗਰ, ਪਲੰਘ, ਪੱਖੀਆਂ, ਉਖਲੀ ਮੋਹਲੇ ਆਦਿ ਦੀ ਵਿਰਾਸਤੀ ਪ੍ਰਦਰਸ਼ਨੀ ਮੇਲੇ ਦੇ ਰੰਗਾਂ ਨੂੰ ਹੋਰ ਗੂੜ੍ਹਾ ਕਰ ਰਹੀ ਸੀ।
‌ਦਵਿੰਦਰ ਸਿੰਘ ਧਾਰੀਆ, ਰਣਜੀਤ ਖੈੜਾ ਅਤੇ ਹਰਕੀਰਤ ਸਿੰਘ ਸੰਧਰ ਵੱਲੋਂ ਮੰਚ ਸੰਚਾਲਨ ਤੇ ਖੇਡ ਪਿੜ ਵਿੱਚ ਕੀਤੀ ਵੱਖਰੇ ਅੰਦਾਜ਼ ਦੀ ਕੁਮੈਂਟਰੀ ਮੇਲੇ ਵਿੱਚ ਪੂਰਾ ਜੋਸ਼ ਭਰ ਰਹੀ ਸੀ। ਇਸ ਦੌਰਾਨ ਚਾਟੀ ਦੌੜ, ਕੁਰਸੀ ਦੌੜ ਤੇ ਰੱਸਾਕਸ਼ੀ ਦੇ ਮੁਕਾਬਲੇ ਕਰਵਾਏ ਗਏ। ਗਰਮਾਂ ਗਰਮ ਜਲੇਬੀਆਂ, ਪਕੌੜਿਆਂ ਸਮੇਤ ਬਹੁਤ ਸਾਰੇ ਖਾਣ ਪੀਣ ਦੇ ਪਕਵਾਨਾਂ, ਵੰਨ ਸੁਵੰਨੀਆਂ ਪੰਜਾਬੀ ਵਸਤਾਂ ਦੀ ਖਰੀਦੋ ਫਰੋਖਤ ਦੀਆਂ ਦੁਕਾਨਾਂ, ਬੱਚਿਆਂ ਦੇ ਮਨੋਰੰਜਨ ਲਈ ਖਿਡੌਣੇ ਅਤੇ ਝੂਟੇ ਲੈਂਦੇ ਬੱਚਿਆਂ ਦੀਆਂ ਕਿਲਕਾਰੀਆਂ ਪੰਜਾਬ ਵਿੱਚ ਲੱਗਦੇ ਮੇਲਿਆਂ ਦੇ ਹੀ ਰੂਪ ਦਾ ਝਾਓਲਾ ਪਾਉਂਦੀਆਂ ਸਨ।
ਸੰਪਰਕ: 61430204832