ਅਨਮੋਲ ਰਤਨ ਸਿੰਘ ਨੇ ਤਲਵਾਰਬਾਜ਼ੀ ’ਚ ਹਾਸਲ ਕੀਤਾ ਪਹਿਲਾ ਸਥਾਨ

ਨਿੱਜੀ ਪੱਤਰ ਪ੍ਰੇਰਕ
ਖਮਾਣੋ, 17 ਫਰਵਰੀ
ਅਕਾਲ ਅਕੈਡਮੀ ਖਮਾਣੋ ਖੁਰਦ ਦੇ ਵਿਦਿਆਰਥੀ ਅਨਮੋਲ ਰਤਨ ਸਿੰਘ ਕੰਗ ਨੇ ਔਰੰਗਾਬਾਦ ਵਿੱਚ ਹੋਈਆਂ ਕੌਮੀ ਖੇਡਾਂ ਵਿੱਚ ਸੋਨ ਤਗਮਾ ਹਾਸਲ ਕੀਤਾ ਹੈ। ਤਲਵਾਰਬਾਜ਼ੀ ਮੁਕਾਬਲੇ ਦੇ ਕੌਮੀ ਜੇਤੂ ਖਿਡਾਰੀ ਦਾ ਸਕੂਲ ਪਹੁੰਚਣ ’ਤੇ ਸਮੁੱਚੇ ਸਟਾਫ ਅਤੇ ਵਿਦਿਆਰਥੀਆਂ ਵੱਲੋਂ ਸਵਾਗਤ ਕੀਤਾ ਗਿਆ ਅਤੇ ਤਲਵਾਰਬਾਜ਼ੀ ਕੋਚ ਰਣਧੀਰ ਸਿੰਘ ਉਚੇਚੇ ਤੌਰ ’ਤੇ ਹਾਜ਼ਰ ਹੋਏ। ਕੌਮੀ ਪੱਧਰ ਦੀ ਇਸ ਪ੍ਰਾਪਤੀ ਲਈ ਅਕਾਲ ਅਕੈਡਮੀ ਦੇ ਪ੍ਰਿੰਸੀਪਲ ਅਮਰਜੀਤ ਕੌਰ, ਸਮੂਹ ਸਟਾਫ ਅਤੇ ਕੋਚ ਸਾਹਿਬਾਨ ਨੇ ਅਨਮੋਲ ਰਤਨ ਸਿੰਘ ਨੂੰ ਮੁਬਾਰਕਬਾਦ ਦਿੱਤੀ ਤੇ ਉਸ ਨੂੰ ਸਨਮਾਨ ਚਿੰਨ੍ਹ ਅਤੇ ਸਿਰੋਪਾ ਭੇਟ ਕਰ ਕੇ ਸਨਮਾਨ ਕੀਤਾ ਗਿਆ। ਪ੍ਰਬੰਧਕਾਂ ਵੱਲੋਂ ਕੋਚ ਰਣਧੀਰ ਸਿੰਘ ਅਕੈਡਮੀ ਦੇ ਖੇਡ ਵਿਭਾਗ ਦੇ ਮੁਖੀ ਗੁਰਸਿਮਰਨ ਸਿੰਘ ਅਤੇ ਅਕੈਡਮੀ ਦੇ ਦੋ ਹੋਰ ਕੌਮੀ ਪੱਧਰ ਦੇ ਤਲਵਾਰਬਾਜ਼ਾਂ ਗੁਰਕ੍ਰਿਪਾਲ ਸਿੰਘ ਤੇ ਹਰਗੁਨਦੀਪ ਕੌਰ ਮਾਵੀ ਦਾ ਵੀ ਸਨਮਾਨ ਕੀਤਾ ਗਿਆ।