ਐੱਫਆਈਐੱਚ ਦਰਜਾਬੰਦੀ: ਭਾਰਤੀ ਪੁਰਸ਼ ਟੀਮ ਚੌਥੇ ਸਥਾਨ ’ਤੇ ਖਿਸਕੀ

ਨਵੀਂ ਦਿੱਲੀ, 12 ਮਾਰਚ
ਐੱਫਆਈਐੱਚ ਪੁਰਸ਼ਾਂ ਦੀ ਤਾਜ਼ਾ ਦਰਜਾਬੰਦੀ ਵਿੱਚ ਭਾਰਤ ਇੱਕ ਸਥਾਨ ਹੇਠਾਂ ਚੌਥੇ ਸਥਾਨ ’ਤੇ ਖਿਸਕ ਗਿਆ ਹੈ। ਐੱਫਾਈਐੱਚ ਹਾਕੀ ਓਲੰਪਿਕ ਕੁਆਲੀਫਾਇਰ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਸਦਕਾ ਜਰਮਨੀ ਤੀਜੇ ਸਥਾਨ ’ਤੇ ਚਲਾ ਗਿਆ ਹੈ। ਪਿਛਲੇ ਸਾਲ ਏਸ਼ਿਆਈ ਖੇਡਾਂ ਵਿੱਚ ਸੋਨ ਤਗਮੇ ਦੀ ਬਦੌਲਤ ਭਾਰਤ (2761) ਪੈਰਿਸ ਓਲੰਪਕਿ ਲਈ ਸਿੱਧੇ ਤੌਰ ’ਤੇ ਕੁਆਲੀਫਾਈ ਕਰ ਗਿਆ ਸੀ। ਉਸ ਨੂੰ ਹਾਲ ਹੀ ਵਿੱਚ ਹੋਏ ਓਲੰਪਿਕ ਕੁਆਲੀਫਾਇਰ ਵਿੱਚ ਖੇਡਣ ਦੀ ਲੋੜ ਨਹੀਂ ਪਈ। ਦੂਜੇ ਪਾਸੇ ਓਮਾਨ ਵਿੱਚ ਖੇਡੇ ਗਏ ਓਲੰਪਿਕ ਕੁਆਲੀਫਾਇਰ ’ਚ ਜਰਮਨੀ (2786) ਕੋਈ ਮੁਕਾਬਲਾ ਨਹੀਂ ਹਾਰਿਆ ਤੇ ਇਸ ਤੋਂ ਬਾਅਦ ਅਰਜਨਟੀਨਾ ਤੇ ਬੈਲਜੀਅਮ ਨਾਲ ਟੂਰਨਾਮੈਂਟ ’ਚ ਦੋ ਜਿੱਤਾਂ ਹਾਸਲ ਕੀਤੀਆਂ ਤੇ ਦੋ ਮੈਚ ਡਰਾਅ ਖੇਡੇ। ਨੈਦਰਲੈਂਡਜ਼ ਪਹਿਲੇ ਜਦਕਿ ਬੈਲਜੀਅਮ ਦੂਜੇ ਸਥਾਨ ’ਤੇ ਕਾਇਮ ਹਨ।
ਮਹਿਲਾਵਾਂ ਦੀ ਦਰਜਾਬੰਦੀ ’ਚ ਪੈਰਿਸ ਓਲੰਪਿਕ ਲਈ ਕੁਆਲੀਫਾਈ ਕਰਨ ’ਚ ਨਾਕਾਮ ਰਿਹਾ ਭਾਰਤ (2215) ਨੌਵੇਂ ਸਥਾਨ ’ਤੇ ਕਾਬਜ਼ ਹੈ। ਇਸ ਵਰਗ ’ਚ ਵੀ ਨੈਦਰਲੈਂਡਜ਼ (3422) ਪਹਿਲੇ ਸਥਾਨ ’ਤੇ ਕਾਇਮ ਹੈ। ਅਰਜਨਟੀਨਾ (2827) ਤੇ ਜਰਮਨੀ (2732) ਆਸਟਰੇਲੀਆ ਨੂੰ ਪਛਾੜ ਕੇ ਕ੍ਰਮਵਾਰ ਦੂਜੇ ਤੇ ਤੀਜੇ ਸਥਾਨ ’ਤੇ ਕਾਬਜ਼ ਹਨ। -ਪੀਟੀਆਈ