ਚੋਣਾਂ ’ਚੋਂ ਅਕਾਲੀ ਦਲ ਦੇ ਬਾਹਰ ਹੋਣ ਨਾਲ ‘ਆਪ’ ਜਿੱਤੀ: ਚੰਦੂਮਾਜਰਾ

ਸਰਬਜੀਤ ਭੰਗੂ
ਪਟਿਆਲਾ, 23 ਨਵੰਬਰ
ਜ਼ਿਮਨੀ ਚੋਣਾਂ ਦੇ ‘ਆਪ’ ਪੱਖੀ ਨਤੀਜਿਆਂ ਨੂੰ ਸ਼੍ਰੋਮਣੀ ਅਕਾਲੀ ਦਲ ਦੀ ਦੇਣ ਦੱਸਦਿਆਂ ਅਕਾਲੀ ਦਲ ਸੁਧਾਰ ਲਹਿਰ ਦੇ ਆਗੂ ਪ੍ਰੇਮ ਸਿੰਘ ਚੰਦੂਮਾਜਰਾ ਨੇ ਕਿਹਾ ਕਿ ਜੇਕਰ ਇਨ੍ਹਾਂ ਚੋਣਾਂ ’ਚ ਸ਼੍ਰੋਮਣੀ ਅਕਾਲੀ ਦਲ ਹਿੱਸਾ ਲੈਂਦਾ ਤਾਂ ‘ਆਪ’ ਦੀ ਹਾਰ ਯਕੀਨੀ ਸੀ। ਉਨ੍ਹਾਂ ਆਖਿਆ ਕਿ ਅਕਾਲੀ ਦਲ ਦੇ ਚੋਣਾਂ ਤੋਂ ਬਾਹਰ ਹੋਣ ਦਾ ਲਾਭ ‘ਆਪ’ ਨੂੰ ਮਿਲਿਆ ਹੈ। ਚੰਦੂਮਾਜਰਾ ਨੇ ਕਿਹਾ ਕਿ ਪੰਜਾਬ ਦੀਆਂ ਮੰਡੀਆਂ ’ਚ ਰੁਲੀ ਕਿਸਾਨੀ ਅਤੇ ਡੀਏਪੀ ਖਾਦ ਦੀ ਘਾਟ, ਚੰਡੀਗੜ੍ਹ ਦੇ ਮਸਲੇ ਅਤੇ ਡੈੱਮਾਂ ਦੇ ਕੰਟਰੋਲ ’ਤੇ ਵੱਟੀ ਚੁੱਪ ਦੇ ਬਾਵਜੂਦ ਵੀ ‘ਆਪ’ ਦੀ ਹੋਈ ਜਿੱਤ ਹੈਰਾਨੀਜਨਕ ਹੈ। ਅਕਾਲੀ ਦਲ ਦਾ ਚੋਣਾਂ ਤੋਂ ਬਾਹਰ ਰਹਿਣਾ ਪੰਜਾਬ ਅਤੇ ਪੰਥ ਹਿਤੈਸ਼ੀਆਂ ਲਈ ਸਵਾਲ ਖੜ੍ਹੇ ਕਰਦਾ ਹੈ।