ਸੁਰਤਾਲ ਕਲਚਰਲ ਐਸੋਸੀਏਸ਼ਨ ਵੱਲੋਂ ਸਾਲਾਨਾ ਇਨਾਮ ਵੰਡ ਸਮਾਰੋਹ

ਹਰਜੀਤ ਲਸਾੜਾ
ਬ੍ਰਿਸਬੇਨ, 21 ਨਵੰਬਰ
ਇਥੇ ਸੁਰਤਾਲ ਕਲਚਰਲ ਐਸੋਸੀਏਸ਼ਨ ਵੱਲੋਂ ‘ਸੁਰਤਾਲ ਦੀਵਾਲੀ ਅਤੇ ਸਾਲਾਨਾ ਇਨਾਮ ਵੰਡ ਸਮਾਰੋਹ 2024’ ਕਰਵਾਇਆ ਗਿਆ। ਭੰਗੜਾ ਅਕੈਡਮੀ ਦੇ ਕੋਚ ਮਨਦੀਪ ਸਿੰਘ, ਰੁਪਿੰਦਰ ਸਿੰਘ ਅਤੇ ਸੌਰਭ ਮਹਿਰਾ ਦੀ ਅਗਵਾਈ ਵਿੱਚ ਬੱਚਿਆਂ ਨੇ ਸੱਭਿਆਚਾਰਕ ਪ੍ਰੋਗਰਾਮ ਪੇਸ਼ ਕੀਤਾ। ਮੁੱਖ ਮਹਿਮਾਨ ਵਜੋਂ ਲੋਗਨ ਸਿਟੀ ਕੌਂਸਲ ਦੇ ਮੇਅਰ ਜੌਨ ਰੇਵੇਨ ਅਤੇ ਕੌਂਸਲਰ ਟਿਮ ਫਰੇਜ਼ਰ ਪੁੱਜੇ। ਪ੍ਰੋਗਰਾਮ ਦੌਰਾਨ ਭੰਗੜੇ ਅਤੇ ਗਿੱਧੇ ਦੇ ਸੋਲੋ ਮੁਕਾਬਲੇ ਖਿੱਚ ਦਾ ਕੇਂਦਰ ਰਹੇ। ਇੰਟਰਮੀਡੀਏਟ ਅਤੇ ਐਡਵਾਂਸ ਭੰਗੜਾ ਗਰੁੱਪ ਦੀ ਪੇਸ਼ਕਾਰੀ ਨੇ ਪੰਜਾਬ ਦੇ ਮੇਲਿਆਂ ਨੂੰ ਰੂਪਮਾਨ ਕੀਤਾ। ਹਰਿੰਦਰ ਅਤੇ ਸੁਰਜੀਤ ਸਿੰਘ ਦੀਆਂ ਮਲਵਈ ਬੋਲੀਆਂ ਨੇ ਪ੍ਰੋਗਰਾਮ ਨੂੰ ਸਿਖਰ ’ਤੇ ਪਹੁੰਚਾਇਆ। ਮਾਹੀ ਵੜੈਂਚ ਦੀ ਕਵਿਤਾ ਪਸੰਦ ਕੀਤੀ ਗਈ। ਪ੍ਰੋਗਰਾਮ ਵਿੱਚ ਲੋਕਾਂ ਦੇ ਇਨਾਮ ਵੀ ਕੱਢੇ ਗਏ। ਮੰਚ ਸੰਚਾਲਨ ਅਮਨ ਔਲਖ ਤੇ ਗੁਰਦੇਵ ਸਿੰਘ ਸਿੱਧੂ ਵੱਲੋਂ ਕੀਤਾ ਗਿਆ।