ਘਰ ’ਚ ਦਾਖਲ ਹੋ ਕੇ ਬਜ਼ੁਰਗ ਦੀਆਂ ਵਾਲੀਆਂ ਝਪਟੀਆਂ

ਪੱਤਰ ਪ੍ਰੇਰਕ
ਸਮਰਾਲਾ, 8 ਨਵੰਬਰ
ਮੋਟਰਸਾਈਕਲ ਸਵਾਰ ਦੋ ਲੁਟੇਰੇ ਅੱਜ ਗੁਰੂ ਨਾਨਕ ਰੋਡ ਸਥਿਤ ਇੱਕ ਘਰ ਵਿੱਚ ਦਾਖਲ ਹੋ ਕੇ 70 ਸਾਲਾ ਔਰਤ ਦੇ ਕੰਨਾਂ ਵਿੱਚੋਂ ਸੋਨੇ ਦੀਆਂ ਵਾਲੀਆਂ ਝਪਟ ਕੇ ਫਰਾਰ ਹੋ ਗਏ। ਪੁਲੀਸ ਨੂੰ ਦਿੱਤੀ ਗਈ ਸ਼ਿਕਾਇਤ ’ਚ ਪਰਮਜੀਤ ਕੌਰ ਨੇ ਦੱਸਿਆ ਕਿ ਸ਼ਾਮ ਕਰੀਬ ਸਾਢੇ ਸੱਤ ਵਜੇ ਉਹ ਘਰ ’ਚ ਇਕੱਲੀ ਸੀ ਤਾਂ ਮੋਟਰਸਾਈਕਲ ਸਵਾਰ ਦੋ ਨੌਜਵਾਨ ਘਰ ਅੱਗੇ ਆ ਕੇ ਰੁਕੇ ਤੇ ਇੱਕ ਨੌਜਵਾਨ ਨੇ ਅੰਦਰ ਆ ਕੇ ਵਕੀਲ ਦੇ ਘਰ ਬਾਰੇ ਪੁੱਛਿਆ। ਨੌਜਵਾਨ ਨੇ ਦਵਾਈ ਲੈਣ ਲਈ ਪਾਣੀ ਦਾ ਗਲਾਸ ਮੰਗਿਆ ਤਾਂ ਉਸ ਨੇ ਪਾਣੀ ਦੇ ਦਿੱਤਾ ਤੇ ਕੁਝ ਹੀ ਦੇਰ ਬਾਅਦ ਨੌਜਵਾਨ ਨੇ ਉਸ ਦੀਆਂ ਵਾਲੀਆਂ ਝਪਟ ਲਈਆਂ ਤੇ ਬਾਹਰ ਮੋਟਰਸਾਈਕਲ ’ਤੇ ਉਡੀਕ ਕਰ ਰਹੇ ਨੌਜਵਾਨ ਨਾਲ ਫਰਾਰ ਹੋ ਗਿਆ। ਰੌਲਾ ਪੈਣ ’ਤੇ ਔਰਤ ਦਾ ਭਤੀਜਾ ਲੁਟੇਰਿਆਂ ਪਿੱਛੇ ਭੱਜਿਆ ਤੇ ਇੱਕ ਲੁਟੇਰੇ ਨੂੰ ਜੱਫਾ ਪਾ ਲਿਆ, ਪਰ ਉਨ੍ਹਾਂ ਲੋਹੇ ਦੀ ਰਾਡ ਰੌਲਾ ਉਸ ਦੇ ਸਿਰ ਵਿੱਚ ਮਾਰ ਕੇ ਉਸ ਨੂੰ ਜ਼ਖ਼ਮੀ ਕਰ ਦਿੱਤਾ। ਜਾਂਚ ਅਧਿਕਾਰੀ ਨੇ ਦੱਸਿਆ ਕਿ ਸੀਸੀਟੀਵੀ ਕੈਮਰਿਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਬਜ਼ੁਰਗ ਮਹਿਲਾ ਦੇ ਭਤੀਜੇ ਦੇ ਸਿਰ ਵਿੱਚ ਡੂੰਘੀ ਸੱਟ ਲੱਗੀ ਹੈ ਤੇ ਉਸ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।