ਅਮਰੀਕਾ ’ਚ ਹਾਦਸੇ ਮਗਰੋਂ ਮੁੰਬੲੀ ਹਵਾੲੀ ਅੱਡੇ ’ਤੇ ਨਜ਼ਰ ਆਇਆ ਸ਼ਾਹਰੁਖ ਖ਼ਾਨ

ਮੁੰਬਈ: ਬਾਲੀਵੁੱਡ ਦਾ ਬਾਦਸ਼ਾਹ ਸ਼ਾਹਰੁਖ ਖ਼ਾਨ ਆਪਣੇ ਅਮਰੀਕਾ ਦੇ ਟੂਰ ਤੋਂ ਭਾਰਤ ਪਰਤ ਆਇਆ ਹੈ। ਅੱਜ ਅਦਾਕਾਰ ਨੂੰ ਸਥਾਨਕ ਹਵਾਈ ਅੱਡੇ ’ਤੇ ਵੇਖਿਆ ਗਿਆ। ਜ਼ਿਕਰਯੋਗ ਹੈ ਕਿ ਹਾਲ ਹੀ ਵਿੱਚ ਸੋਸ਼ਲ ਮੀਡੀਆ ’ਤੇ ਖ਼ਬਰ ਆਈ ਸੀ ਕਿ ਅਮਰੀਕਾ ਵਿੱਚ ਸ਼ਾਹਰੁਖ ਖ਼ਾਨ ਨਾਲ ਛੋਟਾ ਹਾਦਸਾ ਵੀ ਵਾਪਰਿਆ ਸੀ। ਫੋਟੋਗ੍ਰਾਫਰ ਵਿਰਲ ਭਯਾਨੀ ਨੇ ਸ਼ਾਹਰੁਖ ਦੀ ਮੁੰਬਈ ਹਵਾਈ ਅੱਡੇ ਤੋਂ ਬਾਹਰ ਨਿਕਲਣ ਮੌਕੇ ਦੀ ਇੱਕ ਵੀਡੀਓ ਸਾਂਝੀ ਕੀਤੀ ਹੈ, ਜਿਸ ਵਿੱਚ ਮੀਡੀਆ ਵਾਲੇ ਅਦਾਕਾਰ ਤੋਂ ਉਸ ਦੀ ਸਿਹਤ ਦਾ ਹਾਲ ਪੁੱਛ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਮੰਗਲਵਾਰ ਤੋਂ ਹੀ ੲਿੰਟਰਨੈੱਟ ’ਤੇ ਸ਼ਾਹਰੁਖ ਦੇ ਐਕਸੀਡੈਂਟ ਦੀਆਂ ਖ਼ਬਰਾਂ ਘੁੰਮ ਰਹੀਆਂ ਹਨ, ਜਿਸ ਵਿੱਚ ਦੱਸਿਆ ਗਿਆ ਹੈ ਕਿ ਅਮਰੀਕਾ ਵਿੱਚ ਸ਼ਾਹਰੁਖ ਜ਼ਖ਼ਮੀ ਹੋਇਆ ਸੀ, ਮੀਡੀਆ ਰਿਪੋਰਟਾਂ ਅਨੁਸਾਰ ਕੈਲੀਫੋਰਨੀਆ ਸ਼ਹਿਰ ਵਿੱਚ ਉਸ ਦੇ ਨੱਕ ’ਤੇ ਸੱਟ ਲੱਗ ਗਈ ਸੀ, ਜਿਸ ਮਗਰੋਂ ਉਸ ਨੂੰ ਤੁਰੰਤ ਸਥਾਨਕ ਹਸਪਤਾਲ ਲਿਜਾਇਆ ਗਿਆ ਤੇ ਖੂਨ ਵਗਣ ਤੋਂ ਰੋਕਣ ਲਈ ਸਰਜਰੀ ਵੀ ਕੀਤੀ ਗਈ। ਇਸ ਮਗਰੋਂ ਸ਼ਾਹਰੁਖ ਖ਼ਾਨ ਨੂੰ ਨੱਕ ’ਤੇ ਪੱਟੀ ਨਾਲ ਵੀ ਦੇਖਿਆ ਗਿਆ ਸੀ। ਹਾਲ ਦੀ ਘੜੀ ਸ਼ਾਹਰੁਖ ਆਪਣੇ ਘਰ ਮੁੜ ਆਇਆ ਹੈ। -ਆੲੀਏਐੱਨਐੱਸ