ਸੱਥ ਦਾ ਲੈਂਟਰ ਡਿੱਗਣ ਕਾਰਨ ਬਜ਼ੁਰਗ ਦੀ ਮੌਤ

ਤਰਨ ਤਾਰਨ (ਪੱਤਰ ਪ੍ਰੇਰਕ):

ਦੀਵਾਲੀ ਦੇ ਦਿਨ ਪਿੰਡ ਭੂਰਾ ਕੋਹਨਾ ਵਿੱਚ ਟਰੱਕ ਦੀ ਟੱਕਰ ਕਾਰਨ ਸੱਥ ਦਾ ਲੈਂਟਰ ਡਿੱਗ ਗਿਆ, ਜਿਸ ਕਾਰਨ ਇਕ ਬਜ਼ੁਰਗ ਦੀ ਮੌਕੇ ’ਤੇ ਹੀ ਮੌਤ ਗਈ, ਜਦੋਂ ਕਿ ਉਸ ਦੀ ਗੋਦੀ ਚੁੱਕਿਆ ਦੋ ਸਾਲ ਦਾ ਪੋਤਰਾ ਵਾਲ ਵਾਲ ਬਚ ਗਿਆ। ਮ੍ਰਿਤਕ ਦੀ ਸ਼ਨਾਖਤ ਬਲਕਾਰ ਸਿੰਘ (70) ਵਜੋਂ ਹੋਈ ਹੈ। ਮ੍ਰਿਤਕ ਦੇ ਲੜਕੇ ਲਖਵਿੰਦਰ ਸਿੰਘ ਨੇ ਦੱਸਿਆ ਕਿ ਉਸ ਦਾ ਪਿਤਾ ਉਸ ਦੇ ਦੋ ਕੁ ਸਾਲ ਦੇ ਭਤੀਜੇ ਰਿਸ਼ੀ ਸਿੰਘ ਨੂੰ ਪਿੰਡ ਦੀ ਸੱਥ ਹੇਠ ਖਿਡਾ ਰਿਹਾ ਸੀ। ਇਸ ਦੌਰਾਨ ਪਿੰਡ ਦਾ ਰੇਸ਼ਮ ਲਾਲ ਭਿੱਖੀਵਿੰਡ ਵਾਲੇ ਪਾਸਿਉਂ ਆਇਆ ਅਤੇ ਉਸ ਨੇ ਟਰੱਕ ਸੱਥ ਵਿੱਚ ਮਾਰਿਆ ਜਿਸ ਕਾਰਨ ਲੈਂਟਰ ਡਿੱਗ ਗਿਆ ਅਤੇ ਬਲਕਾਰ ਸਿੰਘ ਦੀ ਸਿਰ ’ਤੇ ਸੱਟ ਵੱਜਣ ਕਾਰਨ ਮੌਤ ਹੋ ਗਈ।