‘ਨੌਨ ਸਟੌਪ ਧਮਾਲ’ ’ਚ ਨਜ਼ਰ ਆਉਣਗੇ ਅਨੂ ਕਪੂਰ ਤੇ ਰਾਜਪਾਲ ਯਾਦਵ

ਮੁੰਬਈ: ਅਦਾਕਾਰ ਅਨੂ ਕਪੂਰ, ਰਾਜਪਾਲ ਯਾਦਵ ਤੇ ਮਨੋਜ ਜੋਸ਼ੀ ਕਾਮੇਡੀ ਫਿਲਮ ‘ਨੌਨ ਸਟੌਪ ਧਮਾਲ’ ਵਿੱਚ ਨਜ਼ਰ ਆਉਣਗੇ। ਅਨੂ ਕਪੂਰ ਇਸ ਫਿਲਮ ਵਿੱਚ ਸਤਿੰਦਰ ਦੀ ਭੂਮਿਕਾ ਨਿਭਾਅ ਰਿਹਾ ਹੈ, ਜੋ ਕਿ ਨਿਰਦੇਸ਼ਕ ਬਣਨਾ ਚਾਹੁੰਦਾ ਹੈ। ਸਤਿੰਦਰ ਦਾ ਵੱਖਰਾ ਤੇ ਮਜ਼ਾਹੀਆ ਅੰਦਾਜ਼ ਉਸ ਨੂੰ ਹੋਰਨਾਂ ਨਿਰਦੇਸ਼ਕਾਂ ਤੋਂ ਵੱਖਰੀ ਪਛਾਣ ਦਿਵਾਉਂਦਾ ਹੈ। ਉਹ ਵੱਖਰੇ ਦ੍ਰਿਸ਼ਟੀਕੋਣ ਰਾਹੀਂ ਫਿਲਮਾਂ ਬਣਾਉਣੀਆਂ ਚਾਹੁੰਦਾ ਹੈ। ਇਸ ਫਿਲਮ ਵਿੱਚ ਕੰਮ ਕਰਨ ਬਾਰੇ ਆਪਣਾ ਤਜਰਬਾ ਸਾਂਝਾ ਕਰਦਿਆਂ ਅਦਾਕਾਰ ਨੇ ਕਿਹਾ, ‘ਸਤਿੰਦਰ ਦੀ ਭੂਮਿਕਾ ਨਿਭਾਅ ਕੇ ਮੈਨੂੰ ਬਹੁਤ ਮਜ਼ਾ ਆਇਆ। ਫਿਲਮ ਨਿਰਮਾਣ ਬਾਰੇ ਸਤਿੰਦਰ ਦਾ ਜਨੂਨ ਅਤੇ ਕੁਝ ਵੱਖਰਾ ਕਰਨ ਦੀ ਤਲਬ ਉਸ ਦੀ ਖਾਸੀਅਤ ਹਨ। ਮੈਨੂੰ ਆਸ ਹੈ ਕਿ ਦਰਸ਼ਕਾਂ ਨੂੰ ਇਹ ਫਿਲਮ ਦੇਖ ਕੇ ਓਨਾ ਹੀ ਮਜ਼ਾ ਆਵੇਗਾ, ਜਿੰਨਾ ਸਾਨੂੰ ਇਸ ਨੂੰ ਤਿਆਰ ਕਰਕੇ ਆਇਆ ਹੈ।’ ਜ਼ਿਕਰਯੋਗ ਹੈ ਕਿ ਸੁਰੇਸ਼ ਗੋਂਡਾਲੀਆ ਵੱਲੋਂ ਤਿਆਰ ਕੀਤੀ ਗਈ ਇਸ ਫਿਲਮ ਦਾ ਨਿਰਦੇਸ਼ਨ ਇਰਸ਼ਾਦ ਖ਼ਾਨ ਨੇ ਕੀਤਾ ਹੈ, ਜਿਸ ਵਿੱਚ ਅਨੂ ਕਪੂਰ ਦੇ ਨਾਲ ਰਾਜਪਾਲ ਯਾਦਵ, ਮਨੋਜ ਜੋਸ਼ੀ, ਪ੍ਰਿਆਂਸ਼ੂ ਚੈਟਰਜੀ, ਪਾਇਲ ਮੁਖਰਜੀ, ਵਿਰੋਨਿਕਾ ਵਾਨਜੀ ਤੇ ਜੀਓਰਜੀਆ ਆਂਦਰੀਅਨ ਨੇ ਅਹਿਮ ਭੂਮਿਕਾਵਾਂ ਨਿਭਾਈਆਂ ਹਨ। ਇਹ ਫਿਲਮ 18 ਅਗਸਤ ਨੂੰ ਸਿਨੇਮਾ ਘਰਾਂ ਵਿੱਚ ਰਿਲੀਜ਼ ਹੋਵੇਗੀ। -ਏਐੱਨਆਈ