ਥਾਣਾ ਮੁਖੀ ਤੇ ਜਾਂਚ ਅਧਿਕਾਰੀ ’ਤੇ ਰਿਸ਼ਵਤ ਲੈਣ ਦੇ ਦੋਸ਼

ਪੱਤਰ ਪ੍ਰੇਰਕ
ਮੁਕੇਰੀਆਂ, 27 ਅਪਰੈਲ
ਨੇੜਲੇ ਪਿੰਡ ਕੋਲੀਆਂ ਦੀ ਔਰਤ ਨੇ ਮੁੱਖ ਮੰਤਰੀ ਤੇ ਡੀਜੀਪੀ ਨੂੰ ਇੱਥੋਂ ਦੇ ਥਾਣਾ ਮੁਖੀ ਤੇ ਕੇਸ ਦੇ ਜਾਂਚ ਅਧਿਕਾਰੀ ਵਿਰੁੱਧ ਸ਼ਿਕਾਇਤ ਭੇਜ ਕੇ ਪੀੜਤਾਂ ਕੋਲੋਂ ਹੀ 5000 ਰੁਪਏ ਦੀ ਕਥਿਤ ਰਿਸ਼ਵਤ ਲੈਣ, ਚੋਰਾਂ ਨਾਲ ਮਿਲੀਭੁਗਤ ਕਰ ਕੇ ਚੋਰੀ ਗਹਿਣੇ ਤੇ ਨਗਦੀ ਖਪਾਉਣ ਲਈ ਚੋਰਾਂ ਦੀ ਜ਼ਮਾਨਤ ਕਰਵਾਉਣ ਦੇ ਕਥਿਤ ਦੋਸ਼ ਲਗਾਏ ਹਨ।
ਇਸ ਸਬੰਧੀ ਸੁਰਿੰਦਰ ਕੌਰ ਨੇ ਦੱਸਿਆ ਕਿ ਬੀਤੀ 24 ਮਾਰਚ ਨੂੰ ਉਨ੍ਹਾਂ ਦੇ ਘਰੋਂ 19 ਤੋਲੇ ਗਹਿਣੇ ਤੇ 70 ਹਜ਼ਾਰ ਚੋਰੀ ਹੋਏ ਸਨ। ਜੱਦੋ-ਜਹਿਦ ਉਪਰੰਤ ਕੇਸ ਦਰਜ ਹੋਇਆ ਤੇ ਪੁਲੀਸ ਨੇ ਨਾਮਜ਼ਦ 3 ’ਚੋਂ ਦੋ ਮੁਲਜ਼ਮ ਫੜ ਲਏ ਸਨ। ਉਪਰੰਤ ਐੱਸਐੱਚਓ ਪ੍ਰਮੋਦ ਕੁਮਾਰ ਨੇ ਉਨ੍ਹਾਂ ਨੂੰ ਕੇਸ ਦੀ ਮਜ਼ਬੂਤੀ ਲਈ ਏਐੱਸਆਈ ਕੁਲਦੀਪ ਸਿੰਘ ਨੂੰ 5000 ਦੇਣ ਲਈ ਆਖਿਆ ਸੀ। ਜਿਹੜੇ ਉਸ ਨੇ ਦੋ ਗਵਾਹਾਂ ਦੀ ਹਾਜ਼ਰੀ ਵਿੱਚ ਜਾਂਚ ਅਧਿਕਾਰੀ ਨੂੰ ਦਿੱਤੇ ਸਨ। ਹੁਣ ਪੁਲੀਸ ਅਧਿਕਾਰੀ ਕਾਬੂ ਚੋਰਾਂ ਕੋਲੋਂ ਕੇਵਲ 2-2 ਹਜ਼ਾਰ ਦੀ ਰਿਕਵਰੀ ਹੋਣ ਅਤੇ ਸਾਰੇ ਗਹਿਣੇ ਤੇ ਨਗਦੀ ਫ਼ਰਾਰ ਹੋਏ ਚੋਰ ਕੋਲ ਹੋਣ ਦੀ ਗੱਲ ਆਖਣ ਲੱਗੇ। ਉਨ੍ਹਾਂ ਦੋਸ਼ ਲਗਾਇਆ ਕਿ ਪੁਲੀਸ ਅਧਿਕਾਰੀਆਂ ਨੇ ਚੋਰਾਂ ਨਾਲ ਕਥਿਤ ਮਿਲੀਭੁਗਤ ਕਰ ਕੇ ਉਨ੍ਹਾਂ ਦੀ ਜ਼ਮਾਨਤ ਕਰਵਾ ਦਿੱਤੀ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਥਾਣਾ ਮੁਖੀ ਅਤੇ ਏਐੱਸਆਈ ਖਿਲਾਫ਼ ਅਨੁਸਾਸ਼ਨੀ ਕਾਰਵਾਈ ਕਰ ਕੇ ਉਨ੍ਹਾਂ ਦਾ ਸਾਮਾਨ ਵਾਪਸ ਕਰਾਇਆ ਜਾਵੇ।

ਪੁਲੀਸ ਨੇ ਦੋਸ਼ ਨਕਾਰੇ

ਐੱਸਐੱਚਓ ਮੁਕੇਰੀਆਂ ਪ੍ਰਮੋਦ ਕੁਮਾਰ ਅਤੇ ਏਐੱਸਆਈ ਕੁਲਦੀਪ ਸਿੰਘ ਨੇ ਦੋਸ਼ਾਂ ਨੂੰ ਨਕਾਰਦਿਆਂ ਕਿਹਾ ਕਿ ਫਰਾਰ ਚੋਰ ਨੂੰ ਫੜਨ ਲਈ ਛਾਪੇ ਮਾਰੇ ਜਾ ਰਹੇ ਹਨ। ਉਨ੍ਹਾਂ ਕੋਈ ਰਿਸ਼ਵਤ ਨਹੀਂ ਲਈ ਤੇ ਫ਼ਰਾਰ ਚੋਰ ਨੂੰ ਕਾਬੂ ਕਰ ਕੇ ਚੋਰੀ ਹੋਇਆ ਸਾਮਾਨ ਪੀੜਤਾਂ ਨੂੰ ਦਿਵਾਇਆ ਜਾਵੇਗਾ।