ਏਐੱਸਆਈ ਦੀ ਸਰਵਿਸ ਰਾਈਫਲ ਵਿੱਚੋਂ ਗੋਲੀ ਚੱਲਣ ਕਾਰਨ ਮੌਤ

ਪਠਾਨਕੋਟ (ਪੱਤਰ ਪ੍ਰੇਰਕ): ਪੰਜਾਬ-ਹਿਮਾਚਲ ਸਰਹੱਦ ’ਤੇ ਪੈਂਦੇ ਡਮਟਾਲ ਥਾਣੇ ਅਧੀਨ ਸੁਰੱਖਿਆ ਦਸਤੇ ਦੀ ਡਿਊਟੀ ਨਿਭਾਅ ਰਹੇ ਇੱਕ ਪੁਲੀਸ ਮੁਲਾਜ਼ਮ ਦੀ ਸਰਵਿਸ ਰਾਈਫਲ ਵਿਚੋਂ ਅਚਾਨਕ ਗੋਲੀ ਚੱਲਣ ਕਾਰਨ ਮੌਤ ਹੋ ਗਈ। ਮ੍ਰਿਤਕ ਦੀ ਪਛਾਣ ਏਐੱਸਆਈ ਵਿਜੈ ਕੁਮਾਰ ਵਾਸੀ ਪਿੰਡ ਤਿਓੜਾ (ਹਿਮਾਚਲ ਪ੍ਰਦੇਸ਼) ਵਜੋਂ ਹੋਈ ਹੈ ਜੋ ਰੇਲਵੇ ਪੁਲੀਸ ਗਾਰਡ ਵਜੋਂ ਪਠਾਨਕੋਟ ਚੱਕੀ ਰੇਲਵੇ ਪੁਲ ’ਤੇ ਤਾਇਨਾਤ ਸੀ। ਉਸ ਦੀ ਅੱਜ ਸਵੇਰੇ 6 ਵਜੇ ਤੱਕ ਡਿਊਟੀ ਸੀ ਤੇ ਸਵੇਰੇ ਸਰਵਿਸ ਰਾਈਫਲ ’ਚੋਂ ਗੋਲੀ ਚੱਲਣ ਨਾਲ ਉਸ ਦੀ ਮੌਤ ਹੋ ਗਈ। ਸੂਚਨਾ ਮਿਲਣ ’ਤੇ ਹਿਮਾਚਲ ਪ੍ਰਦੇਸ਼ ਦੇ ਢਾਂਗੂ ਪੁਲੀਸ ਚੌਕੀ ਮੁਖੀ ਰਾਜਪਾਲ ਠਾਕੁਰ ਤੇ ਹੋਰ ਪੁਲੀਸ ਅਧਿਕਾਰੀ ਮੌਕੇ ’ਤੇ ਪੁੱਜੇ। ਡੀਐੱਸਪੀ ਨੂਰਪੁਰ ਵਿਸ਼ਾਲ ਵਰਮਾ ਨੇ ਫੋਰੈਂਸਿਕ ਟੀਮ ਨੂੰ ਸੱਦਿਆ ਤੇ ਟੀਮ ਨੇ ਨਮੂਨੇ ਹਾਸਲ ਕੀਤੇ। ਟੀਮ ਨੇ ਲਾਇਸੈਂਸੀ ਹਥਿਆਰ ਅਤੇ ਮੋਬਾਈਲ ਵੀ ਕਬਜ਼ੇ ਵਿੱਚ ਲੈ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।