ਬਹਿਰਾਮਪੁਰ ’ਚ ਸ਼ਰਾਬੀ ਨੌਜਵਾਨਾਂ ਨੇ ਅਧੀਰ ਰੰਜਨ ਚੌਧਰੀ ਦੀ ਕਾਰ ਰੋਕੀ

ਬਹਿਰਾਮਪੁਰ (ਪੱਛਮੀ ਬੰਗਾਲ), 13 ਅਪਰੈਲ
ਲੋਕ ਸਭਾ ਹਲਕਾ ਬਹਿਰਾਮਪੁਰ ’ਚ ਅੱਜ ਕੁਝ ਅਣਪਛਾਤੇ ਸ਼ਰਾਬੀ ਨੌਜਵਾਨਾਂ ਨੇ ਪੱਛਮੀ ਬੰਗਾਲ ਕਾਂਗਰਸ ਦੇ ਪ੍ਰਧਾਨ ਅਧੀਰ ਰੰਜਨ ਚੌਧਰੀ ਦੀ ਕਾਰ ਰੋਕ ਲਈ ਅਤੇ ‘‘ਵਾਪਸ ਜਾਓ’’ ਦੇ ਨਾਅਰੇ ਲਾਏ। ਬਹਿਰਾਮਪੁਰ ਹਲਕੇ ਤੋਂ ਮੁੜ ਚੋਣ ਲੜ ਰਹੇ ਚੌਧਰੀ ਨੇ ਇਸ ਘਟਨਾ ਲਈ ਤ੍ਰਿਣਮੂਲ ਕਾਂਗਰਸ (ਟੀਐੱਮਸੀ) ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ। ਚੌਧਰੀ ਨੇ ਕਿਹਾ, ‘‘ਇਹ ਸਿਰਫ ਮੈਨੂੰ ਰੋਕਣ ਦੀ ਚਾਲ ਹੈ। ਇਸ ਪਿੱਛੇ ਸਥਾਨਕ ਟੀਐੱਮਸੀ ਦਾ ਹੱਥ ਹੈ। ਉਹ ਚਾਹੁੰਦੇ ਹਨ ਲੋਕ ਕਾਂਗਰਸ ਪਾਰਟੀ ਲਈ ਕੰਮ ਨਾ ਕਰਨ। ਉਨ੍ਹਾਂ ਨੇ ਪਿਛਲੇ ਸਾਲ ਨਗਰ ਨਿਗਮ ਚੋਣਾਂ ’ਚ ਵੀ ਅਜਿਹਾ ਹੀ ਕੀਤਾ ਸੀ।’’ ਲੋਕ ਸਭਾ ’ਚ ਕਾਂਗਰਸ ਦੇ ਨੇਤਾ ਚੌਧਰੀ ਨੇ ਦਾਅਵਾ ਕੀਤਾ ਕਿ ਸ਼ਰਾਬੀ ਹਾਲਤ ’ਚ ਨੌਜਵਾਨਾਂ ਦਾ ਇੱਕ ਟੋਲਾ ਉਨ੍ਹਾਂ ਦੀ ਕਾਰ ਅੱਗੇ ਆ ਗਿਆ। ਉਦੋਂ ਉਹ ਦੁਪਹਿਰ ਵੇਲੇ ਚੋਣ ਪ੍ਰਚਾਰ ਕਰਕੇ ਘਰ ਮੁੜ ਰਹੇ ਸਨ। -ਪੀਟੀਆਈ