ਕਿਸਾਨ ਦੇ ਘਰੇਲੂ ਸਾਮਾਨ ਦੀ ਕੁਰਕੀ ਰੋਕੀ

ਪੱਤਰ ਪ੍ਰੇਰਕ

ਭਵਾਨੀਗੜ੍ਹ, 27 ਜੂਨ

ਇੱਥੋ ਨੇੜਲੇ ਪਿੰਡ ਜੌਲੀਆਂ ਵਿੱਚ ਅੱਜ ਭਾਰਤੀ ਕਿਸਾਨ ਯੂਨੀਅਨ ਉਗਰਾਹਾਂ ਵੱਲੋਂ ਕਿਸਾਨ ਅਵਤਾਰ ਸਿੰਘ ਦੇ ਘਰ ਦੇ ਸਾਮਾਨ ਦੀ ਕੁਰਕੀ ਕਰਨ ਆਏ ਅਧਿਕਾਰੀਆਂ ਨੂੰ ਕਾਰਵਾਈ ਕਰਨ ਤੋਂ ਰੋਕਿਆ ਗਿਆ। ਇਸ ਮੌਕੇ ਯੂਨੀਅਨ ਦੇ ਬਲਾਕ ਸੀਨੀਅਰ ਮੀਤ ਪ੍ਰਧਾਨ ਮਨਜੀਤ ਸਿੰਘ ਘਰਾਚੋਂ ਅਤੇ ਜਨਰਲ ਸਕੱਤਰ ਜਸਵੀਰ ਸਿੰਘ ਗੱਗੜਪੁਰ ਨੇ ਦੱਸਿਆ ਕਿ ਸੂਦਖੋਰਾਂ ਵੱਲੋਂ ਪਹਿਲਾਂ ਪੀੜਤ ਕਿਸਾਨ ਅਵਤਾਰ ਸਿੰਘ ਦੀ ਜ਼ਮੀਨ ਉੱਤੇ ਜਬਰੀ ਕਬਜ਼ਾ ਕਰਨ ਦੀ ਕਾਰਵਾਈ ਕੀਤੀ ਗਈ,ਜਿਸ ਖ਼ਿਲਾਫ਼ ਯੂਨੀਅਨ ਵੱਲੋਂ ਸੰਘਰਸ਼ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਇਸੇ ਦੌਰਾਨ ਅੱਜ ਨੀਲਮ ਗੋਇਲ ਪੁੱਤਰੀ ਤਰਸੇਮ ਚੰਦ ਵੱਲੋਂ ਕਿਸਾਨ ਅਵਤਾਰ ਸਿੰਘ ਦੇ ਘਰ ਦੇ ਸਾਮਾਨ ਮੱਝਾਂ, ਟਰੈਕਟਰ, ਫਰਿੱਜ, ਮੋਟਰਸਾਈਕਲ, ਆਦਿ ਦੀ ਕੁਰਕੀ ਲਿਆਂਦੀ ਗਈ। ਕੁਰਕੀ ਕਰਨ ਲਈ ਨੀਲਮ ਗੋਇਲ ਦੇ ਭਰਾ ਅਨਿਲ ਗੋਇਲ ਤੇ ਮੁਨੀਸ਼ ਗੋਇਲ ਦੇ ਨਾਲ ਪੁਲੀਸ ਚੌਕੀ ਜੌਲੀਆਂ ਦੇ ਮੁਲਾਜ਼ਮ ਅਤੇ ਅਦਾਲਤ ਵਿੱਚੋਂ ਰੁੱਕਾ ਦੇਣ ਵਾਲਾ ਮੁਲਾਜ਼ਮ ਸਨ।

ਉਨ੍ਹਾਂ ਕਿਹਾ ਕਿ ਯੂਨੀਅਨ ਵੱਲੋਂ ਪਿੰਡ ਵਾਸੀਆਂ ਦੇ ਸਹਿਯੋਗ ਨਾਲ ਕੁਰਕੀ ਕਰਨ ਦੀ ਕਾਰਵਾਈ ਨੂੰ ਰੋਕਿਆ ਗਿਆ। ਉਨ੍ਹਾਂ ਕਿਹਾ ਕਿ ਯੂਨੀਅਨ ਕਿਸੇ ਵੀ ਕਿਸਾਨ ਦੀ ਜ਼ਮੀਨ ਅਤੇ ਘਰ ਦੀ ਕੁਰਕੀ ਨਹੀਂ ਹੋਣ ਦੇਵੇਗੀ। ਇਸ ਮੌਕੇ ਯੂਨੀਅਨ ਦੇ ਖਜ਼ਾਨਚੀ ਬਲਵਿੰਦਰ ਸਿੰਘ ਘਨੌੜ ਜੱਟਾਂ, ਸਹਾਇਕ ਸਕੱਤਰ ਅਮਨਦੀਪ ਸਿੰਘ ਮਹਿਲਾਂ, ਪ੍ਰਚਾਰ ਸਕੱਤਰ ਕਰਮ ਚੰਦ ਪੰਨਵਾਂ, ਸਲਾਹਕਾਰ ਗੁਰਜੇਤ ਸਿੰਘ, ਸਲਾਹਕਾਰ ਕਸ਼ਮੀਰ ਸਿੰਘ ਆਲੋਅਰਖ ਅਤੇ ਲਾਡੀ ਬਖੋਪੀਰ ਸਮੇਤ ਕਿਸਾਨ ਤੇ ਬੀਬੀਆਂ ਹਾਜ਼ਰ ਸਨ। ਦੂਜੇ ਪਾਸੇ ਕੁਰਕੀ ਕਰਨ ਆਏ ਵਿਅਕਤੀ ਤੇ ਪੁਲੀਸ ਮੁਲਾਜ਼ਮਾਂ ਨੇ ਦੱਸਿਆ ਕਿ ਉਹ ਅਦਾਲਤ ਦੇ ਹੁਕਮਾਂ ਅਨੁਸਾਰ ਕਾਰਵਾਈ ਕਰਨ ਲਈ ਆਏ ਸਨ, ਪਰ ਕਿਸਾਨਾਂ ਦੇ ਵਿਘਨ ਪਾਉਣ ਕਾਰਨ ਵਾਪਸ ਪਰਤ ਗਏ।