ਘੱਗਰ ਨਦੀ ਵਿੱਚ 11 ਸਾਲਾ ਬੱਚਾ ਰੁੜਿਆ

ਹਰਜੀਤ ਸਿੰਘ
ਡੇਰਾਬੱਸੀ, 23 ਅਗਸਤ

ਇਥੋਂ ਦੀ ਘੱਗਰ ਨਦੀ ਵਿੱਚ ਅੱਜ ਨਹਾਉਂਦੇ ਹੋਏ ਇਕ 11 ਸਾਲਾ ਦਾ ਬੱਚਾ ਪਾਣੀ ਵਿੱਚ ਰੁੜ ਗਿਆ, ਜਦਕਿ ਉਸਦੇ ਨਾਲ ਨਹਾ ਰਹੇ ਉਸਦੇ ਦੋ ਭਰਾਵਾਂ ਸਣੇ ਤਿੰਨ ਜਣੇ ਵਾਲ ਵਾਲ ਬਚ ਗਏ। ਦੁਪਹਿਰ ਤਿੰਨ ਵਜੇ ਵਾਪਰੇ ਇਸ ਹਾਦਸੇ ਮਗਰੋਂ ਦੇਰ ਸ਼ਾਮ ਖ਼ਬਰ ਲਿਖੇ ਜਾਣ ਤੱਕ ਬੱਚੇ ਦਾ ਕੋਈ ਸੁਰਾਗ ਨਹੀਂ ਮਿਲਿਆ ਸੀ। ਪਰਿਵਾਰ ਵੱਲੋਂ ਪ੍ਰਸ਼ਾਸ਼ਨ ਨੂੰ ਜਾਣਕਾਰੀ ਦੇਣ ਮਗਰੋਂ ਵੀ ਉਨ੍ਹਾਂ ਵੱਲੋਂ ਬੱਚੇ ਦੀ ਭਾਲ ਲਈ ਕੋਈ ਉਪਰਾਲਾ ਨਹੀਂ ਕੀਤਾ ਗਿਆ। ਲਾਪਤਾ ਬੱਚੇ ਦੀ ਪਛਾਣ 11 ਸਾਲਾ ਹੈਪੀ ਪੁੱਤਰ ਲਲਨ ਪਾਸਵਾਨ ਵਾਸੀ ਭਾਂਖਰਪੁਰ ਵਜੋਂ ਹੋਈ ਹੈ। ਜ਼ਿਕਰਯੋਗ ਹੈ ਕਿ ਡੇਰਾਬੱਸੀ ਖੇਤਰ ਵਿੱਚ ਮੌਨਸੂਨ ਦੌਰਾਨ ਪਾਣੀ ਵਿੱਚ ਬੱਚਿਆਂ ਦੇ ਡੁੱਬਣ ਦਾ ਇਹ ਦੂਜਾ ਹਾਦਸਾ ਹੈ।