ਸ਼ੈਲਰ ਵਿੱਚੋਂ ਝੋਨਾ ਤੇ ਚੌਲ ਚੋਰੀ ਕਰਨ ਦੇ ਦੋਸ਼ ਹੇਠ ਕਾਬੂ

ਪੱਤਰ ਪ੍ਰੇਰਕ
ਟੋਹਾਣਾ, 11 ਦਸੰਬਰ
ਇਥੋਂ ਦੀ ਸਿੰਬਲਵਾਲਾ ਰੋਡ ’ਤੇ ਪੈਂਦੇ ਇਕ ਰਾਈਸ ਸ਼ੈਲਰ ਵਿੱਚੋਂ ਝੋਨੇ ਦੀਆਂ ਬੋਰੀਆਂ ਤੇ ਤਿਆਰ ਚੌਲ ਚੋਰੀ ਕਰਨ ਦਾ ਮਾਮਲਾ ਸ਼ੈਲਰ ਮਾਲਕ ਸੁਰੇਸ਼ ਕੁਮਾਰ ਦੀ ਸ਼ਿਕਾਇਤ ’ਤੇ ਦਰਜ ਕਰਨ ਮਗਰੋਂ ਪੁਲੀਸ ਨੇ ਇਸੇ ਰੋਡ ’ਤੇ ਪੈਂਦੇ ਪ੍ਰੇਮ ਨਗਰ ਦੇ ਸੋਨੂੰ ਉਰਫ਼ ਗੋਲੂ ਨੂੰ ਗ੍ਰਿਫ਼ਤਾਰ ਕਰਕੇ ਰਿਮਾਂਡ ’ਤੇ ਲਿਆ ਹੈ। ਐੱਸਐੱਚਓ ਪ੍ਰਲਾਦ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮ ਗਰੋਹ ਨੇ ਰਾਤ ਨੂੰ ਸ਼ੈਲਰ ਅਹਾਤੇ ਵਿਚ ਦਾਖਲ ਹੋ ਕੇ ਝੋਨੇ ਦੀਆਂ ਬੋਰੀਆਂ ਤੇ ਤਿਆਰ ਚੌਲ ਦੇ ਥੈਲੇ ਚੋਰੀ ਕੀਤੇ ਸਨ। ਚੋਰੀ ਦੀ ਸਾਰੀ ਵਾਰਦਾਤ ਕੈਮਰਿਆਂ ਵਿੱਚ ਕੈਦ ਹੋਣ ’ਤੇ ਪੁਲੀਸ ਨੇ ਕੈਮਰਿਆਂ ਦੀ ਫੁਟੇਜ ਦੇ ਅਧਾਰ ’ਤੇ ਮੁਲਜ਼ਮਾਂ ਦੀ ਪਛਾਣ ਕੀਤੀ ਤੇ ਸ਼ਾਮ ਤਕ ਮਾਮਲੇ ਨੂੰ ਹੱਲ ਕਰਕੇ ਮੁੱਖ ਮੁਲਜ਼ਮ ਸੋਨੂੰ ਨੂੰ ਗ੍ਰਿਫ਼ਤਾਰ ਕਰਕੇ ਜਦੋਂ ਉਸ ਨੂੰ ਵੀਡੀਓ ਦਿਖਾਈ ਤਾਂ ਸੋਨੂੰ ਨੇ ਚੋਰੀ ਦੀ ਵਾਰਦਾਤ ਕਬੂਲ ਕਰ ਲਈ। ਪੁਲੀਸ ਅਨੁਸਾਰ ਮੁਲਜ਼ਮ ਦਾ ਰਿਮਾਂਡ ਲੈ ਕੇ ਗਰੋਹ ਦੇ ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਜਾਵੇਗਾ।