ਪਾਕਿ ਪੁਲੀਸ ਵੱਲੋਂ ਇਮਰਾਨ ਤੇ ਬੁਸ਼ਰਾ ਖ਼ਿਲਾਫ਼ ਹਿੰਸਾ ਭੜਕਾਉਣ ਦਾ ਦੋਸ਼

ਇਸਲਾਮਾਬਾਦ, 28 ਨਵੰਬਰ
ਪਾਕਿਸਤਾਨ ਪੁਲੀਸ ਨੇ ਸਜ਼ਾਯਾਫਤਾ ਸਾਬਕਾ ਪ੍ਰਧਾਨ ਮੰਤਰੀ ਇਮਰਾਨ ਖਾਨ, ਉਨ੍ਹਾਂ ਦੀ ਪਤਨੀ ਬੁਸ਼ਰਾ ਬੀਬੀ ਤੇ ਹੋਰਾਂ ਖ਼ਿਲਾਫ਼ ਹਿੰਸਾ ਭੜਕਾਉਣ ਦੇ ਦੋਸ਼ ਲਾਏ ਹਨ। ਪੁਲੀਸ ਵੱਲੋਂ ਇਨ੍ਹਾਂ ’ਤੇ ਲੋਕਾਂ ਨੂੰ ਭੜਕਾ ਕੇ ਸੁਰੱਖਿਆ ਬਲਾਂ ’ਤੇ ਹਮਲਾ ਕਰਨ ਲਈ ਉਤਸ਼ਾਹਿਤ ਕਰਨ ਤੇ ਸ਼ਾਂਤੀ ਭੰਗ ਕਰਨ ਦੇ ਦੋਸ਼ ਹਨ। ਇਸ ਮਗਰੋਂ ਹੋਏ ਮੁਜ਼ਾਹਰਿਆਂ ਤੇ ਝੜਪਾਂ ’ਚ ਜਿੱਥੇ ਛੇ ਵਿਅਕਤੀਆਂ ਦੀ ਮੌਤ ਹੋ ਗਈ ਸੀ, ਉੱਥੇ ਕਈ ਜਣੇ ਜ਼ਖ਼ਮੀ ਹੋ ਗਏ ਸਨ। ਜ਼ਿਕਰਯੋਗ ਹੈ ਕਿ ਬੁਸ਼ਰਾ ਬੀਬੀ ਨੇ ਆਪਣੇ ਪਤੀ ਇਮਰਾਨ ਖਾਨ (ਜੋ ਅਗਸਤ 2023 ਤੋਂ ਜੇਲ੍ਹ ’ਚ ਹਨ) ਦੀ ਰਿਹਾਈ ਲਈ ਇਸਲਾਮਾਬਾਦ ਵੱਲ ਮਾਰਚ ਕਰਨ ਲਈ ਹਜ਼ਾਰਾਂ ਲੋਕਾਂ ਦੀ ਅਗਵਾਈ ਕੀਤੀ। ਇਸ ਦੌਰਾਨ ਪੁਲੀਸ ਨੇ ਐਤਵਾਰ ਰਾਤ ਤੋਂ ਹੁਣ ਤੱਕ ਇਸਲਾਮਾਬਾਦ ਤੇ ਨੇੜਲੇ ਇਲਾਕਿਆਂ ਤੋਂ ਲਗਪਗ ਹਜ਼ਾਰ ਮੁਜ਼ਾਹਰਾਕਾਰੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। -ਪੀਟੀਆਈ